Looma 6 - Musamu wu Mubwe

Ukwa mu masumu, uba monyi mu Yisu Kristo

¹ Buuna hima luleelaani? Bisu a benu likwilalaani mu usa masumu, mana hyese hya Nzambi hisinzafulala iteesi?

² Naana ubila ve! Bisu ti laamiikwa mu masumu, ka buni lutwala ubweba monyi mu masumu?

³ Benu a liyaabi ve ti bisu boosi ba laayaki tondihili mu Yisu Kristo, ni mu lipfu la nde baatondihi bisu?

⁴ Mu tondihili moyiina yi lipfu, baadiihi bisu kaka na nde. We bu Kristo hasuuhi mu babaakwa mu muyusu a Taata, ni bumosi kaka, bisu luubaha monyi wu munyatihi mu nde.

⁵ Ni mu buuna, tso bisu laaba itwadi na nde mu lipfu li laafwanina na la nde, bumosi kaka, bisu luuba itwadi na nde mu tsuuhili yi yafwanina na ya nde.

⁶ Ni mu buuna, liyabaani ti, imuutu hya bisu a benu hya tsikulu baakomini hyo ŋa muti itwadi na Kristo. Mana itwadi hya bisu na masumu hitabuha, na libwevelebaani baviha ba masumu.

⁷ Mu toni ati, muutu wu miikwa itwadi na Kristo, aka wu akuha, na amiitahuha na masumu.

⁸ Tso bisu a benu laakwa mu Kristo, bisu lili na hiitu ti bisu sa liba kaka monyi na nde.

⁹ Bu liyaabi ti Kristo wu asuuhi ŋa hati la babaakwa a hubwekwa ve, lipfu a lisaali na matwala ŋa yulu a nde ve.

¹⁰ Mu lipfu la nde, nde akwidi kwa limosi mu toni masumu ma baatu. Ka bunuubu, nde li monyi, na nde li monyi mu Nzambi.

¹¹ Ni bumosi kaka mu benu, yabaani ti, benu lili baatu babaakwa mu masumu. Na ti, benu lili kaka monyi mu Nzambi itwadi na Yisu Kristo.

¹² Ni mu buuna, masumu utwala ubwetuma nyutu a benu yi yukwa ve, mu ubwesiingala linyungi la yo.

¹³ A liyeholo linyutu la benu mu masumu we bilwanili bi uvanga mamabi ve. Ka yeholwaani nyutu a benu mwakulu huli Nzambi, we baatu ba monyi ba bamiimata hutso lipfu. Na yeholwaani linyutu la benu loosi mu isalu hya Nzambi, we ilwanili hi uvanga mambu ma butsitsa.

¹⁴ Buuna, lisumu a lubweba na matwala mu benu ve. Mu toni ati, benu a lili hutso lituma li Mikele ve, ka hutso a hyese hya Nzambi.

Usala mu butsiitsa

¹⁵ Ka buni? Bisu a benu ni libaasumahani mu toni ati a lisaali hutso Mikele ve, ka hutso a hyese hya Nzambi? Naana ubila ve!

¹⁶ Benu liyaabi lo bubwe: tso benu lisalili muutu na usiingala nde we baviha, benu lika baviha ba pfumu wu benu lili mu usiingala. Tso hwaba lisumu li libaabita hu lipfu, buve lisiingala li libaabita hu monyi wu butsitsa.

¹⁷ Ka lifutalaani matondo huli Nzambi! Benu ba laabeedi hu tsikulu baviha ba masumu, bunuubu benu limiisiingala mu mutima woosi Mikele mya ndongisili yi benu laayaki.

¹⁸ Na bunuubu, bu benu limiiyoboho mu masumu, benu ka baviha ba mavanga ma butsitsa.

¹⁹ Me ndi mu unzambila mu imuutu, mana benu litsikaha ma me ndi ndeele. Ni bumosi kaka, benu layehuli binama bya benu mu buviha bu manzala ma bubembo, na bubi bu buli mu ubita muutu mu utuumbaha ŋa busu bwa Nzambi. Ni bumosi kaka, bunuubu,vaani linyutu la benu loosi mu buviha bu mavanga ma butsitsa, mu uba mu idiingu hi bungidi.

²⁰ Ka ŋa benu laaba kini baviha ba masumu, benu laaba bunyanga ŋa busu bwa mambu ma butsitsa.

²¹ Ka benu ki kaluha laabahi mu tangu moyiina? Mavanga ma benu lili na tsonyi mu mo loloyi. Mavanga momaana, tsukusu a mo ni lipfu.

²² Ka bunuubu, bu lika bunyanga ŋa busu bu masumu, na bu lika baviha ba Nzambi, kaluha yi benu luubaha ni idiingu hi hyaluula mu nde, na tsukusu ni monyi wu bilima na bilima.

²³ Ka pfuta a masumu ni lipfu, ka ikuuku hi Nzambi ubaava mu bungodu, ni monyi wu bilima na bilima itwadi na Yisu Kristo, Pfumu a bisu.