Looma 5 - Musamu wu Mubwe

Hyenze hya na Nzambi

¹ Ni mu buuna, bu bisu laaka ba tsiitsa mu imiinu, bisu lili mu hyenze na Nzambi mu likumbasa la Pfumu a bisu Yisu Kristo.

² Mu toni imiinu hya bisu mu nde, bisu lili na muswa mu ubaha hyese hi bisu luukwilala ba baavangama mu hyo. Na bisu lili na kinya, bu bisu lili na hiitu mu ukabasana muyusu a Nzambi.

³ Ŋa yulu a ŋaana, bisu lili mu kinya mutso minyongi, bu liyaabi ti minyongi mibaabuta mukonono,

⁴ mukonono ubaabuta kwadisili mutso malobese, na kwadisili yibaabuta hiitu.

⁵ Hiitu a hibaapfuta ve mu toni ati, Nzambi ayitili litondo la nde mutso mitima mya bisu, mu likumbasa li Livupu la Ngidi li nde haviidi bisu.

⁶ Ni mu buuna, bu bisu laaba kini mifudi ve, Kristo akwidi mu toni a bisu banga masumu, mu tangu yi Nzambi hakese.

⁷ Hu li pasi mu usiinga ukwa mu toni a muutu wu asungama! Peleve muutu utwala uba na ibahala, mu ukwa mu toni a muutu wu mubwe.

⁸ Ka mono buni Nzambi hamwesi bunene bu litondo la nde mu bisu: ŋa bisu laaba kini banga masumu, Kristo akwidi mu toni a bisu.

⁹ Tso ni mbuli bisu laaka ba baakuha mu makila ma Kristo, ni ti nde ufuuhasa bisu kaka mu kesi a Nzambi.

¹⁰ Bu bisu laaba baboho ba Nzambi, nde anongi na bisu mu lipfu la mwana a nde. Tandisini a buunubu bu bisu limiinongo na Nzambi, buni nde huvelefuhasa bisu mu monyi a mwana a nde?

¹¹ Titswene, bisu lili na kinya ŋa busu bwa Nzambi, mu toni a Pfumu a bisu Yisu Kristo, wu miinongese bisu loloyi na Nzambi.

Adami ifwafwani hya Yisu

¹² Ni mu buuna, lisumu laakoti mu tsi mu toni a muutu mumosi, na lo laabehi lipfu. Ni bumosi kaka, lipfu laakotilili baatu boosi, mu toni ati boosi baasumihi.

¹³ Tehele Nzambi ava Mikele mya nde huli Moose, masumu maatswamini mu tsi. Ka bu Mikele myaba kini myove, mu tangu moyiina, Nzambi a hakataanga masumu ve.

¹⁴ Ka lipfu laakasasa umata tangu a Adami nate ya Moose. Lipfu laakasasa naapa mu baatu ba baakavelesa masumu we ma Adami, wu avelikinza ma Nzambi haleeli nde. Adami ni ifwafwani hya nde wuuna wu akiiya.

¹⁵ Ka lisumu la Adami, a luuyelemese na hyese hi Nzambi ubaava mu bungodu ve. Mu mbuli, baatu babalahi baamiikwa mu toni bubi bwa muutu mumosi. Ka bubwe bu Nzambi ubaamwese mu baatu, bwafulala iteesi. Na bi nde ubaava bi bongodu huli baatu babalahi mu likumbasa la muutu mumosi, Yisu Kristo, byamiisinzafulala.

¹⁶ Na bi Nzambi ubaava, a byuyelemese na lisumu la muutu mumosi ve. Tsundusu a Nzambi mu toni lisumu la muutu mumosi, Adami, yaabiti baatu hu tsyembili. Ka bungodu bwa hyese hya Nzambi, bwabiti baatu mu uba bunyanga, tso yuhili bubi bwa bo bu bwafulala.

¹⁷ Mu mbuli, lipfu laamwesi matwala ma lo mu lisumu la muutu mumosi. Ka mu Yisu Kristo siha, bisu laamiiyaka bibilahi: boosi ba bali mu uyaka hyese hi hyafulala hya Nzambi, na bungodu bu butsiitsa bwa nde, buuba monyi na buuba batumi na Yisu Kristo.

¹⁸ Ni ŋaana, lisumu la muutu mumosi, Adami, laabiti baatu boosi mu kondaayi. Ni bumosi kaka, vanga la tsiitsa limosi la Yisu Kristo, luubita baatu boosi mu uba bunyanga na uva bo monyi.

¹⁹ We mu kene a muutu mumosi, baatu babalahi baasumihi. Ni bumosi kaka, mu lisiingala la muutu mumosi, baatu babalahi baaka bunyanga ŋa busu bwa Nzambi.

²⁰ Mikele myayidi mu umwese baatu masumu ma bo, na masumu maafulili bulahi. Ka huuna hu masumu maafulili, hyese hya Nzambi hyabwesinzafulala.

²¹ We bu lisumu laamwesi matwala mu uduba baatu, ni bumosi kaka, hyese hya Nzambi hyumwese matwala ma hyo mu butsiitsa, mu ubita baatu hu monyi wu bilima na bilima mu Yisu Kristo Pfumu a bisu.