Looma 4 - Musamu wu Mubwe

Ifwani hi imiinu hya Abrahami

¹ Buuna, hima bisu luuleele mu Abrahami kaaha a bisu mu musunya? Hima nde habahi?

² Tso Nzambi asiingi ti Abrahami li wu akuha mu toni mavanga, Abrahami utwala ubula mabyoho. Ka a ŋa busu bwa Nzambi ve.

³ Eye! Ma baasonehe ma Ngidi buni mu uleele: «Abrahami asiidi imiinu mu Nzambi, na Nzambi asiingi ti nde li wu akuha mu imiinu.»

⁴ Woosi wu ubaasala, ubaayaka pfuta a nde. Pfuta mo, a yili huli nde we hyese ve, ka yo yili mukanu.

⁵ Ka ŋa muutu wu avelesa isalu, ali na hiitu mu Nzambi wu ubaakitusa nga masumu wu akuha, Nzambi miisiinga ti nde wu akuha ali mu imiinu.

⁶ Ni bumosi kaka, Davidi li mu uyaabisa kinya yi yili na muutu wu Nzambi ubaasiinga ti nde wu akuha ali, hwavele utala mavanga ma nde:

⁷ «Kinya yili huli baana, ba Nzambi hamiisa kolo-kolo mu mamabi ma bo, na ba masumu ma bo baamiifuuha!

⁸ Kinya yili huli muutu wu Pfumu havelesiinga lisumu la nde!»

⁹ Kinya moyiina ndulu ya ba bali Bayudaayo, vo ti yo yili kaka yi bangoyi? Mu mbuli, bisu libaaleele ti: «Nzambi asiingi ti Abrahami wu akuha ali, mu toni imiinu hya nde.»

¹⁰ Mu ki tangu musamu mowuuna hatswihi? Tehele bakete Abrahami, buve humbisa a ketili a nde? Naana! A humbisa a ketili a nde ve, ka ŋa habedi kini a baaketi ve.

¹¹ Na titswene, Abrahami ayaki ketili we iliimbu. Hyo hyaba we matala mu umwese ti Nzambi asiingi ukuha hwa nde mu imiinu. Ni buuna, bu Abrahami haba kini a baaketi ve, Nzambi abyalisi nde taata a boosi ba bubaasiila imiinu mu Nzambi. Baatu mobaana, Nzambi ubaasiinga bo kaka we ba baakuha, tso bu bo baabeedi kini a baaketi ve.

¹² Nde li kaka taata a ba baakete, ka a ba bubaabingalala ndulu ketili ve, ka ba bubaaduukala ifwani hi imiinu hya taata a bisu Abrahami, bu haba kini a baaketi ve.

Lahi la Nzambi huli ba bubaasa imiinu mu Yisu

¹³ Ni mu buuna, Nzambi asiidi lahi huli Abrahami na imbisa hya nde, ti bo sa babyalila tsi. Lahi moliina basiidi lo, a mu toni ati Abrahami asiingili Mikele ve, ka mu toni ati Nzambi asiingi ti nde li wu akuha mu imiinu.

¹⁴ Tso ubyalila hwa tsi hu baasa lahi, bali mu ubyalila yo mu lisiingala li Mikele, buuna imiinu hikiiba hi hyavele a kaluha, na lahi la Nzambi likiiba li laavele a tsoongo.

¹⁵ Mikele mibaateele kesi a Nzambi. Ka ŋa hwavele Mikele, kene mu Mikele ka yove.

¹⁶ Ni mu buuna, basiidi lahi mu nzila yi imiinu, mana hyo hiba hyese hi Nzambi ubaava, na basilasa hyo huli imbisa hya Abrahami hyosi. Lahi a lili mu utala ndulu ba bubaasiingala Mikele ve, ka napa boosi ba bubaasa imiinu we bu Abrahami hasiidi imiinu. Abrahami ni taata a bisu boosi,

¹⁷ we bu ma baasonehe mali mu uleele: «Me atsoolo we taata mabuli mamalahi ma baatu ba tsi.» Nde li taata a bisu ŋa busu bwa Nzambi wu nde ubaasiila imiinu, Nzambi wu ubaafutala monyi huli babaakwa na wu ubaatsunda bi byavele.

¹⁸ Toni yi ubwesa hiitu aba aka yove, ka Abrahami asiidi hwa nde hiitu. «Nde akituhi kaaha mabuli mamalahi ma baatu.» Nde asiidi imiinu mu Nzambi, we bu Nzambi haleeli nde: «Buuna ni bu huba litangu li imbisa hya we.»

¹⁹ Abrahami aba aka bebele a kama (100) li bilima. Ka imiinu hya nde hyaba a hyakolo ve, bu nde hakatsima ti linyutu la nde aba laaka bebele na lipfu, na mukadi a nde Sara wu akiibwevelebuta.

²⁰ Ŋa busu bwa lahi la Nzambi, Abrahami a habwisi hiitu hya nde na usa paha ve. Imiinu hya nde hyahwadisi nde, na nde ayusi Nzambi.

²¹ Nde aba na tadi ti Nzambi na matwala ma ukuhasa ma nde hasiidi lahi.

²² Ni mu buuna, bubaaleele mu Abrahami ti, mu toni imiinu hya nde, «Nzambi asiingi ti nde wu akuha.»

²³ Mikuma mominiimi: «Nzambi ubaasiinga Abrahami, muutu wu akuha», a mu toni a Abrahami siha baasonehe ve.

²⁴ Baasonehe mikuma momiina kaka mu bisu. Bisu ba buusiinga ti imiinu hya bisu hili hi hyakuha, mu toni ati libaasa imiinu mu Nzambi wu asuuli Yisu Kristo Pfumu a bisu, ŋa hati la babakwa.

²⁵ Nzambi aviidi Yisu mu lipfu, mu toni masumu ma bisu. Na Nzambi asuuli nde, mana bisu liba ba baakuha.