Looma 14 - Musamu wu Mubwe

Uveletsundasa tso uvelerokolo wuna

¹ Yakaani muutu wu li wu akolo mu imiinu, hwavele usobosono munywa mu matsimi ma nde.

² Ni mu buuna, imiinu hya muutu mumosi hibaabita nde mu udya byosi bi bubaadya. Ka mukima wu akolo mu imiinu, ubaadya ndulu musooso.

³ Nyaha wu ubaadya byosi avelesyebe wu aveledya nyama, na wu aveledya nyama, aveletsuundasa wu ubaadya byosi. Mu toni ati Nzambi ayaka nde kaka.

⁴ We na li, we wu li mu utsuundasa musalili a wuna? Tso nde li wu abama mu isalu, tso nde bwidi, liina lili mu utala pfumu a nde. Ka nde ukwilala wu abama, mu toni ati Pfumu li na matwala ma usika nde.

⁵ Muutu mumosi ubaatsima ti, bilumbu byafulala bina tsongo. Ka muutu mukima ubaatsima ti, bilumbu a bili na lisobosono ve. Muutu muutu afwana uba na tadi mu ma nde ali mu utsima.

⁶ Woosi wu ubaasa lisobosono li bilumbu, li mu usa buuna mu ukinza Pfumu. Woosi wu ubaadya byosi, li mu udya kaka mu ukinza Pfumu. Mu toni ati nde ubaafutala matondo huli Nzambi mu byudya bya nde. Na woosi wu ubaaveledya byosi li mu usa kaka buuna mu ukinza Pfumu. Mu toni ati nde kaka ubaafutala matondo huli Nzambi.

⁷ A hu li na muutu ŋa hati la bisu a benu, wu li monyi mu toni a nde mwakulu ve. Na, a hu li kaka na muutu wu li mu ukwa mu nde mwakulu ve.

⁸ Tso bisu a benu lili monyi, bisu lili monyi mu toni a Pfumu. Na tso likwidi, bisu luukwa mu toni a Pfumu. Ni mu buuna, tso laaba monyi buve tso laakwa, bisu lili ba Pfumu habaha.

⁹ Mu toni ati Kristo amiikwa, na nde amiisuuha ŋa hati la ba baakwa, mu uba Mutumi ŋa yulu a babaakwa na ba bali monyi.

¹⁰ Ka we, mu hima we li mu utsuundasa mwana a ngu a we? Na we, mu hima li mu upenye kedi a we? Bisu boosi sa liteleme ŋa busu bwa Nzambi, mu uyaka tsuundusu a nde.

¹¹ Mu toni ati ma Baasonehe ma Ngidi mali mu uleele bunuubu: «Me Pfumu wu li monyi ndi mu undeele bunuubu: Baatu boosi sa batsokomo ŋa busu bwa me, na boosi sa basiinga Nzambi ŋa misu ma baatu.»

¹² Ni mu buuna, pasi muutu mu bisu afwana uva ikuumbu huli Nzambi, mu mavanga ma nde mwakulu.

¹³ Ni mu buuna, linyahaani utsundasa bana na bana. Volwaani kesili yi uvelebita wuna mu udunga nzila a Nzambi buuve yi imiinu.

Uvelebwisa wuna mu masumu

¹⁴ Mu Pfumu Yisu, me nzaabi mu tsiki yoosi ti a hu li na isiha hi baasa ngidi mu hyo mwakulu ve. Ka tso muutu tsimi ti hu li na isiha hi baasa ngidi, buuna hyo hili hi baasa ngidi mu nde.

¹⁵ Tso we li mu ukwamisa mwana a ngu a we mu bi we li mu udya, we a hasaalidyata mu litondo ve. Mu toni a byudya, a hanyambasana mwana a ngu a we, wu Kristo haakwidi mu nde ve.

¹⁶ Mambu ma mali ma mabwe huli we, a makituha huli baatu bakima mambu ma makusa ve.

¹⁷ Eye, Ipfumu hya Nzambi a hili dyambu la byudya, buve la byunywa ve. Ka hyo hyakangama mu butsitsa, hyenze na kinya, bi Livupu la Ngidi libaava.

¹⁸ Ni buuna, woosi wu ubaasalila Kristo mu biteesi mobiina, li wu mubwe ŋa busu bwa Nzambi, na baatu bubaasilasa nde.

¹⁹ Ni mu buuna, nyaha lisahaani bi bibaabehe hyenze na bi bibaava bisu muswa mu ukumbasana mu ukula mu imiinu.

²⁰ A haduba isalu hya Nzambi mu toni a byudya ve. Eye, byudya byosi bili bi byatsyeme. Ka ni bubi huli muutu, tso nde diidi isiha hi hyudungasa mwana a ngu nzila a Nzambi buuve yi imiinu.

²¹ Dyambu li laafwana ni mu uveledya nyama, mu uvelenywa malamu, na mu ubisa byosi bi byutwala ubwisa mwana a ngu mu lisumu.

²² Imiinu hya we mu dyambu molinili, keelese hyo mu we mwakulu ŋa busu bwa Nzambi. Kinya yili na muutu wuuna wu aveletsundaana mu toni makesili ma nde!

²³ Ka wu li na matsika mu byudya, Nzambi amiisyembe nde. Mu toni ati, mbiili a nde a yaayelemene na imiinu hya nde ve. Na liyaabi ti, mambu moosi ma muutu ubaavanga, maveleyelemene na imiinu hya nde, mali masumu.