3 Yowani 1 - Musamu wu Mubwe

Mabwehe

¹ Wu ni me mukuutu, ndi mu utsonehe muhanda mowunuwu huli mbahi a me wu litondo Ngayusi, wu me atondo mu mbuli.

² Mbahi a me, me tondi ti pasi isiha hi we usa hibwaha, na we ba na polo yi linyutu, we bu muvumu a we ali mu ubuuha.

Mbiili yimbwe ya Ngayusi

³ Me amono kinya yindahi ŋa baana ba ngu baaya na baatiila we imbangi mu imbuli hi we akangama mu hyo, na mu ndyatili a we ya hutso imbuli.

⁴ Kinya a me yi yafulala, ni mu uyuha ti baana ba me bali mu udyata mu imbuli.

⁵ Mbahi a me wu litondo, we akangama mu ma we li mu uvanga mu ukumbasa baana ba ngu, tso ba bali byenyi.

⁶ Baatu mobaana, baata imbangi mu litondo la we ŋa busu bu libundu loosi. Kolo-kolo a we! Kumbasa bo we bu hwafwana ŋa busu bwa Nzambi, mu byosi bi bo bali na byo nzala mu mudyenge a bo.

⁷ Mu toni ati, bo bali mu udyenge mu uyayabisa nduhi a Kristo, hwavele uyaka likumbasa huli bangoyi.

⁸ Ni mu buuna, bisu lafwana ubaakumbasa baatu ba pila moyiina, mana libaani itwadi na bo mu isalu hi bo bali mu usa, mu uyabisa imbuli.

Mbiili a Dyotelefe na ya Demetiliyusi Mbiili yimbi ya Dyotelefe

⁹ Me atsonihi muhanda wu mukusi huli libundu, ka Dyotelefe wu atondo ubaamonehele wa tsomi ŋa hati la baana ba libundu mu pasi dyambu, a hasiingi tumili a bisu ve.

¹⁰ Ni mu buuna, ŋa me unza, me utsaangula mambu moosi ma nde ali mu uvanga: mambu mamabi ma nde ali mu upfutahala bisu. Titswene, nde a hali mu usuka ŋaana ve: nde li mu ubisa uyaka baana ba ngu ba bali mu mydyenge. Nde li mu upfubasa kaka ba bubaakana uyaka bo, na nde li mu ubinga bo mu libundu.

¹¹ Mbahi a me wu litondo, a haduukala mavanga ma nde mamabi, ka duukala mavanga mamabwe. Wu li mu uvanga mamabwe li mwana a Nzambi. Ka woosi wu li mu uvanga mamabi, a hayaba Nzambi ve.

Mbiili yimbwe ya Demetiliyusi

¹² Ka uto ti Demetiliyusi, baatu boosi bali mu utiila nde imbangi hi ibwe, napa imbuli hili mu umwese ti nde na mbiili yimbwe. Bisu kaka lili mu utiila nde imbangi hi hibwe, na we yabi ti imbangi hya bisu hili hya mbuli.

Mabwehe ma tsyelele

¹³ Me kini na mambu mamalahi ma ubweyabisa we, ka me a hatondi usonehele we mo mu muhanda na ilapi ve.

¹⁴ Lehemene la me mawasa-mawasa, ni li uya huli we na umoho me mwakulu na we.

¹⁵ Nyaha hyenze hiba na we! Bambaahi ba we bamiibwehe we. Va mabwehe huli muutu muutu mu bambaahi ba bisu.