2 Yowani 1 - Musamu wu Mubwe

Mabwehe

¹ Wu ni me mukuutu, ndi mu utsindaha muhanda mowunuwu huli we, mukaasu wu Nzambi hasoolo, na huli baana ba we ba me atondo mu imbuli hyosi. Ka ndulu a me siha atondo benu ve, napa boosi ba baayaba imbuli.

² Bisu laatondo benu, mu toni imbuli hi hili na bisu na hi hyukwilala mu bisu mu bilima na bilima.

³ Nyaha hyese, kwili lingebe na hyenze bi byumata huli Nzambi Taata, na huli Mwana a nde Yisu Kristo biba na bisu, mana bisu liba monyi mutso imbuli na litondo.

Mukele imbuli na litondo

⁴ Me ambedi na kinya yi yafulala, mu umono baana ba we bakima ba bubaadyata mutso imbuli. Ni buuna, Taata hatuma bisu a benu mu uvanga.

⁵ Na bunuubu mukaasu wu litondo, li me ndi mu upondo we ni liniili: nyaha litondosonwaani. Mukele litondo wunuwu, a hali mukele wu munyatihi me miitsonehele we ve, ka ndulu ni wu Nzambi haviidi bisu umata ŋa mbandu.

⁶ Litondo ni udyata hutso mikele mya Nzambi. Wuuna ni mukele wu benu laafwana uduukala mu idiingu hya benu, we bu benu laayuhi nde umata ŋa mbandu.

⁷ Me ndi mu undeele buuna, mu toni ati, bapfuti babalahi baamiitsamuha mu tsi yoosi. Bo a bali mu usilasa ve ti, Yisu Kristo ayidi ŋa tsi mu nyutu musunya. Baatu ba pila yiina, ni bapfuti na baboho ba Kristo.

⁸ Baakebaani mu benu mwakulu! Buuna benu livelediimbasa kaluha yi isalu hya bisu hi usalila Nzambi, na benu liyaka kaluha yi yafwana.

⁹ Woosi wu avelekangama mu ndongisili a Kristo, na wu li mu utahuha na yo, a hali itwadi na Nzambi ve. Wu li mu ukwilala mu ndongisili moyiina, li itwadi na Nzambi Taata na Mwana a nde.

¹⁰ Tso muutu yidi yamono benu, na ubehele benu ndongisili yi yaasoboono na ya Kristo, a liyaka nde mu nzo a benu, tso uva nde bwehe ve.

¹¹ Ka wu uva nde bwehe, li likoongo na nde mu mavanga ma nde mamabi.

¹² Me kini na mambu mamalahi ma ubweyabisa benu, ka me atondi usonehele benu mo mu muhanda na ilapi ve. Lehemene la me, ni li uya huli benu na umoho me mwakulu na benu, mana kinya a bisu yiba yi yasupaha.

¹³ Baana ba kedi a we wu Nzambi hasoolo, batsindihi we mabwehe.