Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

2 Timoteho 3 - Musamu wu Mubwe


Bilumbu bya tsyelele

1 Yibwala monyi mu mambu momanima: hu tsukusu a tangu, sa uba na bilumbu bya pasi.

2 Baatu bu uba na nyinga, na linyungi la mbongo, na nyeme, na isayi. Basafuli ba bungidi bwa Nzambi, banga kene ŋa busu bu bataata na bangu. Bo bu uba ba buveletwala ufutala matondo, bangoyi.

3 Baatu bu uba banga kamini-mutima, bu ubisa unongo na bambaahi, banga makusa, ba baavelekuta linyutu, banga a kasa, ba baabelele mamabwe.

4 Baatu bu uba basumbisi ba bana, banga mafufu, banga lidadu, ba baafulala utondo makinya ma bo hwavele utondo Nzambi.

5 Bo sa bayusa Nzambi hutso muwala, ka bo bubaatuna ti matwala ma Nzambi matuma idiingu hya bo. Tahuha na baatu mo baana.

6 Me nzalusa benu, huli na bakima ŋa hati la bo babali mu utsodomo we miibi mutso manzo na ubaasoho bakasu babaavele na dyele, ba baaluula na mipfuna mi masumu, ba baayunga na banga manzala ma pila mu pila.

7 Bo bali mu ukwilala mu uyiha ndongisili yi nyatihi, hwavele utwala utsikaha imbuli hya Nzambi.

8 We bu Yanesi na Yambese baatelimini Moose, bumosi kaka, baatu mobaniba, bali mu utuna imbuli. Bo bali baatu banga matsimi ma mamiisahuha na imiinu hya bo hili hya mupu.

9 Ka bo a bu uto lala ve. Mu toni ati baatu boosi sa bayaba butsudu bwa bo. We bu hwaba mu Yanesi na Yambese.


Mandongi ma tsukusu

10 Ka we, we aduukili me mu ndongisili a me, mu ndyatili a me, mu makani ma me, mu imiinu hya me, mu mukami a me, mu litondo la me, mu mukonono a me, mu usungama tso mu ibahala hya me,

11 hutso a mbingisili na mapasi ma me. Ki mapasi me apelembwana na mo, hu misyenge mya Antyokya, Ikoniwumi na Lisitele! Ki mbingisili me apelekunda! Ka mu moosi, Pfumu ayobili me.

12 Boosi ba bali mu utondo udyata bu hwasungama mu Yisu Kristo, bu ubwana mbingisili.

13 Ka baatu banga mavanga mamabi, banga a soho, bu usinzakagama mu bubi bwa bo. Bo bu usoho bakima, na bu udunga bo mwakulu.

14 Ka we, kangama mu ma we ayiha mu bisu, na ma we ayaka mu mutima mumosi. We yabi huli na we ayiha mo.

15 Umata hu hati bumwana bwa we, we yabi ma baasonehe ma Ngidi. Maana moosi, ni ma mu utwala hwadisa imiinu hya we na uva we liyobolo mu Yisu Kristo.

16 Mambu moosi ma baasonehe mu Muhanda a Ngidi, mali mu umata huli Nzambi. Maana moosi mali na tsalu mu ulongese baatu, mu usyembe, mu usungaha na mu uyihasa bo hutso butsitsa.

17 Mono buni hwafwana mu uba, mana musalili a Nzambi aba wu avangama na wu akuha, mu usa pasi isalu hi ibwe.

© (Active), Wycliffe Bible Translators, Inc. All rights reserved.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ