2 Timoteho 2 - Musamu wu Mubwe

Lisadaadu la Yisu Kristo

¹ Ni mu buuna, we mwana a me, hwada mu matwala ma hyese hi hili mu Yisu Kristo.

² Buuna, ndongisili yi we ayuhi huli me, ŋa busu bu bambangi babalahi, tosele yo huli baatu ba lisunga, mana bo kaka batwala ulongese yo huli bakima.

³ Siinga mapasi na me, we bu lisadaadu lilibwe la Yisu Kristo lahwada.

⁴ Lisadaadu li litondi uyusa pfumu a nde, utwala ubwekangama mu misamu mi myavele mi isalu hya nde ve.

⁵ Bumosi kaka, muyeni a tiinu utwala uyaka mutata a mbingili ve, tso nde a hadukili mikele mya nzyenili a tiinu ve.

⁶ Musali a ngundu wu ubaasala hu unono, afwana uba wa tsomi mu utsonzehe muhunu.

⁷ Sinzatsikaha mambu ma me ndi mu undele we. Buuna, Pfumu uva we buyedi bu uyaba moosi.

⁸ Yibwala monyi mu Yisu Kristo, wu imbisa hya pfumu Davidi na wu asuuhi mu ba baakwa, we bu Musamu wu Mubwe wu me ndi mu undongese ali mu uyabisa.

⁹ Ni mu toni a Musamu wu Mubwe wunuwu, me ndi mu umono pasi. Mu nde, baamiihada me mapanga we mudubi a baatu. Ka a mambu ma Nzambi bahada mapanga ve.

¹⁰ Ni mu buuna, me ndi mu ukunda moosi, mu libwe la ba Nzambi hasoolo. Maana moosi mali mu uvangama, mana kaka bayaka ayobolo bo kaka, na ukotese bo mu muyusu wu bilima na bilima.

¹¹ Musamu a mbuli ni wunuwu: Tso bisu likwidi na Yisu Kristo, bisu lu uba kaka monyi na nde.

¹² Tso bisu lihwadi, bisu kaka lu utuma na nde. Ka tso bisu lituni nde, nde kaka utunala bisu.

¹³ Tso bisu liyehuli nde, Yisu Kristo akwilala wu akuha. Ka nde utwala utunala nde mwakulu ve.

Musalili wu Pfumu ali mu usilasa

¹⁴ Yibwala maana moosi huli baatu boosi. Yibusa bo na ibahala hyosi, ŋa busu bwa Nzambi we mbangi, mu ubaavelekakana mu mikuma. Ukakana mohuuna a huli na tsongo ve. Hwo hubaalobese ba bubaatehe matswi, mu uyuha maana.

¹⁵ Hwada mu uba wu asungama ŋa busu bwa Nzambi. Ba we musalili wu uli mu usa isalu hya nde na lisunga, hwavele a tsonyi. Tosele mambu ma mbuli huli baatu, we bu hwafwana.

¹⁶ Peke biledi bi byavele lisunga na bitoyili bi bangoyi. Ba bubaasa biledi mobiina, bubaasinzatahuha na Nzambi.

¹⁷ Ndongisili a baatu mobaana, yili we mbaadi yi yili na mavinya, yi yili mu uroto. Ifwani mohinihi, hyayelemene na Imene buna Filete.

¹⁸ Bo baamiitahuha na imbuli, na bo bali mu upfuta ba mukristo babalahi. Bo bali mu ubaalongese ti tsuuhili a baatu mu babaakwa, yamiikwavangama na a lafwana mu ubwekeele yo ve.

¹⁹ Ka, bibene bi byabama, bi Nzambi hatunga, bili mu ukwilala. Ŋa yulu a byo, baavala mambu momanima: «Pfumu yabi baatu ba nde.» Na, «Pasi muutu wu uleele ti nde li mu Pfumu, afwana usiisa mavanga mamabi!»

²⁰ Mutso a nzo yinene, huli bisalili bya pila mu pila. Huli na bisalili bikima bya wolo, buve bi bitali bya talu. Ka huli kaka na bikombe bi bavala mu miti, buve mu diha. Byatsomi bi bubaasalila mu mikungi miminene, bina bi bubaasalila kele tsuhu.

²¹ Ni mu buuna, tso muutu li mu uswaha linyutu la nde, na utahuha na mavanga mamabi maana, nde afwanina we bisalili bya tsalu, bya ngidi, huli nga byo, bya tsongo mu pasi mavanga mamabwe.

²² Bata mapeyu ma bufudu. Duukala mbiili yi butsiitsa, yi imiinu, yi litondo, ya hyenze, yi itwadi na boosi ba bubaasambila Pfumu mu mutima wu atsyeme.

²³ Bisa bileedi bi butsudu. We yabi ti byo bi baatelemese mikaakunu.

²⁴ A hwafwana huli musalili a Pfumu mu uba na mikaakunu ve. Ka nde afwana uba nga isusi ŋa busu bwa baatu boosi. Muutu wu utwala ulongese, na ukunda mamabi moosi ma baatu bu uleele mu nde.

²⁵ Nde afwana usungaha mu bulembo, ba bubaatelemene nde, peleve Nzambi utwala usobo mbiili a bo, mu uyaba imbuli.

²⁶ Bo utwala uyafutaha mu matsimi ma tsiki, na upala mu myeto mi Mukuyi. Nde wu bedi amiikanga bo ba monyi, mu ususa bo hutso lituma la nde.