2 Tesalonika 2 - Musamu wu Mubwe

Tswamina nziili a Pfumu

¹ Mu ma mali mu utala nziili a Pfumu a bisu Yisu Kristo, na kuukimini a bisu ŋa pedu a nde, bisu livondi benu dyambu limosi, baana ba ngu.

² A lilenge mu uba na boomo, buve mu uba matsimi helini-helini ve, tso muutu yayaabisa benu ti ilumbu hya nziili a Pfumu himiito. A liyuhala nde ve, tso baaleele ti mbihulili, buve ti malumbi, buve ti muhanda miimata huli bisu.

³ Likele muutu a hasoho benu we bu nde atoondi ve. Mu toni ati, ilumbu mohiina a hyuya tswamina baatu bateleme mu utuna Nzambi ve. Na tswamina bubi bumonehele mu iteesi hya muutu nga bukanyi, wu amiidunga.

⁴ Muboho mowunuuwu, wu unangimana pasi baatu bubaasambila, bi bu baamono ti bili bya ngidi. Nde sa anangimana biina byosi na sa ayakoto nate mu nzo a Nzambi, na utsahala muuna na ubaatuka tulu, ti nde ni Nzambi.

⁵ Benu a lili mu uyibwala monyi ti me anzaabisi benu lo ŋa me amba kini na benu ve?

⁶ Ka benu liyaabi ti isiha himosi hyakanga muutu mo nga bukanyi, mana nde amonehele ndulu mu tangu yi Nzambi haakese.

⁷ Mu toni ati, matwala ma nga bukanyi, mamiitswiha mu tswehi. Hwamiisaala ndulu aka ti, wu akaanga matwala momaana, uhwada mu ukaanga mo nate tangu yi nde hudimbala.

⁸ Buuna, nga bukanyi sa amonehele. Pfumu Yisu sa aduba nde mu mupu wu upala mu munywa nde, na nde sa ahesolo nde mu matwala ma nziili a nde.

⁹ Nga bukanyi mo wunuwu, sa aya na matwala ma Satana. Nde sa avanga bipadi bya pila mu pila, biliimbu bya kimwili, na bimangu bya soho.

¹⁰ Nde usalila bubi bwa pila mu pila, mu usoho boosi ba buudunga. Bo buudunga mu toni ati, bo a baayaka tso utondo imbuli hi hyuyobolo bo ve.

¹¹ Buuna Nzambi sa atsindaha bo matwala ma udunga, mana bo basa hiitu mu mapfuta.

¹² Ni mu buuna, baatu boosi ba baavelisa hiitu mu imbuli, ka baamoni kinya na baakangimi mu mavanga mamabi, sa batsundasa bo.

Kangimini mu Nzambi

¹³ Uto ti bisu a benu, baana ba ngu ba Pfumu hatondo, bisu lafwana ubaafutala matondo huli Nzambi tangu yoosi mu toni a benu. Benu ba Pfumu hasooli hati a tsomi, mu uyoboho mu isalu hi Livupu li libaava benu bungidi. Benu luuyoboho kaka, mu toni imiinu hya benu hi hyakangama mu imbuli.

¹⁴ Mu ukuhasa dyambu moliina, Nzambi ateele benu mu nzila a Musamu wu Mubwe wu bisu laayabisi benu. Nzambi hateele benu, mana benu liyaka muyusu a Pfumu a bisu Yisu Kristo.

¹⁵ Ni mu buuna, baana ba ngu, telemaani ŋa benu lili na kangamaani mu ndongisili yi bisu laatoosili benu mu munywa, buve mu muhanda.

¹⁶ Mu hyese hya nde, Nzambi Taata a bisu atondo bisu, na nde ava bisu ibahala hi hyavele na tsukusu na hiitu hi hibwe. Nyaha nde na Pfumu a bisu Yisu Kristo nde mwakulu,

¹⁷ baluusa mitima mya benu mu ibahala! Nyaha bava benu kaka mifudi mi ubaavanga ma mabwe tangu yoosi. Na nyaha mambu ma mali mu upala mu minywa mya benu maba mambu ma lisuunga!