2 Tesalonika 1 - Musamu wu Mubwe

Mabwehe

¹ Me Pahuli, Silaasi na Timoteho, lili mu ubila libundu la bisu Tesalonika, la Nzambi Taata a bisu na Pfumu Yisu Kristo.

² Nyaha Nzambi Taata a bisu na Pfumu Yisu Kristo, bava benu hyese na hyenze.

Pfumu sa aya mu utsundasa baatu ŋa tsi

³ Baana bangu, bisu lafwana ubafutala matondo tangu yoosi huli Nzambi, mu toni a benu. Hwafwana huli bisu mu usa buuna, mu umono buni imiinu hya benu hili mu ukula. Bisu lili mu umono kaka buni litondo li benu lili mu umwese mu bana, lili mu ukula.

⁴ Ni mu buuna, bisu lili na nyeme mu uyambila mu benu mutso mabundu ma Nzambi. Mu toni ati benu laateleme mu imiinu, tso bu benu lili mu ubwana mbingisili na mapasi.

⁵ Ŋaniŋa huli mu umwese huli baatu boosi iliimbu hya ti, tsuundusu a Nzambi yili yi butsitsa. Mapasi ma benu lili mu ukunda, mali mu uva benu muswa mu umonehele ba bakuha mu ukoto mu Ipfumu hya Nzambi. Ipfumu hi benu lili mu umono mapasi mu hyo.

⁶ Mu mbuli, Nzambi li wu akuha. Nde ufutala munyongi huli ba bubaanyongese benu.

⁷ Huli benu ba bali mu unyongese, Nzambi sa ava benu pumiili itwadi na bisu. Sa huba buuna, ŋa Yisu uyamonehele hu mayulu na bapofi ba nde ba nga matwala.

⁸ Nde sa aya hutso a ludi la mbaahu, mu usyembe ba baaveleyaba Nzambi na ba baavelesingala Musamu wu Mubwe wa Pfumu a bisu Yisu.

⁹ Bo sa bayaka tsyembili ya pasi, ni lipfu li bilima na bilima. Bo a buumono hiinzi hya Pfumu na muyusu wu mifudi mya nde ve.

¹⁰ Maana sa mavangama ŋa nde huya mu uyaka muyusu ŋa hati la ba nde boosi. Ba bali mu usa imiinu mu nde, sa baba hutso a kimwili na minywa bwasi. Benu sa liba ŋa hati la bo, mu toni ati benu laasa imiinu mu ndongisili a bisu.

¹¹ Ni mu buuna, bisu libaasambila tangu yoosi mu benu. Bisu libaavondo huli Nzambi a bisu mu ukitusa benu ba baakuha, mu teelili yi benu laayaka. Bisu lili mu uvondo ti, mu matwala ma nde, nde akumbasa benu mu ukuhasa peyu a benu mu uvanga mamabwe, mana imiinu hya benu himonehele mu mavanga.

¹² Buuna, nduhi a Pfumu a bisu Yisu sa bayusa mu toni a benu. Na sa bayuusa benu mu toni a nde. Hiina sa hiba iliimbu hya hyese hya Nzambi a bisu na Pfumu a bisu Yisu Kristo.