2 Peetelo 3 - Musamu wu Mubwe

Pfumu li mu uya

¹ Bambaahi ba litondo, wunuwu ka ni muhanda wa myole wu me ndi mu utsonehele benu. Hutso mihanda mimyole, me ndi mu unzibwala benu ndongisili yi benu laayaki, mu usaha uyelese nzabiili a benu yi misamu.

² Yibwalaani monyi, mu mambu ma mimbihuli mya ngidi myayabisi umata beleve. Yibwalaani kaka mukele wu Pfumu na Muyobili hatoosili benu, mu nzila bilumbi bya nde.

³ Hati a tsomi, yabaani ti mu bilumbu bya tsyelele, sa umonehele bakwedi. Bo sa baduukala mapeyu ma bo mamabi na ubaakwede benu.

⁴ Bo sa baleele: «Yisu asiidi lahi ti nde uyafutaha. Ka nde a hayafutaha ve! Umata bu bakaaha ba bisu baakwidi, byosi byamiikwilala we hu mbandili a toto.»

⁵ Baatu mobaniba bakondini uyaba ti: umata beleve, Nzambi avangi yulu na toto mu lituma la mambu ma nde. Nde apalisi toto mu mamba, na ni mu mamba nde havangi yo.

⁶ Bo badimbili kaka ti, Nzambi anyambisini toto mu tangu a tsikulu mu mamba ma nyamba.

⁷ Mu ma mali mu utala toto na mayulu ma loloyi, mambu ma nde mali ti, Nzambi amiikeelese byo, mana nde anyengese byo hu mbaahu, mu ilumbu hya tsundusu, hi boosi ba baavelekinza nde bu ukwa.

⁸ Ka dyambu limosi li benu lu uvelevusana, bambahi ba litondo ni ti: huli Pfumu, ilumbu imosi hili we iveeve (1000) hi bilima, na «iveeve (1000) hi bilima hili we ilumbu imosi.»

⁹ Pfumu a hutaamba mu utswihasa malahi ma nde, we bu baatu bakima bali mu utsima ve. Ka nde li na mukami mu toni a benu. Nde a hatondi ti tso mumosi mu benu anyambana ve. Ka nde tondi ti baatu boosi basobo mbiili na usa imiinu hya bo mu nde.

¹⁰ Ka ilumbu hya Pfumu hyuya kidumana we ŋa mwibi ubaya. Mu ilumbu mohiina, yulu lu udiimbala na idumu hi inene. Bisiha bya hu yulu byunyenge hu mbaahu na byukuda. Buuna, toto yoosi na mavanga ma baatu moosi sa biyabaana payalala mu tsundusu.

¹¹ Mu toni ati bisiha byosi sa bidimbala, yabaani buni benu lafwana mu udyata! Mbiili a benu yafwana uba ya ngidi na yi Nzambi hatondo.

¹² Benu laafwana ukeele na uhwada, mana ilumbu mohiina, ilumbu hya Nzambi, hiveletamba mu uya. Ilumbu mohiina, bya hu mayulu byusulamana hutso a ludi la mbaahu.

¹³ Ka bisu lili mu ukeele lahi li Nzambi hasa: yulu li linyatihi na toto yi nyatihi, hu butsitsa bwa Nzambi bumonehele.

¹⁴ Ni mu buuna, bambahi ba litondo, bu lili mu ukeele ilumbu mohiina, hwadaani mu uba babaatsyeme. Baani babaavele masyembo ŋa busu bwa Nzambi, mu hyenze hi nde ali mu uva.

¹⁵ Benu laafwana mu uyaba ti mukami a Pfumu a bisu, ni liyobolo la benu. Ni buuna kaka mwana a ngu a bisu wu litondo, Pahuli haleeli ŋa nde hasonihi mu tsiki yi Nzambi hava nde.

¹⁶ Ni buuna nde hasonehe mambu momaana mu mihanda mya nde myosi. Hu li na mambuha mu mihanda mya Pahuli ma mali na pasi mu utsikaha. Baatu bakima babaavele na nzabiili, na ba bali velo-velo, bali mu usobo mbindulili a mambu momaana. Bo bali mu ubindula we bu hu li matsimi ma bo ma upfuta. Bumosi kaka, bo bali mu ukalula mbindulili a mambu mu mambuha makima ma libuuku la Nzambi. Tsalili moyiina yili mu ubita bo hu ubungana.

¹⁷ Ka benu bambaahi ba litondo, bu me miinzibusa benu, baani likanda. Kebaani baatu ba bavelekinza Nzambi, ba baamiidunga nzila yimbwe, a balobese benu. Mana benu a lipatusa kwadili a benu mu Yisu Kristo.

¹⁸ Ka nyaha benu likula hutso a hyenze na nzabiili a Yisu Kristo, Pfumu na Muyobili a bisu. Nyaha muyusu aba huli nde, loloyi na mu bilima na bilima! Ameni!