2 Peetelo 1 - Musamu wu Mubwe

Mabwehe

¹ Ni me Simoni Peetelo, musalili na ilumbi hya Yisu Kristo. Me ndi mu utsonehele huli benu, ba lili na imiinu hya tsongo we hya bisu mu hyese hya Yisu Kristo, Nzambi na Muyobili a bisu.

² Nyaha Nzambi asyeme benu na ava benu hyenze hi hyafulala mu nzabili a Nzambi na Yisu Pfumu a bisu.

Kaluha a teelili a Nzambi

³ Nzambi mu matwala ma nde, ava bisu byosi bi byakuha mu idiingu hya bisu, mu ukangama mu nde. Pfumu ayabisi bisu wuuna wu ateele bisu, mu muyusu na bubwe bwa nde.

⁴ Ni mu buuna, Nzambi amiisa bisu malahi ma bungodu bwa talu na bu bubwe. Nde hasiidi malahi momaana, mana benu limata mu manzala ma uvanga mambu mamabi ma utsala baatu ba tsi. Ŋa mbuha unyambana, Nzambi miikitusa benu bababwe, we nde mwakulu wuli wu mubwe.

⁵ Ni mu buuna, benu lafwana uva mifudi mya benu myosi, mu ubwese ŋa yulu imiinu hya benu, mbiili yimbwe; na ŋa yulu a mbiili yimbwe, nzabili a Nzambi;

⁶ ŋa yulu a nzabili a Nzambi, ukuta hu linyutu; ŋa yulu ukuta hu linyutu, mukonono; ŋa yulu mukonono, ukangama hwa mu Nzambi;

⁷ ŋa yulu a ukangama hwa benu mu Nzambi, litondo li bumwana bu bungu bwa mu Kristo; ŋa yulu litondo li bumwana bu bungu bwa mu Kristo, bwesaani litondo.

⁸ Eye, tso benu lili na bisiha mobiina, na tso byo bipfuni mu benu, byo byutelemese benu mu usala. Na nzabili a Pfumu a bisu Yisu Kristo sa yibutala benu mimbutu.

⁹ Ka muutu wu avele na byo, li we muutu nga monihili yi kusi, na nde li inzimana. Nde amiivusana ti Nzambi atsyemisi nde mu masumu ma nde ma tsomi.

¹⁰ Ni mu buuna, baana ba ngu, hwadaani mu usa mifudi mu usilasa ti ni mbuli, Nzambi ateele benu na asoolo benu mu uba buli la nde. Tso benu livangi buuna, benu utwala ubwisa imiinu hya benu ve.

¹¹ Ka ni buuna Nzambi husiingasa benu kotili mu Ipfumu hi bilima na bilima, hya Pfumu na Muyobili a bisu Yisu Kristo.

Ukangama mu ndongisili yi mbwe

¹² Ni mu toni moyiina, me apfwana ubaayibwala benu monyi mu bisiha mobiina. Ka me nzabi ti benu laamikwayaba byo, na benu laamiikangama mu imbuli hi benu laayaki.

¹³ Ka me ndi mu utsima ti, hwafwana huli me mu ubaayibusa benu mu uba likanda, bu me kini monyi.

¹⁴ Ka, me nzabi ti tangu yi lipfu la me yaka bebele, we bu Pfumu a bisu Yisu Kristo hayabisi me.

¹⁵ Ka me tsa kwada mu uyelese benu, mana humbisa lipfu la me, benu libaayibwala monyi mu ma me ndi mu undongese benu.

¹⁶ Ŋa bisu laayabisa benu nziili a Pfumu a bisu Yisu Kristo hutso matwala ma nde moosi, bisu a laasingama mu masahu ma baatu baasuunda mu buyedi bwa bo ve. Ka bisu laamono bunene bwa nde mu miisu ma bisu.

¹⁷ Mu toni ati, Taata Nzambi ava nde likinzu na muyusu, ŋa ndaha a nde yi yapali hutso mayidu ma muyusu yaleeli: «Wunuwu ni Mwana a me wu litondo, wu li mu usa kinya a me yoosi.»

¹⁸ Ndaha moyiina yamati hu yulu. Bisu mwakulu layuhi yo, ŋa bisu laaba na nde hu yulu isyelo hya ngidi.

¹⁹ Ni mu buuna, bisu lili mu usa hiitu hya bisu hyosi mu mambu ma mimbihuli. Hwafwana huli benu mu ukele mambu ma mimbihuli momiina. Mu toni ati, mambu momaana mali we mwinda wu li mu umwedeme ŋa mbuha ya pipidi. Hwadaani mu ukeele mo nate ŋa busi bu ukya, nate ŋa mvwelele a ŋa ngwali hupanduha hutso mitima mya benu.

²⁰ Yabaani hati a tsomi ti, a huli na pasi dyambu li mimbihuli myasonehe mutso mabuuku ma ngidi, li muutu hu ubindula mu matsimi ma nde mwakulu ve.

²¹ Ka, a mu litondo li imuutu baabihuli ve. Ka ni mu likumbasa li Livupu la Ngidi, baatu baatoyi mu nduhi a Nzambi.