1 Yowani 5 - Musamu wu Mubwe

Imiinu mu Mwana a Nzambi

¹ Woosi wu ubaasa imiinu ti Yisu ni Kristo, li wu Nzambi habuta. Na woosi wu atondo Nzambi Taata, atondo kaka baana ba nde habuta.

² Mu umwese ti bisu laatondo baana ba Nzambi, bisu libaatondo Nzambi na libaasiingala mikele mya nde.

³ Ni mu buuna, utondo Nzambi ni usiingala mikele mya nde. Na usiingala mikele mya nde, a huli na pasi ve.

⁴ Mu toni ati, boosi ba Nzambi habuta, bubaabiingala tsi. Na ilwanili hi bisu libaabiingala tsi, ni imiinu hya bisu.

⁵ Na ubaabiingala tsi? Ni nde wuuna, wu ubaasa imiinu ti Yisu mbuli ni Mwana a Nzambi.

⁶ Yisu Kristo ni muutu wu ayiili bisu mu iliimbu hya mamba ma tondihili a nde na makila ma lipfu la nde. Nde a hayidi ndulu na iliimbu hya mamba ve, ka na iliimbu hya mamba na hi makila. Livupu la Ngidi, lili mu uta imbangi ti liina lili la mbuli, mu toni ati Livupu ni imbuli.

⁷ Ni mu buuna, bambangi batatu bali:

⁸ Livupu, mamba na makila. Na bo babatatu bubaayuhasana mu uta imbangi imosi.

⁹ Huli mbuli ti bisu libaasiinga imbangi hya baatu. Ka imbangi hya Nzambi, hyafulala tsoongo. Imbangi mo, ni hi Nzambi ubaatiila mu mwana a nde.

¹⁰ Ni mu buuna, woosi wu usa imiinu mu Mwana a Nzambi, nde mwakulu ubaasiinga imbangi mohiina mu mutima a nde woosi. Ka muutu wu ubaavelesa imiinu mu Nzambi, ubaateele Nzambi «mupfuti». Mu toni ati, nde a hubaasiinga imbangi hi Nzambi hatiili mu Mwana a nde ve.

¹¹ Yuhaani imbangi mo ni hinihi: Nzambi aviidi bisu monyi wu bilima na bilima, na tso bisu lili na monyi mowuuna, ni mu likumbasa la Mwana a nde.

¹² Pasi muutu wu akangama mu Mwana, li na monyi. Ka pasi muutu wu avelekangama mu Mwana a Nzambi, a hali na monyi ve.

Hiitu hya baana ba Nzambi

¹³ Me miitsonehele benu muhanda mowunuwu, mana benu ba lili mu usa imiinu mu nduhi a Mwana a Nzambi, liyaba ti benu lili na monyi wu bilima na bilima.

¹⁴ Hiitu hi bisu lili na hyo huli Nzambi ni hinihi: tangu yoosi yi bisu lili mu uvondo isiha hi hyayelemene na litondo la Nzambi, nde li mu uyuhala bisu.

¹⁵ Ka bu bisu liyabi ti, Nzambi ubaayuhala bisu bu lili mu uvondo nde isiha, bisu lili kaka na hiitu, mu uyaka biina bi bisu lili mu uvondo huli nde.

¹⁶ Tso muutu li mu umono mwana a ngu a nde mu usa lisumu li libaavelebita hu lipfu li muvumu, nde afwana usambila mu mwana a ngu mowuuna, mana Nzambi ava nde monyi. Me ndi mu undeele buuna, huli boosi ba bubaasa lisumu li libaavelebita hu lipfu. Lisumu li libaabita hu lipfu lili, ka me a handi mu undeele mu usambila mu baatu ba bubaasa lisumu li libaabita hu lipfu ve.

¹⁷ Mavanga moosi ma mubaatungalala Nzambi, ni lisumu. Ka pasi lisumu a libaabita kokoo hu lipfu ve.

¹⁸ Bisu liyabi ti pasi wu Nzambi habuta, a hubaabwesumaha ve, mu toni ati Mwana a Nzambi ubaakeelese nde, na Nga bubi utwala ubwevangila nde lilibi ve.

¹⁹ Bisu liyabi ti bisu lili baana ba Nzambi, na tsi moyiniyi yoosi yili hutsina matwala ma Nga bubi.

²⁰ Bisu liyabi kaka ti, Mwana a Nzambi ayidi ŋa tsi na aviidi bisu buyedi mana bisu litsikaha Nzambi wa mbuli. Bisu lili ba baakangama mu Nzambi wa mbuli mu toni a Mwana a nde Yisu Kristo. Nde ni Nzambi wa mbuli na monyi wu bilima na bilima.

²¹ Kebaani mu usambila bifwita, baana ba me.