1 Yowani 1 - Musamu wu Mubwe

Musamu wu ubaava monyi

¹ Bisu lili mu uyaabisa benu musamu wu ubaava monyi, wu li umata mbaandu a tsi. Bisu laayuhi nde. Bisu laamoni nde mu miisu ma bisu. Bisu laakengisi nde na myoho mya bisu myabembi nde.

² Na monyi mowuuna amonihili huli baatu. Bisu kaka laamoni nde, bisu lili mu utiila nde imbangi, na bisu laalongisi benu mu toni a muutu wu ubaava monyi wu bilima na bilima. Nde wu abeedi na Taata umata beleve, na bunuubu, nde amiimonehele huli bisu.

³ Bisu lili mu ulongese benu ma bisu laamoni na laayuhi. Bisu luulongese benu mo, mana benu kaka liba ba baakangama na bisu mu itwadi hi bumwana bu bungu, hi bisu lili na hyo na Taata Nzambi na Mwana a nde Yisu Kristo.

⁴ Bisu lili mu usonehele benu mambu momanima, mana kinya a bisu yiba yi yasupahana.

Udyata mu liyalala

⁵ «Nzambi ni liyalala, na mu nde, a huli na piipidi ve». Yiina ni tsangu yi bisu laayuhi huli Yisu Kristo, yi bisu lili mu uyabisa benu.

⁶ Tso bisu libaaleele ti bisu lili itwadi na nde, ka bisu lili mu udyata mutso a piipidi, bisu lili mu upfuta mu toni ati, bisu a lili mu udyata mu imbuli ve.

⁷ Ka tso bisu lili mu udyata mutso liyalala we bu nde mwakulu Nzambi ali mutso liyalala, bisu lili itwadi bana na bana. Na makila ma Mwana a nde Yisu, mali mu utsyemese bisu mu masumu moosi.

⁸ Tso bisu lili mu uleele ti bisu a lili na masumu ve, bisu lili mu udunga bisu mwakulu. Buuna, imbuli a hili mu bisu ve.

⁹ Ka tso bisu lili mu usiinga masumu ma bisu ŋa busu bwa Nzambi, bisu laasuusa hiitu hya bisu mu nde, mu toni ati nde li wu akuha, mu unyahula masumu ma bisu na utsyemese bisu mu mamabi moosi.

¹⁰ Tso bisu lili mu uleele ti bisu a lili na masumu ve, bisu lili mu ukitusa Nzambi mupfuti, na mambu ma nde a mali mu bisu ve.