1 Timoteho 5 - Musamu wu Mubwe

Libundu ibandu hi inene

¹ A hasyembe mukuutu libundu na bukanyi, ka longese nde mu bulembo we taata a we. Longese kaka pfudu-mbahala we baana ba ngu a we.

² Longese bakaasu ba baakula we bangu ba we, na banumba we bibusi bya we, mu mutima wu atsyeme.

Bakwili mutso libundu

³ Baakinza bakwili ba bakaasu ba baavele na bakumbisi.

⁴ Tso mukwili li na baana buve batehudu, bo baafwana umaamwese ukangama hwa bo mu Nzambi, mu tso manzo ma bo, titswene ufutala mamabwe ma bo baayaki huli bataata na bangu ba bo. Maana ni ma kinya huli Nzambi.

⁵ Mukwili wu amiisaala siha vii, asusa hiitu hya nde mu Nzambi. Nde li mu ukwilala mu mapondili na masambulu huli Nzambi butsuhu na nyangu.

⁶ Ka mukwili wu ubaadyata mutso makinya ma tsi, nde amiikwa, tso bu nde ali monyi.

⁷ Mono matumili ma we afwana uva bakwili, mu uyibusa bo, mana bavelesyembe bo.

⁸ Tso muutu a hali mu ukumbasa ba ibandu hya nde mwakulu ve, fula-fula ba mu nzo a nde, nde amiituna imiinu. Buuna, nde afulala bubi na wu avelesa imiinu mu Yisu Kristo.

⁹ Mu muhanda litangu, bakwili ba bakaasu ba libundu huva likumbasa, ndulu ba baamiivyoso tungi li maku masamunu (60) ma bilima. Nde afwana uba mukwili wu akoto kwele ndulu koto limosi.

¹⁰ Baafwana utiila nde imbangi mu mavanga mamabwe, bu nde habuhisi baana ba nde, bu hakayaka baatu bubwe. Bafwana utiila nde imbangi kaka, bu hakaswaha miilu mya baatu bangidi, bu hakakumbasa banga pumbu, na bu haba hakangama mu mavanga moosi mamabwe.

¹¹ Ka uto ti bakwili ba bakini banumba, a hasonehe bo mu muhanda litangu. Mu toni ati, ŋa bo bu uba na nzala yi ubwekwele, bo bu utahuha na Kristo.

¹² Bo bavanga buuna, Nzambi utsundasa bo, bu baavelikelese lahi la nde la tsomi, li bo baasidi ŋa busu bwa nde.

¹³ Titswene, bu bo baavele na isalu hi usa, bo bubaatangila manzo ma baatu, mu ubaasaha uyiha. Ka ŋa yulu a maana, ndulu avele li isalu ve, bo bubaasa kaka lipedi li laavele a tswehi. Bo bubaakoto mu misamu mi myaveletala bo, na ubaatoyo ma bakiiveletoyo.

¹⁴ Ni mu buuna, me tondi ti bakwili ba bakini banumba, babwekwele. Hwafwana ti bo babuta baana na ubaatuma manzo ma bo, mu uveleva nzila huli ba bubaatelemene bo, mu ukusa bo.

¹⁵ Ka bakwili ba banumba bakima, baamiisobo nzila mu udukala Satana.

¹⁶ Me mbwendeele, tso mukaasu nga imiinu li na bakwili mu buli la nde, nde afwana ukumbasa bo. Nde a hafwana ususa bo ŋa myoho mi libundu ve, mu toni ati libundu laafwana ukumbasa ndulu bakwili ba siha vii.

Bakuutu mu libundu

¹⁷ Bakuutu ba libundu ba bubaatuma libundu bubwe, baahwama na pfuta yole. Hwavele uvusana ba bali na isalu hi inene hi utanga mambu ma Nzambi, na ulongese bambaahi.

¹⁸ Ma baasonehe ma Ngidi mali mu uleele: «A hadibuha munywa a ngombe wuli mu usala, mu tangu yi nde ubaadyata muhunu.» Na: «Musali afwana uyaka pfuta a nde.»

¹⁹ A hayaka mukesu mu mukuutu libundu, tso a husolihi bambangi boole buve batatu ve.

²⁰ Syembe ba bubaasa masumu ŋa busu bwa baatu boosi, mana bakuutu bakima kaka, bamono boomo.

²¹ Ŋa busu bwa Nzambi, ŋa busu bwa Yisu Kristo na ŋa busu bu bapofi ba Nzambi hasoolo, me ndabi ŋa busu bwa we mu usalila mambu momaana, hwavele burandu, tso uvelevolele bakima mileembe.

²² A habingalala usuusala muutu myoho, mu uva nde mupfuna mu libundu. Na a hasilasa masumu ma muutu mukima. We afwana uba we mwakulu wu atsyeme.

²³ Kolo ubaanywa ndulu mamba, ka baasalila mwana vinye hole mu toni ifundu hya we, na mu toni mabedu ma we.

²⁴ Masumu ma baatu bamosi, a mu ubaaswemene ve. Mo mu ubaatehele bo tswamina batsundasa bo. Ka huli bakima, masumu ma bo ubaayabana ka hu busu.

²⁵ Ni bumosi kaka, mavanga mamabwe mu ubaamonehele mawasa, na ma mavelebingalala umonehele, utwala uswemene nzyeni ve.