1 Timoteho 4 - Musamu wu Mubwe

Byosi bi Nzambi havanga bili bibibwe

¹ Livupu la Ngidi lili mu uyabisa pa yalala ti, mu tsukusu a tangu, mwana a kabu la baatu bu unyahula imiinu mu Kristo. Bo bu ukangama na mavupu ma mapfuta, na uyuha ndongisili matengo.

² Banga mapfuta mobaana, bali mu ulongese ndongisili yi muwala. Matsimi ma bo, maka we ma baamiitsuha mu itali hi hyabenge mu mbaahu. Ni mu buuna, bo bu ubweveletsikaha mamabwe na mamabi.

³ Baatu mobaana bali mu uliha baatu ukwelesene, na usa mangidi mu byudya bikima. Ka Nzambi ni wu avanga byudya mobiina, mana banga imiinu babaayaba imbuli, babaadya byo na pfutili matondo.

⁴ Byosi bi Nzambi havanga bili bibibwe. A huli na tso imosi hi ubisa ve. Pungu ati, tso bisu lidiidi, libaadya byo na pfutili matondo huli Nzambi.

⁵ Mu byudya mobiina, ni mambu ma Nzambi na lisambulu, byamiikitusa byo bya ngidi.

Uba musalili wu mubwe wa Yisu Kristo

⁶ Tso we viidi mandongi momaana huli baana ba ngu, we uba musalili wu mubwe wa Yisu Kristo. We umwese ti, baamiibungala we mu mambu ma imiinu, na mu ndongisili yimbwe yi we ayaki na bukuhu.

⁷ Ka, bisa makuma ma maavele na tsongo, na masahu ma butsudu. Hwada mu ukangama na Nzambi.

⁸ Bingana bya nyutu na tsongo mu mambu ma hole. Ka ukangama mu Nzambi, hu uli na tsongo mu moosi. Mu toni ati, huli wu akangama mu Nzambi, baamiivangila nde idiingu hya loloyi, na baamiilaha nde monyi wu bilumbu bya hu mbisa lipfu.

⁹ Monwani musamu a mbuli wu baatu boosi baafwana usiinga hwavele a paha:

¹⁰ Bisu libaasala na libaahumba, bu bisu lasuusa hiitu hya bisu mu Nzambi a monyi, wuli Muyobili a baatu boosi, fula-fula ba baakangama mu nde.

¹¹ Mono, ni liina we afwana utuma na ulongese.

¹² Muutu tso mumosi a hapenye bufudu bwa we ve. Ka hwada mu uba ifwani huli banga imiinu mu mikuma mya we, mu mbiili a we, mu litondo, mu imiinu na mu tsyemili mutima a we.

¹³ Tswamina me nza, hwada mu utangila libundu mambu ma Nzambi, mu uhwadisa lo na mu ulongese lo.

¹⁴ A habungasana hyese hi Livupu la Ngidi hi we ayaki. Hyese hi baaviidi we mu mbihulili, mu tangu yi bakuutu ba libundu baasuusili we myoho.

¹⁵ Salila maana moosi mu mutima a we, va linyutu la we mu mo, mana baatu boosi bamono ti we li mu usinzakula.

¹⁶ Kelese bubwe-bubwe nyutu a we mwakulu, na ndongisili a we, mana we kwilala mu maana moosi. We uvanga buuna, Nzambi uyobolo we na boosi ba bubaayuhala we.