1 Timoteho 2 - Musamu wu Mubwe

Lisambulu mu toni a baatu boosi

¹ Hati a tsomi, dyambu li me pondi huli we Timoteho ni linili: vondo huli Nzambi, mu masambulu ma we, mu ulembesene nde, na mu ufutala matondo huli Nzambi mu baatu boosi.

² Sambila mu toni bapfumu, na mu toni a boosi ba bali na lituma. Sambila mu bo, mana bisu a benu liba na idiingu hya hyenze hyosi hutso a mbiili yi yafwana. Ni mu mbiili a bisu a benu, lu umwese ti bisu a benu baatu ba likinzu ŋa busu bwa Nzambi.

³ Liina ni dyambu lilibwe, li Nzambi Muyobili a bisu hasilasa.

⁴ Nzambi wu tondi ti baatu boosi bayoboho na baya hu nzaabili a imbuli.

⁵ Mu mbuli, Nzambi ndulu mosi, muvolili mileembe ndulu mumosi, ŋa hati la Nzambi na baatu. Ni Yisu Kristo, muutu

⁶ wu ayehuli muvumu a nde we kodi, mu uyobolo baatu boosi mu masumu. Mu tangu yi yafwana, Nzambi amwesi Kristo we mbangi a libwe la nde.

⁷ Ni mu buuna, Nzambi hasoolo me, mu uba mulongisi na ilumbi huli ba baavele Bayudaayo. Nzambi hasoolo me, mu ulongese bo musamu wu imiinu hya mbuli. Me a ndi mu upfuta ve, ka ndulu imbuli me ndi mu undeele.

Mbiili yi yafwana huli babahala na bakaasu mu libundu

⁸ Ni mu buuna, me tondi ti babahala babaasambila kindi mbuha, na ubaasyenolo myoho mi myatsyeme, hwavele a kesi na bileedi.

⁹ Me tondi kaka ti, bakaasu babaalwata bu hwafwana. A mu toni umonehele ve, ka mu butsitu bwosi. Bakaasu a bafwana uyolo linyutu la bo mu mivanda, mu wolo, mu bilunga na milwatu mya talu ve.

¹⁰ Ka bo baafwana umwese yoli-yoli a bo, mu mavanga mamabwe. Yiina ni mbiili yi yafwana mu bakaasu ba bubaayusa Nzambi.

¹¹ Bakaasu baafwana uba «swii» mu tangu a ndongisili, na ubaayuha hutso a kulimini.

¹² Me a handi mu upa muswa huli mukaasu mu ulongese ve, buve mu uba na lituma ŋa yulu a babahala ve. Nde afwana ubaayuha.

¹³ Me ndeeli buuna, mu toni ati, tswamina Nzambi mu uvanga mukaasu Eva, nde amavanga bahala Adami.

¹⁴ Wu baasohi a Adami ve, ka mukaasu. Bu mukaasu hasiingi soho, nde abisi tumili a Nzambi.

¹⁵ Ka mukaasu hu uyoboho, ŋa nde hu ubuta baana, tso nde kwilili mu imiinu, mu litondo na mu piili linyutu, na mu umwese mbiili yi yibaava muyusu huli Nzambi.