1 Tesalonika 4 - Musamu wu Mubwe

¹ Hutsyelele, benu laayihi huli bisu mbiili yi benu lafwana uba na yo mu ubaamwese Nzambi kinya. Eye, benu laaka na mbiili moyiina. Ka bunuubu, bisu livondi na litumi benu mu ubaafulala usa buuna mu nduhi a Yisu. Vangaani bu hwafulala maana!

² Mu toni ati, benu lamiiyaaba matumili ma bisu laava benu, matumili ma maamata huli Pfumu Yisu.

³ Litondo la Nzambi ni ti, benu liba na idiingu hya ngidi na utahuha na ndyatili yi bumbembo.

⁴ Pasi muutu ŋa hati la benu ayaaba ubaatuma nyutu a nde, we bu hwafwana mu ubaadyata mu bungidi na butsitu.

⁵ A lisiinga ubwa mu mapeyu ma mavele lisuunga ve, we bu hubaasa bangoyi, ba baveleyaba Nzambi.

⁶ Mu musamu mo wunuwu, pasi muutu avelemwese mwana a ngu a nde pasi, tso uyibala nde. Nzambi yaabi usyembe pasi bubi bwa pila yiina. Bisu laamiileele benu lo, na laamiiyibusa benu mu toni a lo.

⁷ Nzambi a hateele bisu mu ukangama mu ndyatili yi yasumaha ve, ka mu uba na mbiili yi bungidi.

⁸ Ni mu buuna, pasi nde wu uveleyaka ndongisili moyiniyi, a muutu nde anyasuli ve, ka nde li mu unyasula Nzambi, wu ubaava benu Livupu la nde la Ngidi.

⁹ Mu ma mali mu utala dyambu li litondo li bumwana bu bungu, benu a lili na nzala ti basonehele benu ve. Mu toni ati Nzambi nde mwakulu amiilongese benu, buni benu laafwana ubaatondosono.

¹⁰ Buuna ni bu benu lili mu uvanga huli baana ba ngu boosi ba hu tsi a Masedonya yoosi. Ka bisu livondi benu, baana bangu, mu ubwevanga bu hwafulala bubwe.

¹¹ Hwadaani mu ubaaba mu hyenze. Nyaha pasi muutu abaaduukala ndulu misamu mi mili mu utala nde. Hwafwana huli pasi muutu mu ubaha kaluha mu isalu hya myoho mya nde mwakulu, we bu bisu laatswamini utuma benu.

¹² Buuna, ba baavele ba Kristo buuyusa mbiili a benu, na benu a libaakwamisa bana mu pasi dyambu li limiitala benu.

Nziili a Pfumu

¹³ Baana ba ngu, bisu litondi ti benu liyaaba imbuli mu toni a babaakwa. Bisu a litondi ve ti benu liba na lingebe, we baatu ba baavele na hiitu.

¹⁴ Tso bisu lili na hiitu ti Yisu akwidi na nde asuuhi ŋa hati la babaakwa, bisu lili mu usa kaka hiitu ti mu Yisu, Nzambi sa asuula boosi babaakwa.

¹⁵ Bunuubu, yuhani ma bisu liyabisi benu, we bu huli mu uleele ndongisili mosi ya Pfumu: bisu ba luusaala monyi ŋa Pfumu huuya, a luutswamina babaakwa mu mbwanini a Yisu ve.

¹⁶ Baatu buuyuha ndaha a mukuutu bapofi, na puunga a kulambeete a Nzambi. Hiina ni iliimbu hya ti, Pfumu nde mwakulu sa ayakulamana. Ba baakwidi mu Kristo sa batswamina usuuha.

¹⁷ Na titswene, bisu ba luusaala monyi mu tangu moyiina, sa bavolo bisu itwadi na bo mu mayidu, mu ubwana na Pfumu hu yulu. Na bisu sa liba na Pfumu nzyeni.

¹⁸ Ni mu buuna, hwadasanaani mu mambu momanima.