1 Tesalonika 1 - Musamu wu Mubwe

Mabwehe

¹ Ni me Pahuli, itwadi na Silaasi na Timoteho, ndi mu utsindaha muhanda mo wunuwu huli libundu la bisu Tesalonika, li lili mu Nzambi Taata na mu Pfumu Yisu Kristo. Lisyeme na hyenze biba na benu.

Imiinu na ifwani hi libundu la Tesalonika

² Bisu lili mu ufutala matondo tangu yoosi huli Nzambi mu toni a benu boosi, na libaatangula benu mu masambulu ma bisu.

³ Bisu lili mu uyibwala monyi pasi tangu ŋa busu bwa Nzambi Taata a bisu, mu toni isalu hi imiinu hya benu, isalu hi litondo la benu, na kwadili a benu mu hiitu mu Pfumu a bisu Yisu Kristo.

⁴ Baana ba ngu ba Nzambi hatondo, bisu layaaba ti benu lili ba baamisoolo,

⁵ mu toni ati ndongisili a bisu yi Musamu wu Mubwe huli benu ndulu a mu mikuma ve. Ka ndongisili a bisu yaaba yi matwala, mu itwadi hi Livupu la Ngidi, na hiitu hyosi. Benu layaaba buni mbiili a bisu yaaba ŋa hati la benu, mu libwe la benu.

⁶ Benu laduukala ifwani hya bisu na hya Pfumu. Mu tangu moyiina, benu laamono mapasi ma manono, ka benu laayaka Mambu ma Nzambi na kinya yi Livupu la Ngidi.

⁷ Na benu kaka lika ifwani mu boosi ba bali mu usa imiinu hu itanzi hya Masedonya na hu tsi a Ahayi.

⁸ Eye, isalu hya Mambu ma Pfumu ŋa hati la benu, hyaduma hu Masedonya na Ahayi. Ka hyo a hyasuka ŋaana ve. Tsangu imiinu hya benu mu Nzambi yamiitsamuha tsi yoosi. Ni mu buuna luuveletsuha mu lo.

⁹ Boosi bali mu utoyo mu nzakili yi benu laayaki bisu. Bo bali mu utoyo kaka, bu benu laakinguhi huli Nzambi. Benu laatiimbi bifwita mu usalila Nzambi wu li monyi na wu li mbuli,

¹⁰ na mu ukeele bu Mwana a nde humata hu mayulu. Ni nde Nzambi hasuuli ŋa hati la babaakwa, Yisu wu uyobolo bisu ŋa busu bwa tsyembili a Nzambi yi yili mu uya.