1 Peetelo 4 - Musamu wu Mubwe

Usobo mbiili

¹ Bu Kristo hamoni pasi mu musunya a nde, benu kaka, vangamaani bumosi we nde. Mu toni ati, wu miimono pasi mu musunya a nde, miitahuha na masumu.

² Mu tangu yi yimiisaala benu ŋa toto, a hwafwana ti benu libaadyata we bu huli mapeyu ma musunya ve, ka dyataani we bu huli litondo la Nzambi.

³ Hu tsomi, benu laavyosi tangu yindahi, mu ubaasa mavanga ma mubaava kinya huli ba baaveleyaba Nzambi. Benu laavahuli linyutu la benu mu bumbembo, mu mapeyu ma musunya, mu malaangi, mu mikungi mi udya na unywa, na ubaasambila bifwita.

⁴ Bunuubu, ba baaveleyaba Nzambi, bali mu ukimuha bu benu laabwevelepfutana na bo hutso a mbiili bumbembo yi yalendolo iteesi. Isalu hya bo aka ubaatuha benu.

⁵ Ka bo bu uva ikumbu huli wu amiivangama mu utsundasa bamonyi na babaakwa.

⁶ Ni mu buuna, Yisu hayabisi Musamu wu Mubwe pa huli babaakwa. Humbisa uyaka tsundusu yi musunya we bu huli litondo la baatu, bo bu uba monyi mu Livupu, we bu huli litondo la Nzambi.

Tsalili bungodu bwa Nzambi

⁷ Tsukusu a tsi yika bebele. Ni mu buuna, baabaani na mbiili ya tsiki na likanda, mana benu libaatwala usambila.

⁸ Hati a tsomi, baatondosonwani mu mifudi, mu toni ati, litondo libaafuha masumu mamalahi.

⁹ Baayakasanaani mu manzo ma benu, hwavele uŋono.

¹⁰ Pasi muutu ŋa hati la benu, abaasalila bungodu bu Nzambi hava nde mu ukumbasa bana. Baasaani buuna, mana benu liba bakeelisi ba babwe, ba hyese hi hilahi hya Nzambi.

¹¹ Tso muutu li na bungodu bu utoyo, nde afwana uyabisa Mambu ma Nzambi. Tso muutu li na bungodu bu usalisa bambahi, nde afwana usalila bwo na mifudi mi Nzambi ubaava nde. Saani buuna mana mu moosi, Nzambi ayaka muyusu mu Yisu Kristo, mu nde huli na muyusu na matwala mu bilima na bilima. Ameni!

Mapasi ma wa Mukristo

¹² Bambaahi ba litondo, a likimuha bu lili hutso muvitu malobese ve. A latsima ti dyambu la kimwili li lili mu uyila benu.

¹³ Ka baabaani na kinya bu lili mu umono mapasi ma Kristo hamoni, mana benu ka liluula mu kinya yindahi ŋa nde hu umonehele mu muyusu a nde huli baatu boosi.

¹⁴ Ni kinya huli benu tso baatu bali mu utuha benu bu lili bayihi ba Kristo. Mu toni ati, Livupu la Nzambi li muyusu, lili na benu.

¹⁵ A batsuundasa tso mumosi ŋa hati la benu bu nde ali mudubi ve, muyibi, muvangi a mamabi, buve mukoti a mu mambu ma bangani.

¹⁶ Ka tso bali mu utsuundasa muutu mu toni ati nde li wa Mukristo, nde anyaha umono tsonyi. Nyaha muutu mowuuna abaafutala Nzambi matondo, bu bali mu uteele nde wa Mukristo.

¹⁷ Tangu yimiito yi tsundusu yi ubandiha. Hati a tsomi, bu umaatsundasa ibandu hya Nzambi. Ka tso tsundusu yibandihi mu bisu baatu ba Nzambi, buni tsukusu yi uba, ŋa tsundusu yi ubwa ŋa yulu a ba bali mu uvelesa hiitu mu Musamu wu Mubwe wa Nzambi?

¹⁸ We bu mabaasonehe mali mu uleele: «Tso hu li pasi mu mutsiitsa mu uyoboho, sa ufula pasi mu nga mavanga mamabi na mu nga masumu»

¹⁹ Ni mu buuna, nyaha ba bali mu umono pasi we bu hu li litondo la Nzambi, babaahwada mu ubaasa mavanga mamabwe. Bo baafwana ubaayeholo idiingu hya bo huli Muvangi a bo, wu li wu akuha mu malahi ma nde.