1 Peetelo 1 - Musamu wu Mubwe

Mabwehe

¹ Me Peetelo, ilumbi hya Yisu Kristo. Me ndi mu utsindaha muhanda mowunuwu, huli ba Nzambi hasoolo na ba baamiilalaana hu tsi bumwenyi, ba bali mu bitanzi bya Pooti, Ngalatiya, Kapadosi, mu matsi ma Asiya, na Bitiniya.

² Taata Nzambi atswamini usoolo benu, we bu huli matsimi ma nde. Nde miikitusa benu ibandu hya ngidi, mu likumbasa li Livupu la nde. Nde hasiidi buuna, mana benu lisiingala Yisu Kristo, na makila ma nde ma maapuhimi matsyemese benu. Nyaha Nzambi asyeme benu na ava benu hyenze hi hyafulala.

Hiitu hi liyobolo

³ Ba wu baasyeme Nzambi, Taata a Pfumu a bisu Yisu Kristo! Mu bunene bwa kwili a nde lingebe, nde amiiva bisu monyi wu munyatihi, mu tsuuhili a Yisu Kristo ŋa hati la babaakwa. Nde hasiidi buuna, mana bisu liba na hiitu hi hili monyi.

⁴ Tso bisu lili na hiitu mohiina, bisu sa liyaka mukobe wu Nzambi hamiiswehele baatu ba nde. Mukobe mowuuna wu buuveleduba, wu buuvelesa mbindu, ka nde afwana ukeelese umwedeme hwa nde. Nzambi amiiswehele benu nde hu mayulu.

⁵ Mu toni ati, Nzambi li nga matwala. Nde ubaakeelese benu bubwe-bubwe mu imiinu hya benu mu Yisu Kristo. Tangu a tsukusu aka bebele, tangu yi Nzambi humwese liyobolo la benu.

⁶ Ni mu buuna, tso mapasi ma pila mu pila mali mu umwese benu lingebe mu mwana a tangu hole, benu laaluula mu kinya.

⁷ Mapasi momaana, mali mu umwese imbuli hi imiinu hya benu. Wolo utwala ubiiya, ka bubaabwaha lo hu mbaahu, mu umono tso lo lili lilibwe. Ni bumosi kaka mu imiinu hya benu. Hyo hyafulala wolo talu, ka hyo kaka bubaalobese. Buukete imiinu hya benu mu umono tso hyo hili hihibwe. Titswene, ilumbu Yisu Kristo hu uyamonehele, benu sa liyaka muyusu, likinzu na butsitu.

⁸ Benu laatondo Yisu, tso bu benu laavelemono nde. Benu libaasiila nde imiinu, tso bu benu laamaavelemono nde. Ni mu toni imiinu hya benu mu nde, benu lili mu kinya yi yafulala, yi muyusu, yi bu uveletwala uyelemese.

⁹ Benu lili mu kinya moyiina, mu toni ati, mivumu mya benu sa miyoboho. Wuuna ni musyendo wu imiinu hya benu, mu Yisu Kristo.

¹⁰ Mimbihuli myasahi utsikaha mu bungeele bwosi, liyobolo moliina. Myo myabihuli mu mamali mu utala hyese hi Nzambi haswehili benu.

¹¹ Livupu la Kristo laaba mu bo, lo laayabisi bo manzuhu ma Kristo hu umono na muyusu wu uya humbisa a mo. Bo baasahi uyaba ki tangu na buni mo mu utwala uvangama.

¹² Mambu ma Nzambi hayabisi bo ni manima: malumbi ma bo baakatoosele, a maba mu toni a bo ve, ka mu toni a benu. Bunuubu, ba bali mu uyabisa Musamu wu Mubwe, baatoosili benu malumbi momaana mu matwala ma Livupu la Ngidi, libaatsindihi umata hu yulu. Bapofi bo mwakulu kaka, bubaatoondo uyaba mambu momaana.

Mbiili bungidi

¹³ Ni mu buuna, vangamaani! Baani likanda! Saani hiitu hya benu hyosi mu hyese hi Nzambi huva benu, ŋa Yisu Kristo huyamonehele.

¹⁴ Singalaani Nzambi bu benu lili baana ba nde. Na a likangama mu mapeyu mamabi ma benu laaba na mo tsikulu ve, ŋa benu laaba kini hutso budimbu.

¹⁵ Ka baani baatu bangidi mu mbiili a benu yoosi, we bu Nzambi wu ateele benu ali wa ngidi.

¹⁶ Ni mubuuna, ma baasonehe mali mu uleele: «Baani bangidi, mu toni ti me ndi wa ngidi.»

¹⁷ Mu masambulu ma benu, benu libaateele Nzambi: «Taata». Ni nde wuuna wu avelesa lisobosono la baatu. Ka nde ubaatsundasa pasi muutu mu mavanga ma nde. Ni mu buuna, mu tangu yi yimiisala benu mu uvyoso ŋa toto we byenyi, baani na boomo bwa Nzambi mu mbiili a benu.

¹⁸ Benu liyabi mu ki talu Nzambi hafuti mu uyobolo benu mu idiingu hi hyavele a tsongo. Ni mbiili yi yavyasaana yina, yi bakaaha ba benu baalongisi benu. Nzambi a hafuti yo mu biloho bi bibaabiya we mbongo na woolo ve.

¹⁹ Naana, Nzambi ayobili benu mu makila ma talu ma Kristo, ŋa baayehuli na baadubi nde we mwana limeme li lavele ipiha na todi, li baaviidi bungodu huli Nzambi.

²⁰ Nzambi asooli nde tswamina paangili a tsi, na mu libwe la benu, nde ayabisi benu Kristo mu tangu mo ya tsyelele yi.

²¹ Mu nde benu lili mu usa imiinu mu Nzambi wu asuula nde ŋa hati la babaakwa, na wu ava nde muyusu. Ni mu buuna, benu libaasa imiinu na hiitu mu Nzambi.

²² Benu limiitsyeme bu benu limiisiingala imbuli, limiitondosono hwavele muwala. Ni mu buuna, tondosonwani mu mifudi na mu mutima mumosi.

²³ Baamiibuta benu buta li linyatihi. A mu muhunu wu ubaakwa ve, ka mu muhunu wu avelekwa. Muhunu mowuuna, ni mambu ma Nzambi ma monyi, ma bilima na bilima.

²⁴ Mu toni ati, baasonehe: «Baatu boosi bali we himbu, na muyusu a bo li we ifulu hi matsyehe. Bu himbu himiikanya, ifulu himiibwa,

²⁵ ka mambu ma Pfumu mubaakwilala tangu yoosi.» Mambu mo ni Musamu wu Mubwe wu baayabisi benu.