Romanos 7 - Triqui de San Juan Copala

Quisíj canocoꞌ níꞌ stucua̱nj Moisés, ne̱ caꞌne̱j nimán níꞌ quiꞌya̱j níꞌ se‑su̱u̱n Yaꞌanj a

¹ Dan me se a̱j neꞌen nij soj da̱j vaa stucua̱nj Moisés, tinu̱j, nocoj. Cheꞌé dan neꞌen soj se vaa ne nó xcúún nij síí caviꞌ canoco̱ꞌ nij soꞌ tucuáán yoꞌ maꞌ.

² Ne̱ dan me se sese vaa nica̱ chana̱, ne̱ ca̱yáán noꞌ ga̱ nica̱ noꞌ, taj nana̱ cataj xnaꞌanj Yaꞌanj rihaan Moisés ga̱a naá a. Tza̱j ne̱ sese cavi̱ꞌ nica̱ chana̱, ne̱ caꞌve̱e caꞌa̱nj noꞌ xca̱j noꞌ ꞌó snóꞌo a.

³ Tza̱j ne̱ sese ya̱nj nica̱ chana̱ ne̱ xca̱j chana̱ ꞌó snóꞌo, ne̱ tumé ndoꞌo noꞌ cacunꞌ, tza̱j ne̱ sese caviꞌ nica̱ chana̱, ne̱ caꞌve̱e xca̱j chana̱ ꞌó snóꞌo, ne̱ né cacu̱nꞌ me yoꞌ ga̱a maꞌ.

⁴ Ne̱ ase vaa chana̱ caviꞌ nica̱ roꞌ, da̱nj vaa maꞌa̱n níꞌ, tinu̱j, nocoj. ꞌO̱ se cheꞌé se caviꞌ Cristó roꞌ, cheꞌé dan quisíj canocoꞌ níꞌ stucua̱nj Moisés na̱nj á. Ne̱ cunuu iꞌna̱ꞌ uún Cristó, ne̱ canocoꞌ níꞌ man soꞌ, ne̱ cheꞌé dan uun nucua̱j níꞌ ꞌyaj níꞌ suun sa̱ꞌ cheꞌé Yaꞌanj a.

⁵ Ga̱a nocoꞌ níꞌ stucua̱nj Moisés ga̱a rque̱, ne̱ guun ndoꞌo rá níꞌ cuno̱ níꞌ rihaan Yaꞌanj, tza̱j ne̱ ne gu̱un nucua̱j níꞌ cuno̱ níꞌ maꞌ. Ma̱an se tana̱nj a̱ guun doj rá níꞌ quiꞌya̱j níꞌ cacunꞌ, ga̱a ne̱ doj a̱ vaa cacunꞌ quiꞌyaj nee̱ man níꞌ, ne̱ cheꞌé dan vaa güii cavi̱ꞌ nu̱ꞌ nimán níꞌ vaa na̱nj ado̱nj.

⁶ Dan me se ga̱a naá canocoꞌ uxrá níꞌ tucuáán yoꞌ tucuáán no̱ rihaan yanj, ne̱ no̱ xcúún níꞌ canoco̱ꞌ níꞌ tucuáán yoꞌ, rá níꞌ ga̱a rque̱, tza̱j ne̱ ya̱j nihánj me se taj cheꞌé canoco̱ꞌ níꞌ tucuáán yoꞌ a̱ maꞌ. ꞌO̱ se a̱j cunuu sa̱ꞌ nimán níꞌ, ne̱ racuíj Nimán Yaꞌanj man níꞌ quiꞌya̱j níꞌ se‑su̱u̱n Yaꞌanj cuano̱ ado̱nj.

Cheꞌé stucua̱nj Moisés xcaj níꞌ cuentá se vaa tumé níꞌ cacunꞌ, tza̱j ne̱ ne nuu sa̱ꞌ nimán níꞌ ꞌyaj tucuáán yoꞌ maꞌ

⁷ Guun rá níꞌ se vaa tucua̱nj chiꞌi̱i̱ me stucua̱nj Moisés naꞌ. Taj a̱ doj maꞌ. ꞌO̱ se stucua̱nj Moisés yoꞌ quiꞌyaj dan caꞌvee xcaj ꞌu̱nj cuentá me se uun cacunꞌ a. Dan me se ga̱a naá cataj Yaꞌanj se vaa naꞌvej rá Yaꞌanj gu̱un rá níꞌ siꞌyaj tuviꞌ níꞌ, ne̱ veé dan me se xcaj ꞌu̱nj cuentá se vaa tana̱nj a̱ guun ndoꞌo raj siꞌyaj tuvij ga̱a queneꞌén ꞌu̱nj tucuáán yoꞌ, ne̱ da̱nj ina̱nj vaa nimanj na̱nj á.

⁸ Veé dan me se xcaj ꞌu̱nj cuentá da̱j vaa suun caꞌneꞌ Moisés rihaan níꞌ, ga̱a ne̱ guun cheꞌe̱j guun ndoꞌo raj doj a̱ qui̱ꞌyáj cacunꞌ a. Sese nuviꞌ tucuáán canoco̱ꞌ níꞌ, ne̱ ne uun rá níꞌ quiꞌya̱j níꞌ cacunꞌ asuun tza̱j maꞌ.

⁹ Ne̱ asi̱j ataa nari̱ꞌ ꞌu̱nj stucua̱nj Moisés, ne̱ guun raj se vaa sa̱ꞌ quiꞌyáj, tza̱j ne̱ narij stucua̱nj Moisés, ga̱a ne̱ guun cheꞌe̱j guun raj qui̱ꞌyáj cacunꞌ a. Nda̱a síj, ga̱a ne̱ quiriꞌ nu̱ꞌ nimanj na̱nj ado̱nj.

¹⁰ Sese cuno̱ yuvii̱ nu̱ꞌ stucua̱nj Moisés, ne̱ veꞌé uxrá ca̱yáán nij yuvii̱, ne̱ cheꞌé dan vaa tucuáán yoꞌ, tza̱j ne̱ ꞌu̱nj nihánj me se da̱j doj se quiriꞌ nu̱ꞌ nimanj, quiꞌyaj tucuáán yoꞌ ado̱nj.

¹¹ Dan me se ga̱a narij stucua̱nj Moisés, ne̱ guun raj ca̱nocoj nu̱ꞌ tucuáán yoꞌ, ne̱ cavi̱i̱ sa̱ꞌ ꞌu̱nj, quiꞌya̱j tucuáán yoꞌ, raj a. Tza̱j ne̱ tana̱nj a̱ guun chiꞌi̱i̱ ndoꞌo doj raj, quiꞌyaj cacunꞌ ꞌni̱j nimanj, ne̱ tihaꞌ yuꞌunj cacunꞌ yoꞌ manj, ne̱ cheꞌé dan doj a̱ quiꞌyáj cacunꞌ, ne̱ quiriꞌ nu̱ꞌ nimanj na̱nj ado̱nj.

Naꞌvee canoco̱ꞌ níꞌ stucua̱nj Moisés, cheꞌé se uun chij cacunꞌ rihaan nee̱ man níꞌ a

¹² Dan me se gue̱e̱ uxrá stucua̱nj Moisés, ne̱ gue̱e̱ do̱ꞌ, nica̱ do̱ꞌ, cuna̱j uxrá do̱ꞌ, vaa ꞌo̱ ꞌo̱ suun caꞌneꞌ soꞌ na̱nj á.

¹³ ꞌU̱nj me se quiriꞌ nimanj quiꞌyaj stucua̱nj Moisés tucuáán sa̱ꞌ, rá nij soj naꞌ. Taj maꞌ. Ma̱an se cheꞌé cacunꞌ quiꞌyáá ꞌu̱nj me quiriꞌ nimanj na̱nj á. Ga̱a cunoj nij suun caꞌneꞌ Moisés rihaan níꞌ, ne̱ guun cheꞌe̱j quiꞌyáj cacunꞌ, ne̱ queꞌe̱e̱ ndoꞌo cacunꞌ quiꞌyáj, ga̱a ne̱ xcaj ꞌu̱nj cuentá se vaa ma̱n ndoꞌo cacunꞌ nimanj a.

¹⁴ Neꞌen níꞌ se vaa nana̱ caꞌmii Nimán Yaꞌanj me stucua̱nj Moisés, tza̱j ne̱ yuvii̱ u̱u̱n mej, ne̱ ina̱nj cacunꞌ neꞌenj qui̱ꞌyáj a.

¹⁵ Ne neꞌenj da̱j me cheꞌé me ꞌyáá ꞌu̱nj da̱nj maꞌ. Dan me se me raj qui̱ꞌyáj se sa̱ꞌ, tza̱j ne̱ ina̱nj cacunꞌ ꞌyáj, ne̱ se chiꞌi̱i̱ naꞌvej raj qui̱ꞌyáj roꞌ, ꞌyáj na̱nj ado̱nj.

¹⁶ Chiꞌi̱i̱ vaa cacunꞌ ꞌyáj, raj, ne̱ dan me se neꞌén ꞌu̱nj se vaa sa̱ꞌ vaa stucua̱nj Moisés a.

¹⁷ Dan me se né ma̱ꞌanj ꞌyaj cacunꞌ maꞌ. Tza̱j ne̱ uun chij ndoꞌo cacunꞌ rque nee̱ manj, ne̱ cheꞌé dan ꞌyáj cacunꞌ a.

^18-19 Neꞌenj se vaa taj se ꞌyáꞌ quiꞌya̱j nee̱ manj se sa̱ꞌ maꞌ. Dan me se me raj qui̱ꞌyáj se sa̱ꞌ, tza̱j ne̱ naꞌvee quiꞌya̱j nee̱ manj se sa̱ꞌ maꞌ. Ne̱ se chiꞌi̱i̱ naꞌvej raj qui̱ꞌyáj roꞌ, ꞌyáj, ꞌyaj nee̱ manj ado̱nj.

²⁰ Cheꞌé dan me taj ꞌu̱nj se vaa ne ꞌyaj ma̱ꞌanj se chiꞌi̱i̱ maꞌ. ꞌO̱ se uun chij ndoꞌo cacunꞌ rque nee̱ manj, ne̱ cheꞌé dan ina̱nj nee̱ manj ꞌyaj se chiꞌi̱i̱ yoꞌ a.

²¹ Me raj qui̱ꞌyáj se sa̱ꞌ uun rá Yaꞌanj, tza̱j ne̱ naꞌvee qui̱ꞌyáj da̱nj maꞌ. ꞌO̱ se tana̱nj ina̱nj ꞌnaꞌ cacunꞌ rihanj a.

²² Neꞌenj se vaa sa̱ꞌ uxrá vaa stucua̱nj Moisés,

²³ tza̱j ne̱ me ndoꞌo rá nee̱ manj quiꞌya̱j yoꞌ cacunꞌ, ne̱ naꞌvej nee̱ manj cuno̱ yoꞌ rihaan Yaꞌanj maꞌ. Ina̱nj tucuáán chiꞌi̱i̱ me rá nee̱ manj canoco̱ꞌ yoꞌ ado̱nj. Dan me se naꞌvej raj qui̱ꞌyáj cacunꞌ, tza̱j ne̱ nee̱ manj ina̱nj me rá se vaa qui̱ꞌyáj cacunꞌ a.

²⁴ Dan me se ni̱quej, raj na̱nj á. Ina̱nj cacunꞌ ꞌyaj nee̱ manj, ne̱ cheꞌé dan quiri̱ꞌ nu̱ꞌ nimanj, ne̱ vaa güii caꞌa̱nj ꞌu̱nj rihaan yaꞌan, quiꞌya̱j nee̱ manj asuun na̱nj ado̱nj. Ne̱ me síí ti̱nanii manj rihaan nee̱ manj, rá soj ga̱.

²⁵ ꞌO̱ se guun niꞌya̱j ndoꞌo níꞌ rihaan Yaꞌanj se vaa tinanii Jesucristó Si̱j ꞌNi̱j Raꞌa man níꞌ manj rihaan sayuun yoꞌ ado̱nj. Dan me se xa̱ꞌ ma̱ꞌanj, tza̱j ne̱ noco̱ꞌ uxrá ma̱ꞌanj stucua̱nj Yaꞌanj, tza̱j ne̱ xa̱ꞌ nee̱ manj, tza̱j ne̱ ina̱nj se chiꞌi̱i̱ ꞌyaj nee̱ manj a.