Romanos 4 - Triqui de San Juan Copala

Nataꞌ Pabló da̱j quiꞌyaj Abraham, ne̱ cunuu sa̱ꞌ soꞌ rihaan Yaꞌanj a

¹ Síí cuꞌna̱j Abraham me se xi̱i níꞌ si̱j israelitá me soꞌ ga̱a naá, ne̱ neꞌen níꞌ se vaa né cheꞌe̱ se vaa quiꞌyaj maꞌa̱n soꞌ me cunuu sa̱ꞌ nimán soꞌ maꞌ.

² ꞌO̱ se ne nó xcúún Abraham cata̱j Abraham se vaa ma̱an cheꞌé se sa̱ꞌ quiꞌyaj soꞌ, cheꞌé dan cunuu sa̱ꞌ nimán soꞌ quiꞌyaj Yaꞌanj maꞌ. Neꞌen Yaꞌanj se vaa ne ya̱ vaa nana̱ yoꞌ maꞌ.

³ Ma̱an se maꞌa̱n Danj Yaꞌanj taj a: “Cuchumán rá Abraham niꞌya̱j soꞌ Yaꞌanj, ne̱ cheꞌé dan cataj Yaꞌanj se vaa si̱j cunuu sa̱ꞌ nimán me Abraham a.” Ina̱nj da̱nj aꞌmii Danj Yaꞌanj na̱nj ado̱nj.

⁴ Dan me se sese ꞌo̱ mozó ꞌyaj suun rihaan ꞌo̱ ruꞌvee, ne̱ na̱ruꞌvee ruꞌvee rihaan mozó yoꞌ, ne̱ no̱ xcúún mozó yoꞌ quiꞌya̱j canaán soꞌ tuꞌvee soꞌ a.

⁵ Tza̱j ne̱ sese ne ꞌyaj suun yuvii̱ rihaan Yaꞌanj, tza̱j ne̱ tana̱nj amán rá yuvii̱ niꞌya̱j yuvii̱ Yaꞌanj se vaa caꞌve̱e tinavi̱j Yaꞌanj cacunꞌ tumé yuvii̱, ne̱ cheꞌé dan taj Yaꞌanj se vaa síí sa̱ꞌ nimán me yuvii̱ yoꞌ na̱nj ado̱nj.

⁶ ꞌO̱ cuya̱a̱n vaa nana̱ aꞌmij nihánj ga̱ nana̱ caꞌmii rey cuꞌna̱j David ga̱a naá ga̱a cataj xnaꞌanj David se vaa niha̱ꞌ rá yuvii̱ tinavij maꞌa̱n Yaꞌanj cacunꞌ xráá, tza̱j ne̱ né cheꞌe̱ se sa̱ꞌ ꞌyaj nij yuvii̱ me tinavij Yaꞌanj cacunꞌ xráá nij soꞌ maꞌ. Cataj David a:

⁷ Cavii sa̱ꞌ síí navij nu̱ꞌ scacu̱nꞌ quiꞌyaj Yaꞌanj na̱nj á. Nu̱ꞌ se qui̱j quiꞌyaj soꞌ roꞌ, niꞌyón Yaꞌanj man yoꞌ na̱nj ado̱nj.

⁸ Cavii sa̱ꞌ soꞌ, ne̱ neꞌen soꞌ se vaa a̱ doj cacunꞌ se̱ cutaꞌ uún Yaꞌanj xráá soꞌ a̱ maꞌ. Da̱nj taj David ga̱a naá a.

⁹ Na̱nj nij yuvii̱ israelitá yuvii̱ ataꞌ taꞌngaꞌ man me avii sa̱ꞌ rihaan Yaꞌanj, rá soj naꞌ. Nda̱a nij yuvii̱ yaníj yuvii̱ nuviꞌ taꞌngaꞌ ataꞌ man avii sa̱ꞌ uún rihaan Yaꞌanj, rá soj xa̱ꞌ. ꞌO̱ se a̱j neꞌen níꞌ se vaa taj Danj Yaꞌanj se vaa cuchumán rá Abraham niꞌya̱j soꞌ Yaꞌanj, ne̱ cheꞌé dan cataj Yaꞌanj se vaa si̱j cunuu sa̱ꞌ nimán me soꞌ a.

¹⁰ Dan me se cataj Yaꞌanj se vaa navij cacunꞌ tumé Abraham yoꞌ, cheꞌé se cuchumán rá soꞌ niꞌya̱j soꞌ Yaꞌanj, ne̱ da̱j si̱j me Abraham ga̱a caꞌmii Yaꞌanj da̱nj, rá soj ga̱. Si̱j cataꞌ taꞌngaꞌ man me soꞌ, rá soj naꞌ. Taj maꞌ. ꞌO̱ se da̱nj caꞌmii Yaꞌanj ga̱a ataa cata̱ꞌ taꞌngaꞌ man soꞌ na̱nj ado̱nj.

¹¹ Cachén queꞌe̱e̱ yoꞌ caꞌmii Yaꞌanj da̱nj cheꞌé soꞌ, ga̱a ne̱ cutaꞌ maꞌa̱n soꞌ taꞌngaꞌ man soꞌ, ne̱ tihaa̱n soꞌ rihaan nij yuvii̱ ma̱n rihaan chumii̱ se vaa a̱j tinavij ya̱ Yaꞌanj cacunꞌ xráá soꞌ a. Dan me se guun soꞌ xi̱i cunuda̱nj nij yuvii̱ nuu sa̱ꞌ nimán rihaan Yaꞌanj yuvii̱ ne ataꞌ taꞌngaꞌ man, ne̱ ase vaa quiꞌyaj Abraham roꞌ, da̱nj ꞌyaj uún nij soꞌ a. Dan me se cuchumán rá Abraham niꞌya̱j soꞌ Yaꞌanj ga̱a ataa cata̱ꞌ taꞌngaꞌ man soꞌ, ne̱ da̱nj ꞌyaj nij síí yaníj uún a.

¹² Ne̱ xi̱i nij yuvii̱ ataꞌ taꞌngaꞌ man me uún soꞌ, sese ya̱ noco̱ꞌ nij soꞌ tucuáán noco̱ꞌ maꞌa̱n soꞌ, ne̱ dan me se cuchuma̱n rá nij soꞌ ni̱ꞌyaj nij soꞌ Yaꞌanj, ne̱ tuviꞌ Abraham gu̱un nij soꞌ a. Dan me se xi̱i níꞌ me Abraham, sese quiꞌya̱j níꞌ nda̱a vaa quiꞌyaj soꞌ ado̱nj.

Cuchumán rá Abraham cuno soꞌ nana̱ caꞌmii Yaꞌanj rihaan soꞌ a

¹³ Dan me se neꞌen níꞌ se vaa cataꞌ tuꞌva Yaꞌanj rihaan síí cuꞌna̱j Abraham se vaa vaa güii, ne̱ ni̱caj yuꞌunj maꞌa̱n Abraham do̱ꞌ, ni̱caj yuꞌunj nij taꞌníí taꞌnij siꞌno̱ Abraham do̱ꞌ, man nu̱ꞌ chumii̱, ne̱ dan me se ya̱ ya̱ gu̱un yoꞌ toꞌóó nij soꞌ, cataj Yaꞌanj rihaan Abraham, ne̱ né cheꞌe̱ se canocoꞌ Abraham nu̱ꞌ stucua̱nj Moisés me caꞌmii Yaꞌanj da̱nj rihaan Abraham maꞌ. ꞌO̱ se a̱j cuchumán rá soꞌ cuno soꞌ nana̱ caꞌmii Yaꞌanj rihaan soꞌ, ne̱ cheꞌé dan cunuu sa̱ꞌ nimán soꞌ rihaan Yaꞌanj, ne̱ cheꞌé dan me cataj xnaꞌanj Yaꞌanj rihaan soꞌ se vaa ya̱ ya̱ ni̱caj yuꞌunj soꞌ man nu̱ꞌ chumii̱ ado̱nj.

¹⁴ ꞌO̱ se sese ina̱nj nij síí guun nucua̱j quiꞌya̱j nu̱ꞌ stucua̱nj Moisés me nij síí ni̱caj yuꞌunj chumii̱, ne̱ taj se gúnꞌ se vaa cuchuma̱n rá níꞌ nana̱ cataꞌ tuꞌva Yaꞌanj rihaan Abraham a̱ maꞌ.

¹⁵ ꞌO̱ se xa̱ꞌ stucua̱nj Moisés, tza̱j ne̱ taj a̱ ꞌó síí uun nucua̱j quiꞌya̱j nu̱ꞌ tucuáán yoꞌ, ne̱ cheꞌé dan ꞌyaj Yaꞌanj sayuun man yuvii̱, ꞌyaj tucuáán yoꞌ ado̱nj. Tza̱j ne̱ sese nuviꞌ tucuáán vaa da̱nj noco̱ꞌ yuvii̱, ne̱ taj cacunꞌ tumé nij yuvii̱ cheꞌé tucuáán yoꞌ maꞌ.

¹⁶ Cheꞌé dan cunuda̱nj níꞌ si̱j amán rá niꞌya̱j man Yaꞌanj roꞌ, me nij síí ni̱caj yuꞌunj man chumii̱, ne̱ veé dan me se lu̱j quiꞌya̱j Yaꞌanj cheꞌé níꞌ me yoꞌ, ga̱a ne̱ caꞌve̱e quisi̱j ya̱ nu̱ꞌ nana̱ cataꞌ tuꞌva Yaꞌanj cheꞌé ta̱ranꞌ níꞌ a. Dan me se né ina̱nj nij síí gu̱un nucua̱j quiꞌya̱j nu̱ꞌ stucua̱nj Moisés me nij síí cavi̱i̱ sa̱ꞌ da̱nj maꞌ. Tana̱nj cavi̱i̱ sa̱ꞌ ta̱ranꞌ níꞌ si̱j amán rá niꞌya̱j man Yaꞌanj, nda̱a vaa quiꞌyaj Abraham ado̱nj. ꞌO̱ se xi̱i ta̱ranꞌ níꞌ me soꞌ ado̱nj.

¹⁷ ꞌO̱ se Danj Yaꞌanj taj se vaa cuneꞌ Yaꞌanj man soꞌ gu̱un soꞌ xi̱i queꞌe̱e̱ ndoꞌo xꞌneꞌ yuvii̱ aꞌmii ꞌo̱ ꞌo̱ xnaꞌánj a. Da̱nj taj Danj Yaꞌanj cheꞌé soꞌ, ne̱ dan me se xi̱i níꞌ me soꞌ rihaan Yaꞌanj á. ꞌO̱ se cuchumán rá soꞌ niꞌya̱j soꞌ Yaꞌanj, ne̱ Yaꞌanj roꞌ, me síí ꞌyaj nuu iꞌna̱ꞌ uún nij síí caviꞌ, ne̱ Yaꞌanj me síí aꞌmii cheꞌé rasu̱u̱n ataa curuvi̱ꞌ rihaan chumii̱ nihánj, ne̱ taj soꞌ se vaa a̱j guun nij rasu̱u̱n na̱nj ado̱nj.

¹⁸ Ne̱ nucua̱j ya̱ rá Abraham man Yaꞌanj se vaa ga̱a̱ taꞌníí soꞌ, quiꞌya̱j Yaꞌanj, tza̱j ne̱ ne queneꞌe̱n soꞌ da̱j me quiꞌya̱j Yaꞌanj ne̱ ga̱a̱ taꞌníí soꞌ maꞌ. Ma̱an se cuchumán rá soꞌ cuno soꞌ nana̱ caꞌmii Yaꞌanj rihaan soꞌ, ga̱a ne̱ guun soꞌ xi̱i queꞌe̱e̱ ndoꞌo xꞌneꞌ yuvii̱ ino̱ vaa stucua̱nj ado̱nj. ꞌO̱ se a̱j cataj Yaꞌanj rihaan soꞌ se vaa ga̱a̱ ndoꞌo taꞌníí taꞌnij siꞌno̱ soꞌ, ne̱ veé da̱nj quiꞌyaj gue̱e̱ Yaꞌanj ga̱ soꞌ ado̱nj.

¹⁹ Dan me se quisíj soꞌ ꞌo̱ cientó yoꞌ, ne̱ taj va̱j taꞌníí soꞌ, tza̱j ne̱ ne quiri̱ꞌ rá soꞌ cheꞌé se chii nga̱ me soꞌ ne̱ chana̱ itu̱un me nica̱ soꞌ chana̱ cuꞌna̱j Sará maꞌ. ꞌO̱ se ꞌo̱ cuchumán rá soꞌ neꞌen soꞌ Yaꞌanj na̱nj ado̱nj.

²⁰ Ne gu̱un vi̱j rá soꞌ cheꞌé nana̱ cataꞌ tuꞌva Yaꞌanj rihaan soꞌ maꞌ. Tana̱nj cuchumán ndoꞌo doj rá soꞌ niꞌya̱j soꞌ Yaꞌanj, ga̱a ne̱ nariꞌ nucuaj doj nimán soꞌ a. Cataj soꞌ se vaa sa̱ꞌ uxrá vaa Yaꞌanj,

²¹ ne̱ amán ya̱ rá soꞌ se vaa gu̱un nucua̱j Yaꞌanj quiꞌya̱j Yaꞌanj cunuda̱nj se vaa cataꞌ tuꞌva Yaꞌanj a.

²² Cheꞌé dan me cataj Yaꞌanj a: “Si̱j sa̱ꞌ nimán me Abraham a.” Da̱nj caꞌmii Yaꞌanj cheꞌé soꞌ,

²³ tza̱j ne̱ né cheꞌe̱ o̱rúnꞌ Abraham aꞌmii nana̱ yoꞌ nana̱ no̱ rihaan Danj Yaꞌanj maꞌ.

²⁴ ꞌO̱ se cheꞌé maꞌa̱n níꞌ no̱ nana̱ yoꞌ rihaan Danj Yaꞌanj uún, cheꞌé se si̱j amán rá niꞌya̱j man Yaꞌanj me níꞌ uún, ne̱ dan me se a̱j cataj Yaꞌanj se vaa si̱j sa̱ꞌ nimán me maꞌa̱n níꞌ uún ado̱nj. Ne̱ amán rá níꞌ se vaa cunuu iꞌna̱ꞌ uún Jesús Si̱j ꞌNi̱j Raꞌa man níꞌ quiꞌyaj Yaꞌanj á.

²⁵ Dan me se caꞌvej rá Yaꞌanj cavi̱ꞌ Jesús cheꞌé cacunꞌ quiꞌyaj níꞌ, ne̱ cunuu iꞌna̱ꞌ uún soꞌ, quiꞌyaj Yaꞌanj, cheꞌé yan cunu̱u sa̱ꞌ nimán níꞌ rihaan maꞌa̱n Yaꞌanj ado̱nj.