Romanos 16 - Triqui de San Juan Copala

Veꞌé cuma̱n nij síí noco̱ꞌ man Cristó ya̱nj chumanꞌ Romá, rá Pabló a

¹ Me rá ꞌu̱nj queneꞌe̱n nij soj se vaa cuchi̱ꞌ raꞌvij níꞌ chana̱ cuꞌna̱j Febe rihaan nij soj a. Níí nica̱j suun rihaan Yaꞌanj ra̱cuíj man xꞌneꞌ nij síí noco̱ꞌ man Cristó nij síí ya̱nj chumanꞌ cuꞌna̱j Cencrea me noꞌ a.

² Veꞌé caꞌmi̱i̱ nij soj ga̱ chana̱ cuꞌna̱j Febe ga̱a cuchi̱ꞌ noꞌ rihaan nij soj cheꞌé se níí noco̱ꞌ man Síí ꞌNi̱j Raꞌa man níꞌ me noꞌ á. ꞌO̱ se veé da̱nj no̱ xcúún níꞌ quiꞌya̱j níꞌ ga̱ nij síí noco̱ꞌ man Cristó chugua̱nj. ꞌO̱ se racuíj noꞌ man queꞌe̱e̱ ndoꞌo yuvii̱, ne̱ racuíj noꞌ man ma̱ꞌanj, ne̱ cheꞌé dan sese vaa se cachi̱in man noꞌ, ne̱ ra̱cuíj soj man noꞌ á.

³ Cata̱j soj rihaan chana̱ cuꞌna̱j Priscila do̱ꞌ, rihaan síí cuꞌna̱j Aquila do̱ꞌ, se vaa veꞌé ca̱yáán ro̱j soꞌ, raj á. ꞌO̱ se quiꞌyaj ro̱j soꞌ se‑su̱u̱n Cristó Jesús ga̱j a.

⁴ Dan me se caꞌnéé nimán ro̱j soꞌ cavi̱ꞌ ro̱j soꞌ cheꞌej, ne̱ cheꞌé dan taj ꞌu̱nj guun niꞌya̱j níꞌ rihaan ro̱j soꞌ, ne̱ taj núj ga̱ ta̱ranꞌ nij xꞌneꞌ nij síí yaníj noco̱ꞌ man Cristó guun niꞌya̱j níꞌ rihaan ro̱j soꞌ a.

⁵ Cata̱j uún soj rihaan xꞌneꞌ yuvii̱ noco̱ꞌ man Cristó nuu chre̱ꞌ tucuá ro̱j soꞌ se vaa veꞌé cuma̱n nij soꞌ, raj á. Ne̱ da̱nj cata̱j uún soj rihaan síí cuꞌna̱j Epeneto á. ꞌO̱ se ꞌe̱e̱ raj man soꞌ, ne̱ soꞌ me síí cuchumán rá niꞌya̱j man Cristó asino ya̱a̱n rihaan cunuda̱nj nij yuvii̱ ma̱n estadó cuꞌna̱j Asia a.

⁶ Ne̱ cata̱j soj rihaan chana̱ cuꞌna̱j Mariá se vaa veꞌé ca̱yáán noꞌ raj á. ꞌO̱ se quiꞌyaj suun ndoꞌo noꞌ cheꞌé soj a.

⁷ Ne̱ cata̱j soj rihaan síí cuꞌna̱j Andrónico do̱ꞌ, rihaan síí cuꞌna̱j Junias do̱ꞌ, se vaa veꞌé ca̱yáán ro̱j soꞌ, raj á. ꞌO̱ se veé da̱nj yuvii̱ israelitá me ro̱j soꞌ, ne̱ quiꞌnij ro̱j soꞌ tagaꞌ ga̱j a. Nij síí cuneꞌ Jesucristó caꞌa̱nj nata̱ꞌ snana̱ soꞌ roꞌ, neꞌen man ro̱j soꞌ, ne̱ ga̱a asi̱j ataa cuchuma̱n raj ni̱ꞌyaj ꞌu̱nj man Cristó, ne̱ a̱j cuchumán rá ro̱j soꞌ niꞌya̱j ro̱j soꞌ man Cristó a.

⁸ Ne̱ cata̱j soj rihaan síí cuꞌna̱j Amplias se vaa veꞌé ca̱yáán soꞌ, raj á. ꞌO̱ se noco̱ꞌ rój man Síí ꞌNi̱j Raꞌa man níꞌ, ne̱ cheꞌé dan ꞌe̱e̱ raj man soꞌ a.

⁹ Ne̱ cata̱j soj rihaan síí cuꞌna̱j Urbano se vaa veꞌé ca̱yáán soꞌ, raj á. ꞌYaj soꞌ se‑su̱u̱n Cristó ga̱j a. Ne̱ cata̱j uún soj rihaan síí cuꞌna̱j Estaquis se vaa veꞌé ca̱yáán soꞌ, raj, cheꞌé se ꞌe̱e̱ raj man soꞌ a.

¹⁰ Ne̱ cata̱j soj rihaan síí cuꞌna̱j Apeles se vaa veꞌé ca̱yáán soꞌ, raj á. Neꞌen níꞌ se vaa síí noco̱ꞌ xraan man Cristó me soꞌ a. Cata̱j soj rihaan nij tucua̱ síí cuꞌna̱j Aristóbulo se vaa veꞌé cuma̱n nij soꞌ, raj á.

¹¹ Ne̱ cata̱j soj rihaan síí cuꞌna̱j Herodión se vaa veꞌé ca̱yáán soꞌ, raj á. ꞌO̱ se síí israelitá me soꞌ ga̱j a. Ne̱ cata̱j soj rihaan nij tuviꞌ síí cuꞌna̱j Narciso nij síí noco̱ꞌ man Síí ꞌNi̱j Raꞌa man níꞌ se vaa veꞌé cuma̱n nij soꞌ, raj á.

¹² Ne̱ cata̱j soj rihaan chana̱ cuꞌna̱j Trifena do̱ꞌ, rihaan chana̱ cuꞌna̱j Trifosa do̱ꞌ, se vaa veꞌé ca̱yáán ro̱j noꞌ, raj á. ꞌO̱ se ꞌyaj ndoꞌo ro̱j chana̱ yoꞌ se‑su̱u̱n Síí ꞌNi̱j Raꞌa man níꞌ a. Ne̱ cata̱j soj rihaan chana̱ cuꞌna̱j Pérsida se vaa veꞌé ca̱yáán noꞌ, raj á. ꞌE̱e̱ rá níꞌ man noꞌ, ne̱ quiꞌyaj ndoꞌo noꞌ se‑su̱u̱n Síí ꞌNi̱j Raꞌa man níꞌ a.

¹³ Ne̱ cata̱j soj rihaan síí cuꞌna̱j Rufo se vaa veꞌé ca̱yáán soꞌ, raj, cheꞌé se sa̱ꞌ uxrá nocoꞌ soꞌ man Síí ꞌNi̱j Raꞌa man níꞌ a. Cata̱j uún soj rihaan nii soꞌ se vaa veꞌé ca̱yáán noꞌ, raj á. ꞌO̱ se ase vaa veꞌé ꞌyaj chana̱ ga̱ taꞌníí chana̱ roꞌ, da̱nj ꞌyaj noꞌ ga̱j a.

¹⁴ Ne̱ cata̱j soj rihaan síí cuꞌna̱j Asíncrito do̱ꞌ, rihaan síí cuꞌna̱j Flegonte do̱ꞌ, rihaan síí cuꞌna̱j Hermas do̱ꞌ, rihaan síí cuꞌna̱j Patrobas do̱ꞌ, rihaan síí cuꞌna̱j Hermes do̱ꞌ, rihaan cunuda̱nj ꞌó nij tinúú níꞌ síí ya̱nj ga̱ nij soꞌ do̱ꞌ, se vaa veꞌé cuma̱n nij soꞌ raj á.

¹⁵ Cata̱j soj rihaan síí cuꞌna̱j Filólogo do̱ꞌ, rihaan chana̱ cuꞌna̱j Julia do̱ꞌ, rihaan síí cuꞌna̱j Nereo do̱ꞌ, rihaan raꞌvij soꞌ do̱ꞌ, rihaan síí cuꞌna̱j Olimpas do̱ꞌ, rihaan cunuda̱nj ꞌó nij síí noco̱ꞌ man Cristó ya̱nj ga̱ nij soꞌ do̱ꞌ, se vaa veꞌé cuma̱n cunuda̱nj nij soꞌ, raj á.

¹⁶ Ga̱a nariꞌ tuviꞌ nij soj, ne̱ veꞌé ndoꞌo caꞌmi̱i̱ soj ga̱ tuviꞌ soj rihaan Yaꞌanj á. Ne̱ me rá cunuda̱nj nij xꞌneꞌ nij síí noco̱ꞌ man Cristó se vaa veꞌé cuma̱n nij soj na̱nj ado̱nj.

Gu̱un yaníj níꞌ rihaan nij síí quiꞌya̱j quixra̱ꞌ taꞌa̱j níꞌ ga̱ tinúú níꞌ á

¹⁷ Chrej nucua̱j me narque̱j rihaan soj nihánj, tinu̱j, nocoj. Dan me se vaa yuvii̱ me rá quixra̱ꞌ taꞌa̱j soj ga̱ tinúú soj cheꞌé tucuáán a̱j nariꞌ soj, ne̱ gu̱un naꞌa̱j soj cheꞌé stucua̱nj Yaꞌanj, quiꞌya̱j nij soꞌ, ne̱ cheꞌé dan gu̱un yaníj soj rihaan yuvii̱ ꞌyaj da̱nj á.

¹⁸ Ne ꞌyaj suun nij soꞌ rihaan Cristó Si̱j ꞌNi̱j Raꞌa man níꞌ maꞌ. Tana̱nj ꞌyaj nij soꞌ se‑su̱u̱n maꞌa̱n nij soꞌ na̱nj ado̱nj. ꞌO̱ se veꞌé ndoꞌo vaa nana̱ aꞌmii nij soꞌ cheꞌé yuvii̱, ne̱ da̱nj ꞌyaj nij soꞌ tihaꞌ yuꞌunj nij soꞌ man yuvii̱, ne̱ nda̱a yuvii̱ ne tumé cacunꞌ tihaꞌ yuꞌunj nij soꞌ man na̱nj ado̱nj.

¹⁹ Dan me se a̱j cuno cunuda̱nj yuvii̱ se vaa sa̱ꞌ uxrá cuno soj snana̱ Yaꞌanj, ne̱ cheꞌé dan guun niha̱ꞌ raj cheꞌé soj, ne̱ me raj xca̱j soj cuentá, ne̱ quiꞌya̱j soj se sa̱ꞌ ni̱ꞌyaj Yaꞌanj a. Tza̱j ne̱ naꞌvej raj nari̱ꞌ soj quiꞌya̱j soj tucuáán chiꞌi̱i̱ maꞌ.

²⁰ Raꞌya̱nj quiꞌya̱j canaán soj rihaan Síí Chre̱e, quiꞌya̱j Yaꞌanj, si̱j ꞌyaj vaa xe̱j nimán níꞌ, ne̱ me raj quiꞌya̱j Jesús Si̱j ꞌNi̱j Raꞌa man níꞌ se lu̱j cheꞌé soj na̱nj ado̱nj.

Veꞌé cuma̱n nij síí noco̱ꞌ man Cristó ya̱nj chumanꞌ Romá, rá nij tuviꞌ Pabló a

²¹ Dan me se veꞌé cuma̱n nij soj, rá síí cuꞌna̱j Timoteo síí ꞌyaj se‑su̱u̱n Yaꞌanj ga̱j a. Ne̱ síí cuꞌna̱j Lucio do̱ꞌ, síí cuꞌna̱j Jasón do̱ꞌ, síí cuꞌna̱j Sosípater do̱ꞌ, nu̱ꞌ nij soꞌ me síí taj se vaa veꞌé cuma̱n soj, rá nij soꞌ a. Veé da̱nj yuvii̱ israelitá me nij soꞌ uún a.

²² Síí cuꞌna̱j Tercio mej, ne̱ ꞌu̱nj me síí achrón snana̱ síí cuꞌna̱j Pabló rihaan yanj nihánj, ne̱ veꞌé cuma̱n nij soj, rá ꞌu̱nj si̱j noco̱ꞌ man Síí ꞌNi̱j Raꞌa man níꞌ a.

²³ Ne̱ me rá síí cuꞌna̱j Gayo se vaa veꞌé cuma̱n nij soj, ne̱ veꞌ tucuá soꞌ yáán ꞌu̱nj, ne̱ nuu chre̱ꞌ xꞌneꞌ cunuda̱nj nij síí noco̱ꞌ man Cristó veꞌ tucuá soꞌ a. Ne̱ veꞌé cuma̱n soj, taj síí cuꞌna̱j Erasto, ne̱ síí ata̱ saꞌanj rihaan chumanꞌ nihánj me soꞌ a. Ne̱ veꞌé cuma̱n soj, rá tinúú níꞌ síí cuꞌna̱j Cuarto a.

²⁴ Dan me se me raj quiꞌya̱j Jesucristó Si̱j ꞌNi̱j Raꞌa man níꞌ se lu̱j cheꞌé cunuda̱nj nij soj a. Veé da̱nj ga̱a̱ ya̱ ado̱nj.

Sa̱ꞌ uxrá vaa Yaꞌanj a

²⁵ Uun nucua̱j Yaꞌanj ra̱cuíj Yaꞌanj man soj nari̱ꞌ soj nu̱ꞌ nana̱ sa̱ꞌ caꞌmij rihaan soj a. Nana̱ sa̱ꞌ yuve̱ cheꞌé Jesucristó me nana̱ yoꞌ a. Ga̱a naá me se ne caꞌve̱e xca̱j yuvii̱ cuentá cheꞌé snana̱ Yaꞌanj maꞌ. Tza̱j ne̱ ya̱j roꞌ, tihaa̱n Yaꞌanj snana̱ Yaꞌanj rihaan níꞌ a.

²⁶ Ne̱ Yaꞌanj vaa iꞌna̱ꞌ nu̱ꞌ cachén nu̱ꞌ caꞌnaꞌ ne̱ nu̱ꞌ cavii nu̱ꞌ caꞌanj roꞌ, caꞌneꞌ soꞌ suun rihaan nij síí nataꞌ snana̱ Yaꞌanj ga̱a naá, cachro̱n nij soꞌ snana̱ Yaꞌanj rihaan yanj, ne̱ da̱nj quiꞌyaj nij soꞌ a. Xcaj cunuda̱nj nij yuvii̱ cuentá cheꞌé snana̱ Yaꞌanj, ne̱ me rá Yaꞌanj cuchuma̱n rá nij yuvii̱ snana̱ Yaꞌanj, ne̱ canoco̱ꞌ nij yuvii̱ man Yaꞌanj a.

²⁷ Ne̱ Yaꞌanj me se o̱rúnꞌ Yaꞌanj, ne̱ raa̱ o̱rúnꞌ soꞌ avii cunuda̱nj nana̱ cu̱u sa̱ꞌ a. Sa̱ꞌ uxrá quiꞌyaj Jesucristó cheꞌé níꞌ, ne̱ cheꞌé dan niꞌndaj ya̱ sa̱ꞌ veꞌé vaa Yaꞌanj cata̱j níꞌ nu̱ꞌ cavii nu̱ꞌ caꞌanj a. Veé da̱nj ga̱a̱ ya̱ ado̱nj.