Romanos 15 - Triqui de San Juan Copala

No̱ xcúún níꞌ ra̱cuíj níꞌ tinúú níꞌ a

¹ Xa̱ꞌ níꞌ si̱j amán rá se vaa aꞌvej rá Yaꞌanj cha̱ níꞌ na̱j guun rasu̱u̱n, tza̱j ne̱ no̱ xcúún níꞌ ra̱cuíj níꞌ man nij yuvii̱ naꞌvee cuchuma̱n rá da̱nj na̱nj á. Se̱ quiꞌyaj níꞌ se ina̱nj me rá níꞌ quiꞌya̱j níꞌ maꞌ.

² Tza̱j ne̱ ra̱cuíj ꞌo̱ ꞌo̱ níꞌ tinúú níꞌ, cheꞌé yan gu̱un niha̱ꞌ rá tinúú níꞌ, ne̱ sa̱ꞌ doj ga̱a̱ tinúú níꞌ, ne̱ sa̱ꞌ doj queneꞌe̱n tinúú níꞌ canoco̱ꞌ tinúú níꞌ Yaꞌanj a.

³ ꞌO̱ se ne quiꞌya̱j Cristó se me rá maꞌa̱n Cristó quiꞌya̱j soꞌ maꞌ. ꞌO̱ se Danj Yaꞌanj taj se vaa nana̱ nij caꞌmii yuvii̱ cheꞌé Yaꞌanj roꞌ, caꞌmii uún yuvii̱ cheꞌé Cristó, ne̱ caꞌvej rá Cristó caꞌmi̱i̱ nij yuvii̱ nana̱ nij cheꞌé maꞌa̱n soꞌ a. Da̱nj aꞌmii Danj Yaꞌanj cheꞌé maꞌa̱n Cristó a.

⁴ Ga̱a naá me se cachrón nii nana̱ rihaan Danj Yaꞌanj yan nari̱ꞌ maꞌa̱n níꞌ da̱j quiꞌya̱j níꞌ ga̱a ne̱ gu̱un nucua̱j níꞌ quiꞌya̱j canaán níꞌ rihaan sayuun ne̱ nari̱ꞌ nucuaj nimán níꞌ ga̱a ne̱ caꞌve̱e gu̱un ya̱ rá níꞌ se vaa vaa güii cavi̱i̱ sa̱ꞌ níꞌ a.

⁵ Dan me se Yaꞌanj me síí ꞌyaj uun nucua̱j nimán níꞌ, ne̱ síí noco̱ꞌ man Cristó Jesús me nij soj, ne̱ cheꞌé dan me raj ꞌo̱ cuya̱a̱n ga̱a̱ rá nimán ta̱ranꞌ nij soj, quiꞌya̱j Yaꞌanj a.

⁶ Ga̱a ne̱ ꞌo̱ cuya̱a̱n caꞌmi̱i̱ sa̱ꞌ nij soj cheꞌé Yaꞌanj Rej Jesucristó Si̱j ꞌNi̱j Raꞌa man níꞌ ado̱nj.

Nataꞌ Pabló cheꞌé se vaa quiꞌyaj Cristó cheꞌé nij yuvii̱ israelitá do̱ꞌ, cheꞌé nij yuvii̱ yaníj do̱ꞌ a

⁷ Cheꞌé dan veꞌé caꞌmi̱i̱ soj ga̱ tinúú soj ga̱a ꞌnaꞌ tinúú soj rihaan soj á. Da̱nj quiꞌyaj Cristó, veꞌé caꞌmii soꞌ ga̱ níꞌ ado̱nj. Cheꞌé dan veꞌé caꞌmi̱i̱ níꞌ ga̱ tinúú níꞌ, ne̱ veꞌé ndoꞌo caꞌmi̱i̱ tinúú níꞌ cheꞌé Yaꞌanj á.

⁸ Dan me se cata̱j xnaꞌanj ꞌu̱nj rihaan nij soj cheꞌé suun quiꞌyaj Cristó cheꞌé nij yuvii̱ israelitá, ne̱ ga̱a naá me se cataj xnaꞌanj Yaꞌanj rihaan xi̱i nij yuvii̱ israelitá da̱j quiꞌya̱j Yaꞌanj cheꞌé nij soꞌ, ne̱ quisíj ya̱ nu̱ꞌ nana̱ yoꞌ, quiꞌyaj Cristó a.

⁹ Ne̱ ga̱a caꞌnaꞌ Cristó, ne̱ veꞌé caꞌmii nij yuvii̱ yaníj cheꞌé Yaꞌanj, quiꞌyaj soꞌ a. ꞌO̱ se cheꞌé se vaa quiꞌyaj Cristó, cheꞌé dan xcaj nij yuvii̱ yaníj cuentá se vaa cunuu ꞌe̱e̱ rá Yaꞌanj niꞌya̱j Yaꞌanj man nij soꞌ ga̱ nij yuvii̱ israelitá, ne̱ cheꞌé dan veꞌé caꞌmii nij yuvii̱ yaníj cheꞌé Yaꞌanj a. Da̱nj aꞌmii Danj Yaꞌanj a. Taj xnaꞌanj Danj Yaꞌanj nana̱ caꞌmii rey cuꞌna̱j David rihaan Yaꞌanj ga̱a naá, ga̱a cataj soꞌ a: Cheꞌé dan veꞌé caꞌmi̱j rihaan nij yuvii̱ yaníj cheꞌé so̱ꞌ, ne̱ cachra̱j chraꞌ rihaan so̱ꞌ a. Da̱nj caꞌmii David ga̱a naá a.

¹⁰ Ne̱ taj uún Danj Yaꞌanj se vaa gu̱un niha̱ꞌ rá nij yuvii̱ yaníj ga̱ nij yuvii̱ israelitá a.

¹¹ Ne̱ taj uún Danj Yaꞌanj se vaa veꞌé caꞌmi̱i̱ cunuda̱nj nij yuvii̱ yaníj cheꞌé Yaꞌanj, ne̱ veꞌé cata̱j cunuda̱nj nij xꞌneꞌ yuvii̱ yaníj se vaa nucua̱j uxrá Yaꞌanj a.

¹² Ne̱ cataj uún síí cuꞌna̱j Isaías ga̱a naá se vaa cuma̱n ꞌo̱ taꞌníí taꞌnij siꞌno̱ síí cuꞌna̱j Isaí rej síí cuꞌna̱j David, síí cayáán ga̱a naá, ne̱ caꞌna̱ꞌ soꞌ, ne̱ gu̱un chij soꞌ rihaan nij yuvii̱ yaníj a. Ga̱a ne̱ ga̱a̱ nucua̱j rá nij yuvii̱ yaníj man soꞌ se vaa ti̱nanii soꞌ man nij soꞌ rihaan sayuun a. Da̱nj taj síí cuꞌna̱j Isaías cheꞌé Cristó a.

¹³ Dan me se nucua̱j rá níꞌ niꞌya̱j níꞌ Yaꞌanj, ne̱ neꞌen níꞌ se vaa vaa güii cavi̱i̱ sa̱ꞌ níꞌ, quiꞌya̱j Yaꞌanj á. Dan me se amán rá nij soj niꞌya̱j soj Yaꞌanj, ne̱ cheꞌé dan me raj gu̱un niha̱ꞌ ndoꞌo rá nimán soj, ne̱ ga̱a̱ xe̱j nimán soj, quiꞌya̱j Yaꞌanj, ga̱a ne̱ doj a̱ gu̱un ya̱ rá soj se vaa cavi̱i̱ sa̱ꞌ soj vaa güii, quiꞌya̱j Nimán Yaꞌanj ado̱nj.

Se‑su̱u̱n Yaꞌanj quiꞌyaj Pabló a

¹⁴ Veé dan me se uun ya̱ raj se vaa síí sa̱ꞌ me maꞌa̱n soj, tinu̱j, nocoj. Xcaj ndoꞌo soj cuentá, ne̱ neꞌen soj nago̱ꞌ soj chrej sa̱ꞌ man tinúú soj ado̱nj.

^15-16 Tza̱j ne̱ caꞌneꞌ ndoꞌoj suun rihaan soj ga̱a quiꞌyáj yanj cartá nihánj na̱nj á. ꞌO̱ se neꞌen soj se vaa sa̱ꞌ uxrá quiꞌyaj Yaꞌanj cheꞌej, ne̱ ase vaa ꞌyaj xrej se‑su̱u̱n Yaꞌanj roꞌ, da̱nj vaa ꞌyáá ꞌu̱nj se‑su̱u̱n Cristó Jesús, ne̱ tucuꞌyón ꞌu̱nj snana̱ Yaꞌanj nana̱ sa̱ꞌ man soj si̱j yaníj, ne̱ vaa güii naca̱j Yaꞌanj man soj, ne̱ cheꞌé dan tucuꞌyonj man soj, ne̱ me raj caꞌve̱j Yaꞌanj naca̱j Yaꞌanj man soj, ne̱ me raj cunu̱u sa̱ꞌ nimán soj rihaan Yaꞌanj ado̱nj. Dan me se ga̱a̱ sa̱ꞌ soj, quiꞌya̱j Nimán Yaꞌanj rá ꞌu̱nj ado̱nj.

¹⁷ Dan me se racuíj ndoꞌo Cristó Jesús manj, ne̱ cheꞌé dan niha̱ꞌ raj cheꞌé nu̱ꞌ se‑su̱u̱n Yaꞌanj ꞌyáá ꞌu̱nj na̱nj á.

¹⁸ Dan me se se̱ quisíj raj caꞌmi̱j cheꞌé se vaa a̱j quiꞌyaj ꞌó yuvii̱ maꞌ. Ma̱an se cata̱j xnaꞌanj ꞌu̱nj cheꞌé ina̱nj se vaa quiꞌyaj Cristó ga̱a racuíj soꞌ manj se vaa guun nu̱cuáj cata̱j xnaꞌanj ꞌu̱nj rihaan soj si̱j yaníj cheꞌé maꞌa̱n soꞌ, ne̱ cheꞌé dan cuno soj si̱j yaníj snana̱ Yaꞌanj a. Dan me se Cristó me síí racuíj manj narij nu̱ꞌ nana̱ nihánj caꞌmij rihaan soj, ne̱ veé soꞌ racuíj manj ꞌyáá ꞌu̱nj nu̱ꞌ suun ꞌyáj na̱nj ado̱nj.

¹⁹ Dan me se guun nu̱cuáá ꞌu̱nj ꞌyáá ꞌu̱nj da̱j a̱ nij suun sa̱ꞌ noco̱o, ꞌyaj snucua̱j Nimán Yaꞌanj a. Ga̱a ne̱ xcaj yuvii̱ ya̱nj nu̱ꞌ anica̱j chumanꞌ Jerusalén cuentá cheꞌé nana̱ sa̱ꞌ cheꞌé Cristó, ne̱ nda̱a yuvii̱ ya̱nj ꞌó nij chumanꞌ ga̱nꞌ doj nda̱a estadó cuꞌna̱j Ilírico roꞌ, xcaj cuentá cheꞌé nana̱ sa̱ꞌ cheꞌé Cristó, quiꞌyáj a.

²⁰ ꞌO̱ se ina̱nj me raj caꞌmi̱i̱ natáj ꞌu̱nj nana̱ sa̱ꞌ cheꞌé Cristó rihaan yuvii̱ ataa queneꞌe̱n cheꞌé soꞌ, ne̱ se̱ tucuꞌyonj man yuvii̱ a̱j caꞌmii natáj ꞌó yuvii̱ rihaan cheꞌé soꞌ maꞌ.

²¹ Veé da̱nj aꞌmii uún Danj Yaꞌanj, taj yoꞌ a: Yuvii̱ a̱ doj ne notaꞌ nii rihaan cheꞌé soꞌ roꞌ, queneꞌe̱n nij soꞌ da̱j vaa soꞌ, ne̱ yuvii̱ ataa cuno̱ cheꞌé soꞌ roꞌ, xca̱j nij soꞌ cuentá cheꞌé soꞌ a. Da̱nj taj Danj Yaꞌanj na̱nj ado̱nj.

Me rá Pabló caꞌa̱nj soꞌ chumanꞌ Jerusalén, ne̱ me rá soꞌ caꞌa̱nj soꞌ chumanꞌ Romá uún a

²² Cheꞌé dan ne caꞌve̱e cuchi̱j rihaan soj a. Quisíj queꞌe̱e̱ güii cachronj se vaa cuchi̱j rihaan nij soj, tza̱j ne̱ ne caꞌve̱e maꞌ.

²³ Tza̱j ne̱ cuano̱ nihánj me se taj va̱j a̱ ꞌó chumanꞌ rej nihánj ataa cuno̱ nana̱ sa̱ꞌ cheꞌé Cristó maꞌ. Da̱nj na̱nj uún ne̱ guun queꞌe̱e̱ guun raj cuchi̱j rihaan nij soj,

²⁴ ne̱ cheꞌé dan me que̱neꞌén ꞌu̱nj man soj ga̱a caꞌa̱nj ꞌu̱nj yoꞌóó noco̱o cuꞌna̱j España, raj a. Me rá ꞌu̱nj ca̱ránꞌ ꞌu̱nj chiháán soj do̱j güii, ne̱ gu̱un niha̱ꞌ raj ca̱yánj ga̱ soj, ne̱ nano̱ níꞌ cuentó, ga̱a ne̱ ra̱cuíj soj mán ꞌu̱nj caꞌa̱nj ꞌu̱nj nda̱a yoꞌóó noco̱o cuꞌna̱j España, raj a.

²⁵ Dan me se caꞌa̱nj ꞌu̱nj chumanꞌ Jerusalén cuano̱, ne̱ ra̱cuíj ꞌu̱nj man nij síí noco̱ꞌ man Cristó ya̱nj chumanꞌ yoꞌ ado̱nj.

²⁶ ꞌO̱ se nij síí noco̱ꞌ man Cristó ya̱nj estadó cuꞌna̱j Macedonia do̱ꞌ, estadó cuꞌna̱j Acaya do̱ꞌ, me se me ndoꞌo rá nij soꞌ caꞌne̱j nij soꞌ saꞌanj rihaan nij síí nique̱ noco̱ꞌ man Cristó ya̱nj chumanꞌ Jerusalén ado̱nj.

²⁷ Da̱nj me rá maꞌa̱n nij soꞌ quiꞌya̱j nij soꞌ ado̱nj. ꞌO̱ se yuvii̱ israelitá me nij síí ma̱n Jerusalén, ne̱ nij soꞌ roꞌ, quiꞌyaj nariꞌ yuvii̱ yaníj snana̱ Yaꞌanj, ne̱ cheꞌé dan cunuu sa̱ꞌ nimán nij yuvii̱ yaníj, taj nij síí yaníj ma̱n ro̱j estadó yoꞌ ado̱nj. Cheꞌé dan no̱ xcúún nij yuvii̱ yaníj ra̱cuíj nij soꞌ man nij yuvii̱ noco̱ꞌ man Cristó ma̱n Jerusalén, rá nij soꞌ a. ꞌO̱ se achiin saꞌanj man nij soꞌ, ne̱ cheꞌé dan caꞌne̱j nij yuvii̱ yaníj saꞌanj rihaan nij soꞌ ado̱nj.

²⁸ Cheꞌé dan vaa suun rihanj ta̱cuachenj saꞌanj rihaan nij síí noco̱ꞌ man Cristó ya̱nj chumanꞌ Jerusalén, ne̱ dan me se nago̱j saꞌanj ston nij soꞌ, ne̱ xꞌnu̱u̱ rihanj, ne̱ asa̱ꞌ vaj ꞌu̱nj chrej caꞌa̱nj ꞌu̱nj yoꞌóó noco̱o cuꞌna̱j España, ne̱ ca̱ránꞌ ꞌu̱nj chiháán soj a.

²⁹ ꞌO̱ se neꞌenj se vaa asa̱ꞌ cuchij chiháán soj, ne̱ uxrá ya̱ quiꞌya̱j Cristó se lu̱j ga̱ níꞌ ado̱nj.

³⁰ Dan me se cheꞌé se noco̱ꞌ ta̱ranꞌ níꞌ man Jesucristó Si̱j ꞌNi̱j Raꞌa man níꞌ, cheꞌé dan ꞌe̱e̱ rá níꞌ tinúú níꞌ, ꞌyaj Nimán Yaꞌanj, ne̱ cheꞌé dan cata̱j xnaꞌanj ꞌu̱nj rihaan nij soj se vaa ra̱cuíj soj manj cachi̱nj niꞌya̱j níꞌ rihaan Yaꞌanj cheꞌej á.

³¹ Cachi̱nj niꞌya̱j soj se vaa nani̱j rihaan sayuun me rá nij síí israelitá ya̱nj estadó Judea síí ne nocoꞌ man Cristó quiꞌya̱j nij soꞌ mán ꞌu̱nj a. Cachi̱nj niꞌya̱j nij soj se vaa veꞌé naca̱j nij síí noco̱ꞌ man Cristó ya̱nj chumanꞌ Jerusalén saꞌanj raꞌaj nago̱j man nij soꞌ saꞌanj rqué nij yuvii̱ yaníj a.

³² Ga̱a ne̱ gu̱un niha̱ꞌ uxrá raj asa̱ꞌ cuchij chiháán soj, ne̱ cuchi̱ꞌ yá ꞌu̱nj chiháán soj, sese caꞌve̱j rá Yaꞌanj, ga̱a ne̱ cunu̱u cui̱j rá nimán ta̱ranꞌ níꞌ na̱nj á.

³³ Xa̱ꞌ Yaꞌanj si̱j ꞌyaj vaa xe̱j nimán níꞌ, tza̱j ne̱ me raj ꞌo̱ ca̱yáán soꞌ ga̱ soj ado̱nj. Veé da̱nj ga̱a̱ ya̱ ado̱nj.