Romanos 14 - Triqui de San Juan Copala

Se̱ cutaꞌ níꞌ cacunꞌ xráá tinúú níꞌ maꞌ

^1-2 Taꞌa̱j yuvii̱ guun ya̱ rá se vaa aꞌvej rá Yaꞌanj cha̱ yuvii̱ na̱j guun rasu̱u̱n, tza̱j ne̱ ꞌó taꞌa̱j yuvii̱ roꞌ, chuꞌviꞌ nij soꞌ cha̱ nij soꞌ nee̱ a. Naꞌvej rá Yaꞌanj cha̱ nij soꞌ nee̱, rá nij soꞌ, ne̱ cheꞌé dan ina̱nj cuêj chá nij soꞌ a. Dan me se veꞌé quiꞌya̱j nij soj ga̱ nij yuvii̱ naꞌvej rá cha̱ na̱j guun rasu̱u̱n á. Sese da̱nj vaa rá nij soꞌ, ne̱ se̱ canó tuviꞌ nij soj ga̱ nij soꞌ maꞌ.

³ Se̱ guun nachri̱ꞌ síí chá na̱j guun rasu̱u̱n ni̱ꞌyaj soꞌ man síí chá ina̱nj cuêj maꞌ. Se̱ cutaꞌ síí chá ina̱nj cuêj cacunꞌ xráá síí chá na̱j guun rasu̱u̱n maꞌ. ꞌO̱ se ꞌni̱j raꞌa Yaꞌanj man síí chá na̱j guun rasu̱u̱n do̱ꞌ na̱nj ado̱nj.

⁴ ꞌO̱ se ne nó xcúún níꞌ caꞌne̱ꞌ níꞌ cacunꞌ cheꞌé tuviꞌ níꞌ cheꞌé se né si̱j nu̱u̱ rihaan níꞌ me tuviꞌ níꞌ maꞌ. Tana̱nj síí nu̱u̱ rihaan Síí ꞌNi̱j Raꞌa man níꞌ me ꞌo̱ ꞌo̱ níꞌ, ne̱ soꞌ me síí taj ase sa̱ꞌ quiꞌyaj níꞌ niꞌ, ase nij quiꞌyaj níꞌ ado̱nj. Ne̱ ya̱ cavi̱i̱ sa̱ꞌ síí nu̱u̱ rihaan Yaꞌanj cheꞌé se Yaꞌanj me síí aꞌvee ticavii sa̱ꞌ man yuvii̱ ado̱nj.

⁵ Dan me se taꞌa̱j yuvii̱ taj se vaa gue̱e̱ taꞌa̱j güii, ne̱ ꞌó taꞌa̱j yuvii̱ taj se vaa ꞌo̱ cuya̱a̱n vaa nij güii, ne̱ taj güii gue̱e̱ rihaan ꞌó taꞌa̱j nij soꞌ a. Ino̱ vaa rá ꞌo̱ ꞌo̱ taꞌa̱j nij yuvii̱, ne̱ cheꞌé dan me xca̱j ꞌo̱ ꞌo̱ nij soj cuentá da̱j vaa rá soj, ne̱ gu̱un ya̱ rá soj da̱j vaa rá soj na̱nj á.

⁶ Xa̱ꞌ síí taj se vaa vaa güii gue̱e̱, tza̱j ne̱ da̱nj vaa rá soꞌ cheꞌé Síí ꞌNi̱j Raꞌa man níꞌ, ne̱ da̱nj na̱nj síí chá na̱j guun rasu̱u̱n, ne̱ da̱nj ꞌyaj soꞌ cheꞌé Síí ꞌNi̱j Raꞌa man níꞌ uún a. Da̱nj ꞌyaj ꞌo̱ ꞌo̱ nij soꞌ, ne̱ taj nij soꞌ guun niꞌya̱j níꞌ rihaan Yaꞌanj a. Ne̱ xa̱ꞌ síí naꞌvej rá cha̱ na̱j guun rasu̱u̱n, tza̱j ne̱ veé da̱nj vaa rá soꞌ cheꞌé Síí ꞌNi̱j Raꞌa man níꞌ uún, ne̱ dan me se taj soꞌ guun niꞌya̱j níꞌ rihaan Yaꞌanj uún a.

⁷ ꞌO̱ se né cheꞌe̱ o̱rúnꞌ níꞌ vaa iꞌna̱ꞌ ꞌo̱ ꞌo̱ níꞌ maꞌ. Né cheꞌe̱ o̱rúnꞌ níꞌ cavi̱ꞌ ꞌo̱ ꞌo̱ níꞌ maꞌ.

⁸ ꞌO̱ se sese vaa iꞌna̱ꞌ níꞌ, ne̱ vaa iꞌna̱ꞌ níꞌ quiꞌya̱j níꞌ se‑su̱u̱n Síí ꞌNi̱j Raꞌa man níꞌ, ne̱ caꞌve̱e se cavi̱ꞌ níꞌ, tza̱j ne̱ ꞌo̱ qui̱ꞌnij raꞌa soꞌ man níꞌ na̱nj ado̱nj.

⁹ Dan me se me rá Cristó ni̱caj yuꞌunj soꞌ man yuvii̱ vaa iꞌna̱ꞌ do̱ꞌ, man yuvii̱ caviꞌ do̱ꞌ, ne̱ cheꞌé dan caviꞌ soꞌ, ne̱ cunuu iꞌna̱ꞌ uún soꞌ a.

¹⁰ Dan me se taj cheꞌé cuta̱ꞌ níꞌ cacunꞌ xráá tinúú níꞌ, ne̱ taj cheꞌé nachri̱ꞌ níꞌ ni̱ꞌyaj níꞌ man tinúú níꞌ maꞌ. ꞌO̱ se canicu̱nꞌ cunuda̱nj níꞌ rihaan Yaꞌanj vaa güii, ne̱ caꞌne̱ꞌ maꞌa̱n Yaꞌanj cacunꞌ cheꞌé níꞌ na̱nj ado̱nj.

¹¹ Dan me se Danj Yaꞌanj taj se vaa ya̱ ya̱ ca̱yáán ru̱j cunuda̱nj yuvii̱ rihaan Yaꞌanj vaa güii, ne̱ veꞌé ndoꞌo caꞌmi̱i̱ cunuda̱nj yuvii̱ cheꞌé Yaꞌanj a. Da̱nj aꞌmii Danj Yaꞌanj a.

¹² Dan me se vaa güii nago̱ꞌ ꞌo̱ ꞌo̱ níꞌ cuentá rihaan Yaꞌanj cheꞌé se vaa quiꞌyaj níꞌ ga̱a cayáán níꞌ rihaan chumii̱ nihánj na̱nj ado̱nj.

Se̱ caꞌvej rá níꞌ quira̱nꞌ tinúú níꞌ cacunꞌ cheꞌé se vaa ꞌyaj níꞌ a

¹³ Cheꞌé dan caꞌne̱ꞌ rá níꞌ ga̱ suun utaꞌ níꞌ cacunꞌ xráá tinúú níꞌ á. Tana̱nj gu̱un ya̱ rá nij soj se vaa se̱ quiꞌyaj tinúú soj cacunꞌ, quiꞌya̱j maꞌa̱n soj a.

¹⁴ Cheꞌé se noco̱ꞌ ꞌu̱nj man Jesús Si̱j ꞌNi̱j Raꞌa man níꞌ, ne̱ guun ya̱ raj se vaa a̱ ꞌó rasu̱u̱n ne yuꞌva̱ꞌ ta̱ꞌaꞌ maꞌ. Tza̱j ne̱ sese vaa ꞌo̱ soꞌ uun rá se vaa cacu̱nꞌ cha̱ níꞌ ꞌo̱ rasu̱u̱n, ne̱ ya̱ uxrá cacu̱nꞌ cha̱ soꞌ a.

¹⁵ Sese yuꞌva̱ꞌ cha̱ꞌ ꞌo̱ rasu̱u̱n rá tinúú so̱ꞌ, ne̱ sese cha̱ so̱ꞌ man yoꞌ, ne̱ gu̱un rá soꞌ cha̱ soꞌ uún, ne̱ dan me se cha̱ soꞌ, ga̱a ne̱ quira̱nꞌ soꞌ cacunꞌ, qui̱ꞌyáá so̱ꞌ á. Sese da̱nj qui̱ꞌyáá so̱ꞌ, ne̱ né si̱j ꞌe̱e̱ rá man tinúú mé so̱ꞌ ga̱a a̱ maꞌ. Se̱ caꞌvej rá so̱ꞌ quira̱nꞌ tinúú so̱ꞌ cacunꞌ cheꞌé se chá chá so̱ꞌ maꞌ. ꞌO̱ se neꞌén so̱ꞌ se vaa caviꞌ Cristó cheꞌé maꞌa̱n tinúú so̱ꞌ ado̱nj.

¹⁶ Ne̱ se̱ guun quiꞌya̱j soj caꞌmi̱i̱ yuvii̱ nana̱ nij cheꞌé tucuáán sa̱ꞌ noco̱ꞌ soj maꞌ.

¹⁷ ꞌO̱ se nica̱j yuꞌunj Yaꞌanj man níꞌ, ne̱ cheꞌé dan se̱ nanó rá níꞌ cheꞌé se cha̱ níꞌ do̱ꞌ, cheꞌé se coꞌo̱ níꞌ do̱ꞌ maꞌ. Tza̱j ne̱ xca̱j níꞌ cuentá cheꞌé tinúú níꞌ á. ꞌO̱ se xa̱ꞌ suun uun chij Yaꞌanj nimán níꞌ, tza̱j ne̱ né cheꞌe̱ se chá níꞌ do̱ꞌ, né cheꞌe̱ se coꞌo níꞌ do̱ꞌ, me yoꞌ maꞌ. Ma̱an se cheꞌé rej cunu̱u sa̱ꞌ nimán níꞌ ne̱ cheꞌé rej ga̱a̱ xe̱j nimán níꞌ ne̱ cheꞌé rej gu̱un niha̱ꞌ rá nimán níꞌ quiꞌya̱j Nimán Yaꞌanj me yoꞌ a.

¹⁸ Dan me se nij síí ꞌyaj da̱nj roꞌ, ya̱ si̱j noco̱ꞌ man Cristó me nij soꞌ, ne̱ gu̱un niha̱ꞌ rá Yaꞌanj ni̱ꞌyaj Yaꞌanj man nij soꞌ, ne̱ cata̱j yuvii̱ ne nocoꞌ man Cristó se vaa veꞌé ꞌyaj nij soꞌ a.

¹⁹ Cheꞌé dan da̱nj ina̱nj quiꞌya̱j níꞌ, ga̱a ne̱ ga̱a̱ dínj cuma̱n níꞌ, ne̱ ra̱cuíj níꞌ tinúú níꞌ, ga̱a ne̱ sa̱ꞌ doj cuma̱n níꞌ, ne̱ sa̱ꞌ doj canoco̱ꞌ níꞌ man Cristó ado̱nj.

²⁰ Dan me se quiꞌyaj suun Yaꞌanj nimán tinúú so̱ꞌ, ne̱ cheꞌé dan se̱ caꞌvej rá so̱ꞌ quiri̱ꞌ rá tinúú so̱ꞌ cheꞌé se chá maꞌ. Neꞌen níꞌ se vaa sa̱ꞌ vaa da̱j a̱ rasu̱u̱n quiꞌyaj Yaꞌanj cha̱ yuvii̱ do̱ꞌ, coꞌo̱ yuvii̱ do̱ꞌ, tza̱j ne̱ sese yuꞌva̱ꞌ cha̱ꞌ ꞌo̱ rasu̱u̱n rá ꞌo̱ soꞌ, ne̱ cacu̱nꞌ cha̱ soꞌ man yoꞌ ado̱nj.

²¹ Sese yuꞌva̱ꞌ cha̱ꞌ ꞌo̱ rasu̱u̱n rá tinúú so̱ꞌ, ne̱ sese se̱ chá so̱ꞌ man yoꞌ, ne̱ cuna̱j qui̱ꞌyáá so̱ꞌ á. Sese yuꞌva̱ꞌ coꞌo̱ꞌ ꞌo̱ na rá tinúú so̱ꞌ, ne̱ sese se̱ coꞌo so̱ꞌ man yoꞌ, ne̱ cuna̱j qui̱ꞌyáá so̱ꞌ á. Ta̱dó so̱ꞌ sese quira̱nꞌ tinúú so̱ꞌ cacunꞌ cheꞌé se vaa qui̱ꞌyáá so̱ꞌ á.

²² Sese amán rá so̱ꞌ se vaa aꞌvej rá Yaꞌanj cha̱ so̱ꞌ na̱j guun rasu̱u̱n, ne̱ ina̱nj da̱nj ga̱a̱ rá ma̱ꞌán so̱ꞌ rihaan Yaꞌanj á. Gu̱un niha̱ꞌ rá so̱ꞌ rihaan Yaꞌanj sese neꞌén so̱ꞌ se vaa sa̱ꞌ vaa rá so̱ꞌ, neꞌén so̱ꞌ me se aꞌvej rá Yaꞌanj qui̱ꞌyáá so̱ꞌ na̱nj á.

²³ Tza̱j ne̱ sese ne neꞌen ꞌó soꞌ sese caꞌve̱j Yaꞌanj cha̱ soꞌ ꞌo̱ rasu̱u̱n niꞌ, sese se̱ caꞌvej Yaꞌanj cha̱ soꞌ niꞌ, ne̱ se̱ chá soꞌ maꞌ. Sese cha̱ soꞌ, ne̱ tumé soꞌ cacunꞌ rihaan Yaꞌanj cheꞌé se ne amán rá soꞌ se vaa aꞌvej Yaꞌanj cha̱ soꞌ, ma̱an se chá maꞌa̱n soꞌ, ne̱ cheꞌé dan tumé soꞌ cacunꞌ ado̱nj. Veé da̱nj ina̱nj vaa nu̱ꞌ se vaa quiꞌya̱j níꞌ nanj á. Sese ne amán rá níꞌ se vaa aꞌvej rá Yaꞌanj quiꞌya̱j níꞌ ꞌo̱ rasu̱u̱n, ne̱ sese quiꞌya̱j níꞌ da̱nj, ne̱ tu̱mé níꞌ cacunꞌ rihaan Yaꞌanj na̱nj ado̱nj.