Romanos 13 - Triqui de San Juan Copala

Cuno̱ níꞌ rihaan nij síí nica̱j suun a

¹ Cuno̱ cunuda̱nj nij soj rihaan nij síí nica̱j suun ma̱n tucuá suun chiháán soj á. ꞌO̱ se sese né Yaꞌa̱nj rá, ne̱ se̱ guun nucua̱j nij soꞌ quiri̱i̱ taꞌngaꞌ nij soꞌ maꞌ. Yaꞌanj me síí cuneꞌ man nij síí nica̱j suun ado̱nj.

² Cheꞌé dan cuno̱ soj rihaan nij síí nica̱j suun, ese da̱nj me rá Yaꞌanj quiꞌya̱j soj, ne̱ sese tucuáá soj rihaan nij síí nica̱j suun, ne̱ cuta̱ꞌ Yaꞌanj cacunꞌ xráá soj ado̱nj.

³ Nij yuvii̱ ne ꞌyaj sayuun roꞌ, taj cheꞌé cuchuꞌvi̱ꞌ nij soꞌ rihaan nij síí nica̱j suun maꞌ. Ma̱an ina̱nj síí ꞌyaj sayuun cuchuꞌvi̱ꞌ rihaan nij soꞌ a. Ne̱ cheꞌé dan sese naꞌvej rá soj cuchuꞌvi̱ꞌ soj rihaan nij síí nica̱j suun, ne̱ veꞌé quiꞌya̱j soj, ne̱ veꞌé caꞌmi̱i̱ nij síí nica̱j suun cheꞌé soj ado̱nj.

⁴ Dan me se ꞌyaj suun nij síí nica̱j suun rihaan maꞌa̱n Yaꞌanj, ne̱ vaa suun rihaan nij síí nica̱j suun ra̱cuíj nij soꞌ man soj, ne̱ cavi̱i̱ sa̱ꞌ soj ado̱nj. Tza̱j ne̱ sese ꞌyaj soj cacunꞌ, ne̱ cuchuꞌvi̱ꞌ soj rihaan nij soꞌ á. ꞌO̱ se ne ata̱ rmaꞌa̱n nij soꞌ suun maꞌ. ꞌYaj suun nij soꞌ cheꞌé Yaꞌanj, ne̱ racuíj nij soꞌ man Yaꞌanj quiꞌya̱j Yaꞌanj sayuun man nij síí ꞌyaj cacunꞌ ado̱nj.

⁵ Cheꞌé dan cuno̱ soj rihaan nij síí nica̱j suun, ne̱ cuchuꞌvi̱ꞌ soj quiꞌya̱j nij soꞌ sayuun man soj sese quiꞌya̱j soj cacunꞌ a. Da̱nj na̱nj uún ne̱ xca̱j soj cuentá se vaa me rá Yaꞌanj quiꞌya̱j soj á.

⁶ ꞌO̱ se oꞌ soj saꞌanj ataꞌ rihaan nij síí nica̱j suun, cheꞌé se neꞌen soj se vaa ꞌo̱ ꞌyaj suun nij soꞌ rihaan Yaꞌanj,

⁷ ne̱ dan me se no̱ xcúún soj go̱ꞌ soj saꞌanj ataꞌ do̱ꞌ, impuestó do̱ꞌ á. Veꞌé caꞌmi̱i̱ soj cheꞌé nij síí nica̱j suun, ne̱ cara̱a̱ cochro̱j soj rihaan nij soꞌ á.

Ga̱a̱ ꞌe̱e̱ rá níꞌ tuviꞌ níꞌ a

⁸ Se̱ gaa xcúún rihaan nij soj ga̱ tuviꞌ soj maꞌ. Tza̱j ne̱ vaa ꞌo̱ xcúún rihaan soj ga̱ tuviꞌ soj ado̱nj. No̱ xcúún soj ga̱a̱ ꞌe̱e̱ rá soj tuviꞌ soj, ne̱ sese ya̱ ꞌe̱e̱ rá soj tuviꞌ soj, ga̱a ne̱ ase vaa síí quiꞌyaj nu̱ꞌ nda̱a vaa taj stucua̱nj Moisés roꞌ, da̱nj ga̱a̱ soj uún ado̱nj.

⁹ Dan me se a̱j neꞌen soj nu̱ꞌ suun caꞌneꞌ Yaꞌanj cuno̱ yuvii̱, ne̱ dan me se naꞌvej rá Yaꞌanj coto̱j ꞌo̱ soꞌ ga̱ ꞌó yuvii̱ sese né ni̱ca̱ soꞌ me, ne̱ naꞌvej rá Yaꞌanj ticavi̱ꞌ yuvii̱ man tuviꞌ yuvii̱, ne̱ naꞌvej rá Yaꞌanj quiꞌya̱j itu̱u̱ yuvii̱, ne̱ naꞌvej rá Yaꞌanj gu̱un rá yuvii̱ ni̱ꞌyaj yuvii̱ siꞌyaj tuviꞌ yuvii̱ maꞌ. Nihánj me suun noco̱o caꞌneꞌ Yaꞌanj ga̱a naá, ne̱ vaa uxrá doj suun caꞌneꞌ Yaꞌanj uún, tza̱j ne̱ vaa o̱rúnꞌ suun achiin uxrá quiꞌya̱j níꞌ cuano̱, ne̱ suun yoꞌ taj a: “A̱ se ꞌe̱e̱ rá so̱ꞌ man ma̱ꞌán so̱ꞌ roꞌ, da̱nj ga̱a̱ ꞌe̱e̱ rá so̱ꞌ man tuvíꞌ so̱ꞌ á.”

¹⁰ Sese ꞌe̱e̱ rá soj tuviꞌ soj, ne̱ se̱ quiꞌyaj chiꞌi̱i̱ soj man tuviꞌ soj maꞌ. Cheꞌé dan sese ꞌe̱e̱ rá soj tuviꞌ soj, ne̱ si̱j uno nu̱ꞌ tucuáán cuchruj Yaꞌanj ga̱a naá me maꞌa̱n soj ado̱nj.

Ase vaa quiꞌyaj Cristó roꞌ, da̱nj ga̱a̱ quiꞌya̱j níꞌ uún a

¹¹ Da̱nj quiꞌya̱j nij soj, ga̱a̱ ꞌe̱e̱ rá nij soj tuviꞌ soj á. ꞌO̱ se neꞌen soj da̱j vaa chumii̱ nihánj cuano̱ na̱nj á. Xca̱j soj cuentá á. Dan me se asi̱j naca̱ cuchumán rá níꞌ niꞌya̱j níꞌ man Cristó, ne̱ nichrunꞌ güii nani̱i̱ níꞌ rihaan sayuun ne̱ cavi̱i̱ sa̱ꞌ níꞌ, rá níꞌ, tza̱j ne̱ cuano̱ nihánj me se ya̱ nichrunꞌ güii yoꞌ ado̱nj.

¹² Dan me se nichrunꞌ rá ranga̱ꞌ, ne̱ da̱j doj quisi̱j güii caꞌna̱ꞌ Cristó, ne̱ cheꞌé dan se̱ quiꞌyaj níꞌ cacunꞌ nda̱a vaa ꞌyaj yuvii̱ chéé rej nii̱ maꞌ. ꞌO̱ se adi̱ꞌ se chuguu̱n rej ranga̱ꞌ roꞌ, da̱nj ga̱a̱ cuchugu̱u̱n nimán níꞌ, ne̱ ꞌo̱ ga̱a̱ nucua̱j níꞌ quiꞌya̱j níꞌ se‑su̱u̱n Yaꞌanj á.

¹³ Cheꞌé se cuchugu̱u̱n nimán níꞌ, cheꞌé dan ina̱nj veꞌé quiꞌya̱j níꞌ, ne̱ se̱ cachéé níꞌ chaꞌanj snúú rmaꞌa̱n do̱ꞌ, se̱ guun xno̱ níꞌ do̱ꞌ, se̱ cotoj níꞌ ga̱ ꞌó yuvii̱ né ni̱ca̱ níꞌ me do̱ꞌ, se̱ canó tuviꞌ níꞌ do̱ꞌ, se̱ guun xco̱j ruva̱a̱ rá níꞌ ni̱ꞌyaj níꞌ tuviꞌ níꞌ do̱ꞌ maꞌ.

¹⁴ Se̱ guun rá níꞌ quiꞌya̱j níꞌ nda̱a vaa me rá nee̱ man níꞌ maꞌ. Tana̱nj tu̱cuꞌyón níꞌ nda̱a vaa quiꞌyaj Jesucristó Si̱j ꞌNi̱j Raꞌa man níꞌ, ne̱ ase vaa quiꞌyaj soꞌ roꞌ, da̱nj ga̱a̱ quiꞌya̱j gue̱e̱ níꞌ na̱nj ado̱nj.