Romanos 11 - Triqui de San Juan CopalaCunuu ꞌe̱e̱ rá Yaꞌanj niꞌya̱j Yaꞌanj taꞌa̱j nij yuvii̱ israelitá a 1 Cheꞌé se tucuáá nij yuvii̱ israelitá rihaan Yaꞌanj, cheꞌé dan quiriꞌíj yaníj Yaꞌanj man nij soꞌ, rá soj naꞌ. Taj maꞌ. ꞌO̱ se ma̱ꞌanj do̱ꞌ me síí israelitá ado̱nj. Ne̱ dan me se xií ꞌu̱nj me síí cuꞌna̱j Abraham, síí cayáán ga̱a naá, ne̱ síí noco̱ꞌ xꞌneꞌ síí cuꞌna̱j Benjamín, síí cayáán ga̱a naá, mej na̱nj ado̱nj. 2 Ne quiriꞌi̱j yaníj Yaꞌanj man se‑chuma̱nꞌ soꞌ nij yuvii̱ israelitá maꞌ. ꞌO̱ se ga̱a ataa quiꞌya̱j Yaꞌanj chumii̱, ne̱ ꞌo̱ queneꞌen Yaꞌanj se vaa canoco̱ꞌ nij soꞌ man Yaꞌanj a. Neꞌen nij soj da̱j taj Danj Yaꞌanj cheꞌé síí cuꞌna̱j Elías ga̱a naá ga̱a cutaꞌ soꞌ cacunꞌ xráá nij yuvii̱ israelitá, 3 ne̱ cataj soꞌ a: “Señor, ticaviꞌ nij yuvii̱ israelitá man nij síí nataꞌ snana̱ so̱ꞌ rihaan yuvii̱ á. Tiriꞌ nij soꞌ chraan altar aráj gue̱e̱ yuvii̱ rihaan so̱ꞌ á. Ta̱j o̱rúnꞌ ꞌu̱nj quináj na̱nj á. Ne̱ me rá nij soꞌ ticavi̱ꞌ nij soꞌ mán ꞌu̱nj uún ado̱nj.” Da̱nj cataj Elías rihaan Yaꞌanj a. 4 Ga̱a ne̱ caꞌmii uún Yaꞌanj rihaan soꞌ, cataj Yaꞌanj a: “Taj maꞌ. Né o̱ruún so̱ꞌ quináj maꞌ. Tana̱nj vaa ꞌó chi̱j ya̱ míj yuvii̱ israelitá noco̱ꞌ manj, ne̱ a̱ ꞌó nij soꞌ ne cara̱a̱ gue̱e̱ rihaan yaꞌanj cuꞌna̱j Baal maꞌ.” Da̱nj caꞌmii Yaꞌanj rihaan Elías a. 5 Ne̱ veé da̱nj vaa uún nij yuvii̱ israelitá síí ma̱n cuano̱, ne̱ cunuu ꞌe̱e̱ rá Yaꞌanj man nij yuvii̱ israelitá, ne̱ narii Yaꞌanj man do̱j tuviꞌ nij soꞌ ado̱nj. 6 Ina̱nj da̱nj quiꞌyaj maꞌa̱n Yaꞌanj cheꞌé taꞌa̱j nij yuvii̱ israelitá, tza̱j ne̱ né cheꞌe̱ se sa̱ꞌ quiꞌyaj maꞌa̱n nij soꞌ me narii Yaꞌanj man nij soꞌ maꞌ. Sese cheꞌe̱ se sa̱ꞌ quiꞌyaj nij soꞌ narii Yaꞌanj man nij soꞌ, ne̱ taj cheꞌé cata̱j níꞌ se vaa cunuu ꞌe̱e̱ rá u̱u̱n Yaꞌanj man nij soꞌ maꞌ. Vaa güii cunu̱u sa̱ꞌ uún nij yuvii̱ israelitá rihaan Yaꞌanj a 7 Cuano̱ roꞌ, cunuda̱nj nij yuvii̱ israelitá me rá cunu̱u sa̱ꞌ rihaan Yaꞌanj, tza̱j ne̱ ne gu̱un nucua̱j cunuda̱nj nij soꞌ cunu̱u sa̱ꞌ maꞌa̱n nij soꞌ maꞌ. Tza̱j ne̱ narii Yaꞌanj man taꞌa̱j nij soꞌ, ne̱ cunuu sa̱ꞌ taꞌa̱j nij soꞌ rihaan Yaꞌanj, ne̱ quináj u̱u̱n ꞌó taꞌa̱j nij yuvii̱ israelitá yoꞌ a. Ne̱ xa̱ꞌ nij síí quináj me se ne gu̱un nucua̱j nij soꞌ daj chiha̱a̱ míj xca̱j nij soꞌ cuentá cheꞌé Yaꞌanj maꞌ. 8 Dan me se na̱nj taj uún Danj Yaꞌanj a: “Ne caꞌve̱e xca̱j nij soꞌ cuentá, quiꞌyaj Yaꞌanj maꞌ. ꞌO̱ se ase vaa síí tuchri̱i do̱ꞌ, ase vaa síí soꞌo̱ do̱ꞌ, da̱nj vaa nij soꞌ nda̱a cuano̱ na̱nj ado̱nj.” Da̱nj caꞌmii Danj Yaꞌanj cheꞌé nij yuvii̱ israelitá a. 9 ꞌO̱ cuya̱a̱n vaa nana̱ nihánj ga̱ nana̱ caꞌmii rey cuꞌna̱j David ga̱a naá uún, ne̱ cataj soꞌ se vaa ase ranꞌ xcuu ataꞌ raꞌngaꞌ roꞌ, da̱nj quira̱nꞌ nij yuvii̱ israelitá a. Dan me se cavii sa̱ꞌ uxrá nij soꞌ rihaan chumii̱ nihánj, tza̱j ne̱ ta̱j niꞌyo̱n quira̱nꞌ nij soꞌ sayuun cheꞌé nu̱ꞌ sayuun quiꞌyaj nij soꞌ a. 10 Se̱ guun nucua̱j nij soꞌ xca̱j nij soꞌ cuentá, ma̱an se nano̱ ndoꞌo rá nij soꞌ cheꞌé sayuun quira̱nꞌ nij soꞌ a. Da̱nj caꞌmii David na̱nj ado̱nj. 11 Dan me se ne cuchuma̱n rá nij yuvii̱ israelitá nana̱ caꞌmii Yaꞌanj, ga̱a ne̱ quiriꞌ nij soꞌ rihaan Yaꞌanj, ne̱ veé da̱nj ga̱a̱ nij soꞌ nu̱ꞌ cavii nu̱ꞌ caꞌanj, rá nij soj naꞌ. Taj maꞌ. ꞌO̱ se cheꞌé se vaa quiꞌyaj nij yuvii̱ israelitá, cheꞌé dan vaa yaꞌnúj rihaan nij yuvii̱ yaníj nani̱i̱ nij soꞌ rihaan sayuun ne̱ cavi̱i̱ sa̱ꞌ nij soꞌ, ga̱a ne̱ gu̱un xco̱j ruva̱a̱ rá nij yuvii̱ israelitá ni̱ꞌyaj nij soꞌ nij yuvii̱ yaníj a. 12 Ga̱a ne̱ nuchra̱nꞌ nimán nij yuvii̱ israelitá, ne̱ canoco̱ꞌ nij soꞌ Yaꞌanj ado̱nj. Dan me se cheꞌé se quiriꞌ nij soꞌ rihaan Yaꞌanj, ne̱ cheꞌé dan cavii sa̱ꞌ nij yuvii̱ ma̱n rihaan chumii̱, ne̱ nda̱a nij yuvii̱ yaníj cavii sa̱ꞌ, tza̱j ne̱ asa̱ꞌ nuu sa̱ꞌ nij yuvii̱ israelitá rihaan Yaꞌanj, ne̱ doj a̱ cavi̱i̱ sa̱ꞌ uún nij yuvii̱ ma̱n rihaan chumii̱ ado̱nj. Se̱ guun caꞌmi̱i̱ xta̱ꞌ nij yuvii̱ yaníj rihaan nij yuvii̱ israelitá maꞌ 13 Cuano̱ roꞌ, caꞌmi̱j rihaan nij soj si̱j yaníj, ne̱ a̱j cuneꞌ Jesucristó mán ꞌu̱nj caꞌa̱nj nata̱ꞌ ꞌu̱nj snana̱ soꞌ rihaan nij soj si̱j yaníj ado̱nj. Ne̱ vaa se uun ndoꞌo suun caꞌneꞌ Jesucristó rihanj, raj chugua̱nj. 14 ꞌO̱ se me raj gu̱un xco̱j rá nij soꞌ ni̱ꞌyaj nij soꞌ man soj si̱j yaníj, ga̱a ne̱ canoco̱ꞌ taꞌa̱j nij soꞌ nana̱ noco̱ꞌ soj, ga̱a ne̱ nani̱i̱ nij soꞌ rihaan sayuun ne̱ cavi̱i̱ sa̱ꞌ nij soꞌ, raj a. 15 Ga̱a quiriꞌíj yaníj Yaꞌanj man nij yuvii̱ israelitá, ne̱ cunuu rcuaꞌa̱a̱n ꞌó nij yuvii̱ ma̱n rihaan chumii̱ ga̱ Yaꞌanj, ne̱ asa̱ꞌ nacaj uún Yaꞌanj man nij yuvii̱ israelitá, ne̱ ase vaa síí naꞌnúj roꞌ, da̱nj ga̱a̱ nij soꞌ, cavi̱i̱ sa̱ꞌ uxrá nij soꞌ na̱nj á. 16 Ya̱ naca̱j uún Yaꞌanj man nij yuvii̱ israelitá na̱nj á. ꞌO̱ se neꞌen níꞌ se vaa sese rque̱ nii cunj ꞌnúú trigó rii nii asino ya̱a̱n rihaan Yaꞌanj, ne̱ cunu̱u sa̱ꞌ cunu̱ꞌ cunj a. Ne̱ sese sa̱ꞌ vaa yáá chruun rihaan Yaꞌanj, ne̱ sa̱ꞌ vaa cunu̱ꞌ chruun yoꞌ ado̱nj. Cheꞌé dan neꞌen níꞌ se vaa sese cunu̱u sa̱ꞌ taꞌa̱j nij yuvii̱ israelitá rihaan Yaꞌanj, ne̱ cunu̱u sa̱ꞌ cunuda̱nj nij yuvii̱ israelitá ado̱nj. 17 Neꞌen soj se vaa ne cuchuma̱n rá taꞌa̱j nij yuvii̱ israelitá ni̱ꞌyaj nij soꞌ Yaꞌanj maꞌ. Cheꞌé dan, ase vaa ꞌyaj nii man taꞌa̱j nij raꞌa chruun olivó ne rii chruj roꞌ, da̱nj vaa quiꞌyaj Yaꞌanj man nij soꞌ, ne̱ quiriꞌíj yaníj Yaꞌanj man nij síí ne cuchuma̱n rá yoꞌ, ga̱a ne̱ nacaj Yaꞌanj man soj si̱j yaníj, ne̱ dan me se ase vaa raꞌa chruun olivó nicu̱nꞌ rcoꞌ quij vaa soj, tza̱j ne̱ nacaj Yaꞌanj man soj, notaꞌ Yaꞌanj man soj tacóó chruun olivó sa̱ꞌ, ne̱ guun soj ꞌo̱ chruun sa̱ꞌ vaa, ne̱ vaa iꞌna̱ꞌ soj, ꞌyaj yáá chruun yoꞌ na̱nj ado̱nj. 18 Tza̱j ne̱ se̱ guun cata̱j soj se vaa sa̱ꞌ doj vaa soj rihaan raꞌa chruun caꞌanj yaníj quiꞌyaj Yaꞌanj maꞌ. Dan me se sese vaa se uun uxrá maꞌa̱n soj rá soj, ne̱ xca̱j soj cuentá se vaa taj se uun soj rihaan yáá chruun yoꞌ maꞌ. ꞌO̱ se maꞌa̱n yáá chruun yoꞌ ꞌyaj dan aꞌvee vaa iꞌna̱ꞌ soj si̱j uun raꞌa chruun chugua̱nj. Xa̱ꞌ soj, tza̱j ne̱ ma̱an chruun leꞌe̱j nataꞌ nayón u̱u̱n me soj na̱nj ado̱nj. 19 Xraj, ne̱ cata̱j ꞌo̱ tuviꞌ soj a: “Tza̱j ne̱ quiriꞌíj yaníj Yaꞌanj man ꞌó nij raꞌa chruun yoꞌ cheꞌé rej caꞌve̱e caxri̱i̱ soꞌ mán ꞌu̱nj tacóó chruun yoꞌ ado̱nj”, rá ꞌo̱ tuviꞌ soj a. 20 Tza̱j ne̱ ma̱an cheꞌé se né si̱j amán rá niꞌya̱j Yaꞌanj me taꞌa̱j nij yuvii̱ israelitá yoꞌ me quiriꞌíj yaníj Yaꞌanj man nij soꞌ, ne̱ ma̱an cheꞌé se amán rá soj niꞌya̱j soj Yaꞌanj me nicunꞌ soj rihaan Yaꞌanj cuano̱ chugua̱nj. Tza̱j ne̱ se̱ guun cata̱j soj se vaa vaa se uun ndoꞌo soj maꞌ. Tana̱nj cuchuꞌvi̱ꞌ nimán soj á. 21 Dan me se nda̱ꞌ se chru̱un cavii man raa̱ chruun ya̱ me nij síí israelitá, tza̱j ne̱ ne cara̱a̱ xꞌnaa Yaꞌanj rihaan nij soꞌ, ne̱ quiriꞌíj yaníj Yaꞌanj man maꞌa̱n ya̱ nij soꞌ, ne̱ cheꞌé dan táá a̱ soj, ne̱ se̱ cuchuꞌviꞌ Yaꞌanj quiriꞌi̱j yaníj Yaꞌanj man soj si̱j raꞌa chruun olivó ma̱n rcoꞌ a̱ maꞌ. 22 Dan me se xca̱j soj cuentá, ne̱ nda̱ꞌ se yuva̱a̱ ya̱ Yaꞌanj ne̱ neꞌen Yaꞌanj quiꞌya̱j soꞌ sayuun man nij yuvii̱ ꞌyaj se nij rihaan soꞌ, tza̱j ne̱ cunuu ꞌe̱e̱ rá Yaꞌanj man soj, ne̱ veꞌé ndoꞌo quiꞌyaj Yaꞌanj rihaan soj ado̱nj. Ne̱ veꞌé quiꞌya̱j Yaꞌanj rihaan soj nu̱ꞌ cavii nu̱ꞌ caꞌanj, sese se̱ caꞌanj yaníj soj rihaan Yaꞌanj maꞌ. Sese caꞌa̱nj yaníj soj, ne̱ quiriꞌi̱j yaníj Yaꞌanj man soj uún na̱nj ado̱nj. 23 Ne̱ xa̱ꞌ nij yuvii̱ quiriꞌíj yaníj Yaꞌanj, tza̱j ne̱ sese caꞌne̱ꞌ rá nij soꞌ ga̱ suun ne amán rá niꞌya̱j man Yaꞌanj, ne̱ caꞌve̱e nacuta̱ꞌ uún Yaꞌanj man nij soꞌ tacóó chruun sa̱ꞌ yoꞌ na̱nj ado̱nj. ꞌO̱ se gu̱un nucua̱j Yaꞌanj quiꞌya̱j Yaꞌanj da̱nj ado̱nj. 24 Da̱nj na̱nj soj, ne̱ chru̱un leꞌe̱j cavii raa̱ chruun olivó ma̱n rcoꞌ me soj, tza̱j ne̱ caꞌvee caꞌnaꞌ soj nataꞌ soj tacóó chruun sa̱ꞌ, ne̱ táá a̱ nij síí israelitá, ne̱ ma̱an raꞌa chruun sa̱ꞌ me nij soꞌ, ne̱ taj sayuun caꞌve̱e caꞌna̱ꞌ uún nij soꞌ nacuta̱ꞌ uún nij soꞌ tacóó chruun sa̱ꞌ cavii nij soꞌ a̱ maꞌ. Me rá Yaꞌanj ga̱a̱ ꞌe̱e̱ rá Yaꞌanj man cunuda̱nj yuvii̱ a 25 Dan me se me raj xca̱j soj cuentá cheꞌé nana̱ sa̱ꞌ yuve̱ cataj xnaꞌanj Yaꞌanj rihaan níꞌ, tinu̱j, nocoj. Síj cuno soj nana̱ nihánj, ga̱a ne̱ se̱ guun caꞌmi̱i̱ xta̱ꞌ soj maꞌ. Cuano̱ nihánj me se naꞌvee xca̱j nij yuvii̱ israelitá cuentá cheꞌé se vaa quiꞌyaj Yaꞌanj cheꞌé nij soꞌ maꞌ. Cheꞌé dan vaa yaꞌnúj catu̱u̱ soj si̱j yaníj canoco̱ꞌ soj man Yaꞌanj ado̱nj. Ne̱ xa̱ꞌ nij síí yaníj narii Yaꞌanj, tza̱j ne̱ vaa güii canoco̱ꞌ cunuda̱nj nij soꞌ man Yaꞌanj, ga̱a ne̱ cuchuma̱n rá nij yuvii̱ israelitá ni̱ꞌyaj nij soꞌ man Yaꞌanj, 26 ga̱a ne̱ ti̱nanii Yaꞌanj man cunuda̱nj nij yuvii̱ israelitá rihaan chrej chiꞌi̱i̱ do̱ꞌ, rihaan sayuun do̱ꞌ na̱nj á. Da̱nj aꞌmii Danj Yaꞌanj, taj yoꞌ a: Chumanꞌ Sion cavi̱i̱ ꞌo̱ síí ti̱nanii man yuvii̱, ne̱ tinavi̱j soꞌ se chiꞌi̱i̱ ma̱n nimán nij yuvii̱ israelitá a. 27 Da̱nj cataꞌ tuꞌvá ꞌu̱nj rihaan nij soꞌ cheꞌé güii ti̱navíí ꞌu̱nj cacunꞌ tumé nij soꞌ ado̱nj. Dan me nana̱ no̱ rihaan Danj Yaꞌanj a. 28 Dan me se ne gu̱un ya̱ rá nij yuvii̱ israelitá nana̱ sa̱ꞌ cheꞌé Cristó maꞌ. Cheꞌé dan guun yaníj nij soꞌ rihaan Yaꞌanj, ne̱ vaa yaꞌnúj rihaan Yaꞌanj catu̱u̱ soj si̱j yaníj a. Tza̱j ne̱ asi̱j naá narii Yaꞌanj man nij xi̱i nij yuvii̱ israelitá, ne̱ cheꞌé dan ꞌo̱ ꞌe̱e̱ rá Yaꞌanj man nij soꞌ nda̱a cuano̱ ado̱nj. 29 Daj chiha̱a̱ míj se̱ natuná Yaꞌanj snana̱ Yaꞌanj maꞌ. Se̱ caꞌvee caꞌne̱e̱ uún Yaꞌanj se vaa rqué Yaꞌanj rihaan yuvii̱ maꞌ. ꞌO̱ se asi̱j naá narii Yaꞌanj man nij yuvii̱ israelitá canoco̱ꞌ nij soꞌ man soꞌ, ne̱ se̱ caꞌvee cata̱j uún Yaꞌanj se vaa se̱ caꞌvej rá soꞌ naca̱j soꞌ man nij soꞌ maꞌ. 30 Dan me se asino ya̱a̱n ne cuno̱ nij soj si̱j yaníj rihaan Yaꞌanj maꞌ. Tza̱j ne̱ ne cuchuma̱n rá nij yuvii̱ israelitá ni̱ꞌyaj nij soꞌ man Yaꞌanj, ne̱ cheꞌé dan cunuu ꞌe̱e̱ rá Yaꞌanj man soj a. 31 Veé dan ne uno nij yuvii̱ israelitá rihaan Yaꞌanj cuano̱ maꞌ. Tza̱j ne̱ vaa güii cunu̱u ꞌe̱e̱ rá uún Yaꞌanj man nij soꞌ ado̱nj. 32 Dan me se ꞌo̱ cuya̱a̱n vaa nij yuvii̱ israelitá ga̱ nij yuvii̱ yaníj, quiꞌyaj Yaꞌanj, ne̱ cunuda̱nj nij yuvii̱ naꞌvej rá cuno̱ rihaan Yaꞌanj, ne̱ cheꞌé dan vaa yaꞌnúj rihaan Yaꞌanj cunu̱u ꞌe̱e̱ rá Yaꞌanj man cunuda̱nj nij yuvii̱, ne̱ ra̱cuíj u̱u̱n Yaꞌanj man cunuda̱nj nij yuvii̱ yoꞌ ado̱nj. Sa̱ꞌ uxrá vaa Yaꞌanj ado̱nj 33 Ina̱nj sa̱ꞌ uxrá avii raa̱ Yaꞌanj na̱nj á. Sa̱ꞌ uxrá neꞌen soꞌ, ne̱ se̱ guun nucua̱j yuvii̱ naquiꞌya̱j cu̱u yuvii̱ nu̱ꞌ se vaa ꞌyaj Yaꞌanj maꞌ. Veé da̱nj caꞌmii ꞌo̱ síí nataꞌ snana̱ Yaꞌanj ga̱a naá, cataj soꞌ a: 34 “Taj va̱j yuvii̱ quisi̱j nari̱ꞌ nana̱ avii raa̱ Yaꞌanj maꞌ. Me yuvii̱ caꞌve̱e nago̱ꞌ nana̱ cu̱u man Yaꞌanj, rá soj ga̱.” 35 Ne̱ ꞌó soꞌ cataj a: “Me rasu̱u̱n caꞌve̱e rque̱ yuvii̱ man Yaꞌanj, rá soj ga̱. ꞌO̱ se ne achiin siꞌyaj yuvii̱ man Yaꞌanj maꞌ. Ne ꞌyaj xcúún Yaꞌanj rihaan yuvii̱ maꞌ.” Da̱nj taj síí nataꞌ snana̱ Yaꞌanj ga̱a naá a. 36 Dan me se maꞌa̱n Yaꞌanj quiꞌyaj cunuda̱nj rasu̱u̱n, ne̱ cheꞌé maꞌa̱n Yaꞌanj mán rasu̱u̱n rihaan chumii̱, ne̱ se rásuun Yaꞌanj me cunuda̱nj rasu̱u̱n a. Veꞌé uxrá caꞌmi̱i̱ cunuda̱nj yuvii̱ cheꞌé Yaꞌanj nu̱ꞌ cavii nu̱ꞌ caꞌanj ado̱nj. Veé da̱nj ga̱a̱ ya̱ ado̱nj. |
© Wycliffe Bible Translators, Inc. 2024 segunda versión electrónica
Wycliffe Bible Translators, Inc.