Romanos 10 - Triqui de San Juan Copala

¹ Dan me se achíín niꞌya̱j ndoꞌoj rihaan Yaꞌanj cheꞌé nij tuvíꞌ ꞌu̱nj nij yuvii̱ israelitá, tinu̱j, nocoj. Nda̱a nimán yaj ꞌe̱e̱ rá ꞌu̱nj man nij soꞌ, ne̱ cheꞌé dan me ndoꞌo raj nani̱i̱ nij soꞌ rihaan sayuun ne̱ cavi̱i̱ sa̱ꞌ nij soꞌ a.

² Dan me se sa̱ꞌ quiꞌyaj nij soꞌ ga̱a guun ndoꞌo rá nij soꞌ cunu̱u sa̱ꞌ nij soꞌ rihaan Yaꞌanj, rá ꞌu̱nj, tza̱j ne̱ ne neꞌen nij soꞌ da̱j quiꞌya̱j nij soꞌ ne̱ caꞌve̱e cunu̱u sa̱ꞌ nij soꞌ rihaan Yaꞌanj maꞌ.

³ Ne xca̱j nij soꞌ cuentá cheꞌé se vaa a̱j quiꞌyaj Yaꞌanj cheꞌé nij soꞌ, ne̱ ne xca̱j nij soꞌ cuentá se vaa caꞌve̱e cunu̱u sa̱ꞌ nij soꞌ rihaan Yaꞌanj, quiꞌya̱j maꞌa̱n Yaꞌanj maꞌ. Ma̱an se nanoꞌ maꞌa̱n nij soꞌ chrej cunu̱u sa̱ꞌ maꞌa̱n nij soꞌ rihaan Yaꞌanj, ne̱ cheꞌé dan ataa quiꞌya̱j nij soꞌ nda̱a vaa me rá Yaꞌanj quiꞌya̱j nij soꞌ, ne̱ cheꞌé dan ataa cunu̱u sa̱ꞌ nij soꞌ ado̱nj.

⁴ Ga̱a naá, ne̱ canocoꞌ yuvii̱ stucua̱nj Moisés, ne̱ veé dan me se cunu̱u sa̱ꞌ nij soꞌ rihaan Yaꞌanj, rá nij soꞌ, tza̱j ne̱ ya̱j nihánj me se a̱j quisíj stucua̱nj Moisés, quiꞌyaj Cristó, ne̱ ꞌo̱ se ꞌo̱ cuchuma̱n rá níꞌ ni̱ꞌyaj níꞌ man Cristó, ga̱a ne̱ cunu̱u sa̱ꞌ níꞌ rihaan Yaꞌanj na̱nj ado̱nj.

Nani̱i̱ cunuda̱nj nij yuvii̱ cuchumán rá niꞌya̱j man Cristó rihaan sayuun a

⁵ Ga̱a naá cachrón síí cuꞌna̱j Moisés nana̱ rihaan yanj, caꞌmii soꞌ cheꞌé stucua̱nj Yaꞌanj, ne̱ cataj soꞌ se vaa sese gu̱un nucua̱j yuvii̱ cuno̱ yuvii̱ nu̱ꞌ tucuáán cuchruj Yaꞌanj, ne̱ ca̱yáán nij yuvii̱ rihaan Yaꞌanj nu̱ꞌ cavii nu̱ꞌ caꞌanj a. Da̱nj caꞌmii Moisés ga̱a naá a.

⁶ Tza̱j ne̱ cuano̱ nihánj me se a̱j xcaj níꞌ cuentá se vaa nuu sa̱ꞌ níꞌ rihaan Yaꞌanj cheꞌé se cuchumán rá níꞌ cuno níꞌ nana̱ caꞌmii soꞌ, ne̱ cheꞌé dan ꞌo̱ aꞌmii níꞌ ase vaa caꞌmii síí cuꞌna̱j Moisés ga̱a naá, taj níꞌ se vaa taj cheꞌé cavi̱i̱ yuvii̱ rej xta̱ꞌ nano̱ꞌ nij yuvii̱ man Síí Caꞌnéé Yaꞌanj Ti̱nanii man Yuvii̱ rihaan Sayuun,

⁷ ne̱ taj cheꞌé caꞌa̱nj yuvii̱ rej rque yoꞌóó nano̱ꞌ nij yuvii̱ man soꞌ rej ma̱n nimán maꞌ.

⁸ Ne̱ cataj uún Moisés se vaa nana̱ achiin mán so̱ꞌ roꞌ, né na̱na̱ caꞌna̱ꞌ rej ga̱nꞌ me nana̱ yoꞌ maꞌ. Tana̱nj nda̱a tuꞌva ma̱ꞌán so̱ꞌ do̱ꞌ, nda̱a nimán ma̱ꞌán so̱ꞌ do̱ꞌ, nuû nana̱ yoꞌ na̱nj ado̱nj, taj Moisés, ne̱ nana̱ yoꞌ me nana̱ aꞌmii yuvii̱ taj yuvii̱ se vaa amán rá yuvii̱ niꞌya̱j yuvii̱ man Cristó, nda̱a vaa aꞌmii natáj núj rihaan yuvii̱ ado̱nj.

⁹ ꞌO̱ se sese caꞌmi̱i̱ yá so̱ꞌ cata̱j so̱ꞌ rihaan tuvíꞌ so̱ꞌ se vaa Jesús me Síí ꞌNi̱j Raꞌa man níꞌ, ne̱ sese gu̱un ya̱ rá nimán so̱ꞌ se vaa cunuu iꞌna̱ꞌ uún Jesús, quiꞌyaj Yaꞌanj, ga̱a caviꞌ soꞌ, ne̱ nani̱i̱ so̱ꞌ rihaan sayuun ne̱ cavi̱i̱ sa̱ꞌ so̱ꞌ a.

¹⁰ ꞌO̱ se nimán níꞌ me se cuchuma̱n rá níꞌ ni̱ꞌyaj níꞌ Jesús, ne̱ caꞌve̱e cunu̱u sa̱ꞌ níꞌ rihaan Yaꞌanj, ne̱ tuꞌva níꞌ me se caꞌmi̱i̱ ya̱ níꞌ cata̱j níꞌ se vaa noco̱ꞌ níꞌ man Jesús, ne̱ caꞌve̱e nani̱i̱ níꞌ rihaan sayuun ne̱ cavi̱i̱ sa̱ꞌ níꞌ ado̱nj.

¹¹ Dan me se taj uún Danj Yaꞌanj se vaa xa̱ꞌ síí amán rá niꞌya̱j man Yaꞌanj, tza̱j ne̱ se̱ guun naꞌa̱j soꞌ maꞌ.

¹² ꞌO̱ se ꞌo̱ cuya̱a̱n vaa nij yuvii̱ israelitá do̱ꞌ, nij yuvii̱ yaníj do̱ꞌ, cheꞌé se maꞌa̱n Síí ꞌNi̱j Raꞌa man níꞌ me se ꞌnij raꞌa soꞌ man cunuda̱nj nij soꞌ, ne̱ uxrá ra̱cuíj soꞌ man cunuda̱nj yuvii̱ achíín niꞌya̱j rihaan soꞌ a.

¹³ Dan me se taj uún Danj Yaꞌanj a: “Ne̱ cunuda̱nj nij síí cata̱ꞌ tuꞌva se‑chuvi̱i Síí ꞌNi̱j Raꞌa man níꞌ roꞌ, nani̱i̱ nij soꞌ rihaan sayuun ado̱nj.” Da̱nj taj Danj Yaꞌanj a.

Achiin caꞌmi̱i̱ natáj nii cheꞌé Cristó rihaan yuvii̱ ataa cuno̱ snana̱ soꞌ a

¹⁴ Tza̱j ne̱ asa̱ꞌ caꞌve̱e cachi̱nj niꞌya̱j yuvii̱ rihaan Cristó, sese ataa cuchuma̱n rá nij yuvii̱ ni̱ꞌyaj nij yuvii̱ man Cristó ga̱an. Ne̱ asa̱ꞌ caꞌve̱e cuchuma̱n rá nij yuvii̱ ni̱ꞌyaj nij yuvii̱ man soꞌ, sese ataa cuno̱ nij yuvii̱ snana̱ soꞌ ga̱an. Ne̱ asa̱ꞌ caꞌve̱e cuno̱ nij yuvii̱, sese taj síí aꞌmii natáj rihaan nij yuvii̱ ga̱an.

¹⁵ Ne̱ asa̱ꞌ cuchi̱ꞌ síí aꞌmii natáj rihaan yuvii̱, sese se̱ caꞌnéé nii man soꞌ ga̱an. Dan me se aꞌmii uún Danj Yaꞌanj, taj yoꞌ a: “Veꞌé ndoꞌo ꞌyaj síí ꞌanj caꞌmi̱i̱ natáj nana̱ sa̱ꞌ ado̱nj.” Da̱nj taj Danj Yaꞌanj a.

¹⁶ Tza̱j ne̱ vaa yuvii̱ naꞌvej rá cuno̱ nana̱ sa̱ꞌ maꞌ. Ina̱nj da̱nj caꞌmii síí cuꞌna̱j Isaías ga̱a cachíín niꞌya̱j soꞌ rihaan Yaꞌanj, ne̱ cataj soꞌ a: “Señor, do̱j yuvii̱ amán rá cuno nana̱ caꞌmii natáj núj a”, taj soꞌ rihaan Yaꞌanj a.

¹⁷ Tza̱j ne̱ veé dan me se asino aꞌmii natáj nii rihaan yuvii̱ cheꞌé Cristó, ga̱a ne̱ uno nij yuvii̱, ne̱ xcaj nij yuvii̱ cuentá cheꞌé se vaa taj xnaꞌanj Yaꞌanj rihaan nij yuvii̱, ga̱a ne̱ amán rá nij yuvii̱ niꞌya̱j nij yuvii̱ man Yaꞌanj na̱nj ado̱nj.

Naꞌvej rá nij yuvii̱ israelitá cuno̱ nij soꞌ nana̱ sa̱ꞌ cheꞌé Cristó maꞌ

¹⁸ Tza̱j ne̱ xnáꞌanj ꞌu̱nj sese ataa cuchi̱ꞌ nana̱ sa̱ꞌ rihaan nij yuvii̱ israelitá a. Ya̱ ya̱ a̱j cuchiꞌ nana̱ sa̱ꞌ rihaan nij yuvii̱ israelitá na̱nj á. Dan me se taj Danj Yaꞌanj a: A̱j cuno cunuda̱nj nij yuvii̱ ma̱n rihaan yoꞌóó snana̱ Yaꞌanj nana̱ sa̱ꞌ, ne̱ cuchiꞌ snana̱ soꞌ nda̱a nu̱ꞌ rihaan chumii̱ a. Da̱nj aꞌmii Danj Yaꞌanj á.

¹⁹ Tza̱j ne̱ xnáꞌanj uún ꞌu̱nj ꞌo̱ suun rihaan soj a: Ne neꞌen ya̱ nij yuvii̱ israelitá snana̱ Yaꞌanj nana̱ sa̱ꞌ a̱ naꞌ. Asino ya̱a̱n caꞌmii Yaꞌanj ne̱ cachrón Moisés a: Qui̱ꞌyáj se lu̱j cheꞌé yuvii̱ yaníj ne vaa rcuaꞌa̱a̱n, ne̱ cunu̱u xco̱j ruva̱a̱ rá soj a. Qui̱ꞌyáj se vaa cavi̱i̱ sa̱ꞌ ꞌo̱ xꞌneꞌ yuvii̱ naꞌvej xca̱j cuentá, ne̱ caꞌma̱an rá soj a. Da̱nj caꞌmii Yaꞌanj ga̱a naá a.

²⁰ Ne̱ ꞌo̱ cuya̱a̱n vaa nana̱ nihánj ga̱ ꞌó nana̱ cachrón síí cuꞌna̱j Isaías rihaan yanj ga̱a naá, ne̱ dan me se quisíj rá soꞌ cataj soꞌ se vaa nij yuvii̱ yaníj me se ne nanoꞌ nij soꞌ man Yaꞌanj, tza̱j ne̱ nariꞌ nij yuvii̱ yaníj man Yaꞌanj, ne̱ nda̱ꞌ se ne gu̱un rá nij soꞌ queneꞌe̱n nij soꞌ me rej va̱j Yaꞌanj, tza̱j ne̱ curuviꞌ Yaꞌanj rihaan nij soꞌ a. Da̱nj cataj Isaías ga̱a naá a.

²¹ Tza̱j ne̱ ino̱ vaa nana̱ caꞌmii Yaꞌanj rihaan nij yuvii̱ israelitá ga̱a naá, taj Isaías a. Dan me se cataj Yaꞌanj rihaan nij yuvii̱ israelitá se vaa ꞌo̱ me rá Yaꞌanj naca̱j Yaꞌanj man nij yuvii̱ israelitá, tza̱j ne̱ ne caꞌve̱j rá nij soꞌ cuno̱ nij soꞌ rihaan Yaꞌanj maꞌ. Ina̱nj tucuáá nij soꞌ rihaan Yaꞌanj na̱nj á. Da̱nj taj Yaꞌanj, ne̱ cachrón Isaías rihaan yanj a.