Apocalipsis 9 - Triqui de San Juan Copala

¹ Ga̱a ne̱ caꞌyánj se‑mo̱zó Yaꞌanj mozó ꞌu̱nꞌ chruun aꞌyánj, ga̱a ne̱ queneꞌén ꞌu̱nj se vaa cavii ꞌo̱ yatiꞌ rej xta̱ꞌ quinij yoꞌ rihaan yoꞌóó, ga̱a ne̱ rqué nii ragaꞌ rihaan soꞌ nuxra̱ꞌ soꞌ tuꞌva yuꞌuj cunu̱u̱ ndoꞌo a.

² Ga̱a ne̱ nuxraꞌ soꞌ tuꞌva yuꞌuj cunu̱u̱ ndoꞌo, ga̱a ne̱ curiha̱nj ndoꞌo yachruu̱ tuꞌva yuꞌuj yoꞌ, ne̱ ase vaa yachruu̱ avii chrúún hornó xi̱j roꞌ, da̱nj vaa yachruu̱ cavii tuꞌva yuꞌuj yoꞌ a. Ga̱a ne̱ caráán rihaan güii, ne̱ guun rmi̱ꞌ rihaan chumii̱, quiꞌyaj yachruu̱ yoꞌ a.

³ Ga̱a ne̱ curiha̱nj ndoꞌo rquíí rque yachruu̱ yoꞌ, ne̱ caꞌanj nij rquíí rihaan nu̱ꞌ chumii̱, ga̱a ne̱ guun nucua̱j nij rquíí yoꞌ quiꞌyaj nij xoꞌ nda̱a vaa ꞌyaj nij xcuun, quiꞌyaj nii a.

⁴ Ga̱a ne̱ caꞌneꞌ nii suun rihaan nij xoꞌ se vaa se̱ quiꞌyaj nij xoꞌ sayuun man coj chri̱nꞌ do̱ꞌ, man me maꞌa̱n coj do̱ꞌ, man cuêj do̱ꞌ, man nij chruun do̱ꞌ maꞌ. Ma̱an se quiꞌya̱j nij xoꞌ sayuun man ina̱nj nij yuvii̱ nuviꞌ se‑taꞌnga̱ꞌ Yaꞌanj cataꞌ caan rihaan a.

⁵ Ne̱ ne nó xcúún nij xoꞌ ticavi̱ꞌ nij xoꞌ man nij yuvii̱ maꞌ. Ma̱an se ꞌu̱nꞌ ya̱ yavii quiꞌyaj ndoꞌo nij xoꞌ sayuun man nij yuvii̱ a. Ne̱ ase vaa sayuun ꞌyaj xcuun ga̱a xtáj xcuun man yuvii̱ vaa sayuun quiꞌyaj nij rquíí man yuvii̱ yoꞌ a.

⁶ Ne̱ güii va̱j nij rquíí yoꞌ rihaan chumii̱ me se nano̱ꞌ nij yuvii̱ da̱j caꞌve̱e cavi̱ꞌ nij yuvii̱, tza̱j ne̱ se̱ nariꞌ nij yuvii̱ maꞌ. Gu̱un ndoꞌo rá nij yuvii̱ cavi̱ꞌ nij yuvii̱, tza̱j ne̱ cuna̱nj se aviꞌ rihaan nij yuvii̱ a.

⁷ Ne̱ nij rquíí me se ase vaa cuayó ta̱j síí caꞌa̱nj cunu̱ꞌ roꞌ, da̱nj vaa nij xoꞌ curuviꞌ nij xoꞌ, ne̱ ase vaa cachriin agaꞌ oró míí roꞌ, da̱nj vaa se nu̱u̱ raa̱ nij xoꞌ a. Ne̱ ase vaa rihaan yuvii̱ roꞌ, da̱nj vaa rihaan nij xoꞌ a.

⁸ Ne̱ vaa yuvé raa̱ nij xoꞌ, ne̱ ase vaa yuvé raa̱ chana̱ vaa yoꞌ, ne̱ ase vaa cúú yanꞌ chuvaa̱ vaa cúú yanꞌ nij xoꞌ a.

⁹ Ne̱ caráán agaꞌ nu̱ꞌ rucua̱a̱ nij xoꞌ a. Ne̱ da̱j se uun ráꞌ ga̱a unóꞌ queꞌe̱e̱ cuchriꞌ nucua̱j cuayó unánj rej cunu̱ꞌ nii roꞌ, da̱nj guun raj ga̱a cunoj cari̱i̱n scache̱e nij xoꞌ ga̱a chéé nij xoꞌ xta̱ꞌ a.

¹⁰ Ne̱ ase vaa taneꞌ xcuun vaa taneꞌ nij xoꞌ, ne̱ guun nucua̱j nij xoꞌ xtáj nij xoꞌ man yuvii̱, ne̱ cheꞌé dan guun nucua̱j nij xoꞌ quiꞌyaj nij xoꞌ sayuun man yuvii̱ ꞌu̱nꞌ ya̱ yavii a.

¹¹ Ne̱ se‑mo̱zó Yaꞌanj síí tumé yuꞌuj cunu̱u̱ roꞌ, uun chij soꞌ rihaan nij rquíí yoꞌ a. Ne̱ se‑chuvi̱i se‑mo̱zó Yaꞌanj yoꞌ me Abadón xnaꞌánj hebreo, ne̱ Apolión cuꞌna̱j soꞌ xnaꞌánj griego, ne̱ se‑chuvi̱i soꞌ me raj cata̱a se vaa si̱j tiriꞌ rasu̱u̱n me soꞌ a.

¹² Dan me se navij ꞌo̱ nij sayuun noco̱o quira̱nꞌ nij yuvii̱, ne̱ xca̱j soj cuentá se vaa ataa caꞌna̱ꞌ yavíj ro̱j sayuun noco̱o quira̱nꞌ yuvii̱ a.

¹³ Ga̱a ne̱ dan me se caꞌyánj se‑mo̱zó Yaꞌanj mozó vata̱nꞌ chruun aꞌyánj, ga̱a ne̱ cunoj nana̱ caꞌmii ꞌo̱ soꞌ rej tanu̱u̱ nij scúú mesá altar agaꞌ oró míí nicu̱nꞌ rihaan Yaꞌanj a.

¹⁴ Ga̱a ne̱ caꞌmii soꞌ rihaan se‑mo̱zó Yaꞌanj mozó nica̱j chruun aꞌyánj vata̱nꞌ, cataj soꞌ a: ―Na̱ché so̱ꞌ man caꞌa̱nj nij se‑mo̱zó Yaꞌanj síí numi̱i tuꞌva chráá xi̱j cuꞌna̱j Éufrates á ―taj soꞌ rihaan se‑mo̱zó Yaꞌanj yoꞌ a.

¹⁵ Ga̱a ne̱ nache soꞌ caꞌa̱nj nij se‑mo̱zó Yaꞌanj síí cuneꞌ Yaꞌanj cavi̱i̱ ma̱an orá yoꞌ, ma̱an güii yoꞌ, ma̱an yavii yoꞌ, ma̱an yoꞌ ya̱ yoꞌ, cheꞌé rej cavi̱ꞌ ꞌo̱ yuvii̱ rihaan da̱j a̱ vaꞌnu̱j yuvii̱ ma̱n rihaan chumii̱, quiꞌya̱j nij soꞌ na̱nj ado̱nj.

¹⁶ Ne̱ vi̱j cientó millón síí ta̱j xráá cuayó me xꞌneꞌ tanuu noco̱ꞌ man caꞌa̱nj nij se‑mo̱zó Yaꞌanj yoꞌ, taj nii cunoj a.

¹⁷ Ne̱ dan me se ga̱a naquiꞌyaa nu̱ꞌ rasu̱u̱n nihánj rihaan ꞌu̱nj, quiꞌyaj se‑mo̱zó Yaꞌanj yoꞌ, ne̱ queneꞌén ꞌu̱nj man nij cuayó do̱ꞌ, man nij síí ta̱j xráá nij cuayó do̱ꞌ, ne̱ nij soꞌ roꞌ, nica̱j nij soꞌ agaꞌ caráán rucua̱a̱ nij soꞌ, ne̱ dan me se no̱ se mare̱e ndoꞌo, ne̱ no̱ se tintá chro̱n, ne̱ no̱ se míí, nda̱a vaa chuguu̱n yoꞌóó azufré acaa a. Ne̱ ase vaa raa̱ chuvaa̱ vaa raa̱ nij cuayó, ne̱ cavii yaꞌan cavii yachruu̱ cavii azufré cavii tuꞌva nij xoꞌ a.

¹⁸ Ne̱ cheꞌé yaꞌan do̱ꞌ, yachruu̱ do̱ꞌ, azufré do̱ꞌ, cavii tuꞌva nij cuayó roꞌ, cheꞌé dan caviꞌ ꞌo̱ yuvii̱ rihaan da̱j a̱ vaꞌnu̱j yuvii̱ ma̱n rihaan chumii̱ a.

¹⁹ ꞌO̱ se guun nucua̱j nij cuayó ticaviꞌ nij xoꞌ man yuvii̱ cheꞌé rasu̱u̱n cavii tuꞌva nij xoꞌ do̱ꞌ, cheꞌé taneꞌ nij xoꞌ do̱ꞌ a. ꞌO̱ se ase vaa xcuáá vaa taneꞌ nij xoꞌ, ne̱ vaa raa̱ xcuáá yoꞌ, ne̱ quiꞌyaj nij xoꞌ sayuun man yuvii̱, queneꞌenj a.

²⁰ Ne̱ vaa yuvii̱ nanii rihaan sayuun quiꞌyaj nij cuayó yoꞌ, tza̱j ne̱ ne ca̱nica̱j nimán nij soꞌ ta̱náj xco̱ nij soꞌ chrej chiꞌi̱i̱ maꞌ. Tana̱nj ꞌo̱ aráj gue̱e̱ nij soꞌ rihaan nij nana̱ chre̱e do̱ꞌ, rihaan yaꞌanj quiꞌyaj maꞌa̱n yuvii̱ do̱ꞌ, ne̱ yaꞌanj quiꞌyaj maꞌa̱n nij yuvii̱ me se agaꞌ oró míí do̱ꞌ, agaꞌ platá catzi̱i̱ do̱ꞌ, agaꞌ cobré mare̱e do̱ꞌ, yahij do̱ꞌ, chruun do̱ꞌ, me u̱u̱n nij yoꞌ a. Ne̱ dan me se nuviꞌ rihaan nij yoꞌ ni̱ꞌyaj nij yoꞌ do̱ꞌ, nuviꞌ xréé nij yoꞌ cuno̱ nij yoꞌ do̱ꞌ, ne chéé nij yoꞌ do̱ꞌ a̱ maꞌ.

²¹ Dan me se ne ca̱nica̱j nimán nij yuvii̱ caꞌne̱ꞌ rá nij yuvii̱ ga̱ suun ticaviꞌ tuviꞌ do̱ꞌ, ga̱ suun ꞌyaj chre̱e man tuviꞌ do̱ꞌ, ga̱ suun ꞌyaj cacunꞌ ga̱ chana̱ do̱ꞌ, ga̱ suun ꞌyaj itu̱u̱ siꞌyaj tuviꞌ do̱ꞌ a̱ maan ado̱nj.