2 Tesalonicenses 1 - Triqui de San Juan Copala

¹ Síí cuꞌna̱j Pabló do̱ꞌ, Silvano do̱ꞌ, Timoteo do̱ꞌ, me núj, ne̱ ꞌyaj núj yanj cartá nihánj caꞌne̱j núj rihaan nij soj xꞌneꞌ yuvii̱ ya̱nj chumanꞌ cuꞌna̱j Tesalónica si̱j noco̱ꞌ man Rej níꞌ Yaꞌanj do̱ꞌ, man Jesucristó Si̱j ꞌNi̱j Raꞌa man níꞌ do̱ꞌ a.

² Me rá núj quiꞌya̱j Rej níꞌ Yaꞌanj ga̱ Jesucristó Si̱j ꞌNi̱j Raꞌa man níꞌ se lu̱j cheꞌé soj, ne̱ ga̱a̱ xe̱j nimán soj a.

Veꞌé nocoꞌ nij síí amán rá niꞌya̱j man Cristó ya̱nj chumanꞌ Tesalónica man Yaꞌanj a

³ Doj a̱ doj a̱ amán rá soj niꞌya̱j soj man Yaꞌanj, ne̱ nuu ꞌe̱e̱ doj rá ꞌo̱ ꞌo̱ soj tinúú soj da̱j a̱ güii, ne̱ cheꞌé dan no̱ xcúún núj ꞌo̱ cata̱j núj guun niꞌya̱j níꞌ rihaan Yaꞌanj cheꞌé soj, tinu̱j, nocoj.

⁴ Dan me se ꞌo̱ sca̱ꞌ nataꞌ núj rihaan nij xꞌneꞌ yuvii̱ noco̱ꞌ man Yaꞌanj ya̱nj queꞌe̱e̱ chumanꞌ se vaa veꞌé ꞌyaj soj a. Ne̱ dan me se taj núj se vaa ꞌyaj ndoꞌo nii sayuun man soj, tza̱j ne̱ ꞌo̱ amán rá soj niꞌya̱j soj man Yaꞌanj, ne̱ ꞌo̱ vaa sca̱ꞌ rá soj rihaan sayuun, ne̱ ꞌo̱ nocoꞌ xraan soj man Yaꞌanj ado̱nj.

Caꞌmii Pabló cheꞌé güii quiꞌya̱j Yaꞌanj sayuun man nij yuvii̱ ꞌyaj sayuun man nij síí noco̱ꞌ man Cristó a

⁵ Cheꞌé se vaa ꞌyaj soj, cheꞌé dan neꞌen níꞌ se vaa nica̱ vaa nana̱ cataj xnaꞌanj Yaꞌanj cheꞌé soj a. Dan me se nuchruj ra̱a̱ Yaꞌanj cheꞌé soj, ne̱ cataj xnaꞌanj Yaꞌanj se vaa caꞌve̱e ca̱yáán soj rej gu̱un chij Yaꞌanj, ne̱ ma̱an cheꞌé dan ranꞌ soj sayuun na̱nj á.

⁶ Dan me se neꞌen níꞌ se vaa nica̱ vaa rá Yaꞌanj quiꞌya̱j Yaꞌanj sayuun man nij yuvii̱ quiꞌyaj sayuun man soj a.

⁷ Ne̱ nica̱ vaa rá Yaꞌanj cata̱j xnaꞌanj Yaꞌanj se vaa navi̱j güii ranꞌ soj sayuun, ne̱ nara̱a̱n rá soj ga̱ núj güii curuvi̱ꞌ uún Jesús Si̱j ꞌNi̱j Raꞌa man níꞌ do̱ꞌ, curuvi̱ꞌ nij se‑mo̱zó soꞌ síí nucua̱j ndoꞌo do̱ꞌ, curuvi̱ꞌ rej xta̱ꞌ rque ꞌo̱ yaꞌan chuguu̱n a.

⁸ Ne̱ quiꞌya̱j soꞌ sayuun man nij yuvii̱ ne neꞌen man Yaꞌanj do̱ꞌ, man nij yuvii̱ naꞌvej rá cuno̱ nana̱ sa̱ꞌ cheꞌé Jesús Si̱j ꞌNi̱j Raꞌa man níꞌ do̱ꞌ a.

⁹ Dan me se quira̱nꞌ nij soꞌ sayuun cheꞌé cacunꞌ quiꞌyaj nij soꞌ, ne̱ dan me se rej yaníj cuma̱n nij soꞌ, caca̱a̱ nij soꞌ nu̱ꞌ cavii nu̱ꞌ caꞌanj a. Se̱ queneꞌen nij soꞌ man Síí ꞌNi̱j Raꞌa man níꞌ do̱ꞌ, se vaa niꞌndaj ya̱ veꞌé vaa snucua̱j soꞌ do̱ꞌ maꞌ.

¹⁰ ꞌO̱ se güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj me se cata̱j nij síí noco̱ꞌ man soꞌ se vaa niꞌndaj ya̱ veꞌé vaa soꞌ, ne̱ sa̱ꞌ uxrá vaa nu̱ꞌ se vaa quiꞌyaj soꞌ a. ꞌO̱ se nda̱a soj qui̱ꞌnij scaꞌnúj nij soꞌ cheꞌé se cuchumán ya̱ rá soj cuno soj nana̱ nataꞌ núj rihaan soj ado̱nj.

Cachíín niꞌya̱j Pabló rihaan Yaꞌanj se vaa ra̱cuíj Yaꞌanj man nij síí noco̱ꞌ man Cristó a

¹¹ Cheꞌé dan niga̱nj achíín niꞌya̱j núj rihaan Yaꞌanj cheꞌé soj se vaa caꞌve̱e quisi̱j soj gu̱un soj nu̱ꞌ nda̱a vaa me rá Yaꞌanj gu̱un soj ga̱a canacúún Yaꞌanj man soj canoco̱ꞌ soj man soꞌ a. Ne̱ achíín niꞌya̱j núj se vaa ra̱cuíj ndoꞌo Yaꞌanj man soj quiꞌya̱j soj nu̱ꞌ suun sa̱ꞌ me rá soj quiꞌya̱j soj, cheꞌé se si̱j amán rá niꞌya̱j man Cristó me soj a.

¹² Dan me se nda̱a síj, ga̱a ne̱ cata̱j soj se vaa sa̱ꞌ uxrá ꞌyaj Jesús Si̱j ꞌNi̱j Raꞌa man níꞌ, ne̱ cata̱j soꞌ se vaa sa̱ꞌ quiꞌyaj soj a. Da̱nj ina̱nj me se lu̱j me rá Yaꞌanj si̱j noco̱ꞌ níꞌ man do̱ꞌ, Jesucristó Si̱j ꞌNi̱j Raꞌa man níꞌ do̱ꞌ, quiꞌya̱j ro̱j soꞌ cheꞌé soj ado̱nj.