2 Corintios 2 - Triqui de San Juan Copala

¹ Ma̱an cheꞌé se guun raj ꞌo̱ ga̱a̱ niha̱ꞌ nimán soj roꞌ, cheꞌé dan ne cuchi̱j rej ma̱n soj na̱nj ado̱nj.

² Sese nano̱ rá soj qui̱ꞌyáj, ga̱a ne̱ me síí quiꞌya̱j gu̱un niha̱ꞌ raj ga̱. ꞌO̱ se soj me síí naquiꞌyaj niha̱ꞌ nimanj ado̱nj. Tza̱j ne̱ sese nuviꞌ soj, ga̱a ne̱ a̱ me síí quiꞌya̱j da̱nj ga̱.

³ ꞌO̱ se cheꞌé dan quiꞌyáj yanj cartá yoꞌ, nda̱a vaa me rá ma̱ꞌanj, cheꞌé se ne caꞌve̱j raj cuchi̱j ne̱ nano̱ raj quiꞌya̱j soj ado̱nj. Tza̱j ne̱ ꞌo̱ se no̱ xcúún soj gu̱un niha̱ꞌ raj quiꞌya̱j soj, ne̱ nda̱a maꞌa̱n soj do̱ꞌ, gu̱un niha̱ꞌ rá ga̱a chugua̱nj.

⁴ Tza̱j ne̱ ga̱a quiꞌyáj yanj cartá yoꞌ me se nuu quitzi̱i ndoꞌo raj, ne̱ nanó ndoꞌo raj, ne̱ nda̱a taꞌvee ma̱ꞌanj, quiꞌyaj suun nanó rá chugua̱nj. Tza̱j ne̱ né cheꞌe̱ se me raj nano̱ rá soj me quiꞌyáj yanj cartá yoꞌ maꞌ. ꞌO̱ se me raj queneꞌe̱n soj se vaa ꞌe̱e̱ uxrá raj man soj na̱nj ado̱nj.

Me rá Pabló se vaa veꞌé naꞌmi̱i̱ sa̱ꞌ uún nij síí ma̱n Corinto ga̱ tinúú nij soꞌ síí tanáj xco̱ cacunꞌ tumé soꞌ a

⁵ Tza̱j ne̱ sese vaa ꞌo̱ síí ꞌyaj nanó raj do̱j, ne̱ né ina̱nj ma̱ꞌanj nanó rá ꞌyaj soꞌ, cata̱j níꞌ vaa maꞌ. ꞌO̱ se nda̱a maꞌa̱n soj do̱ꞌ, nanó rá, cata̱j níꞌ vaa, cheꞌé se naꞌvej rá ꞌu̱nj cuta̱ꞌ ꞌu̱nj doj vaa na̱nj ado̱nj.

⁶ Ne̱ sayuun cutaꞌ soj xráá síí quiꞌyaj cacunꞌ yoꞌ me se veé dan caꞌvee na̱nj á. Taj cheꞌé quiꞌya̱j soj doj sayuun man soꞌ a̱ maꞌ.

⁷ Ma̱an se cara̱a̱ xꞌnaa soj rihaan soꞌ, ne̱ veé dan quisíj quiꞌyaj soj sayuun man soꞌ na̱nj á. Ta̱dó soj se̱ nanó ndoꞌo rá soꞌ, quiꞌya̱j soj, ne̱ quiri̱ꞌ nimán soꞌ, quiꞌya̱j soj ado̱nj.

⁸ Cheꞌé dan cata̱j xnaꞌanj ꞌu̱nj rihaan soj se vaa me raj veꞌé quiꞌya̱j soj, ga̱a ne̱ gu̱un ya̱ rá soꞌ se vaa ya̱ ya̱ ꞌe̱e̱ rá soj man soꞌ na̱nj ado̱nj.

⁹ Ga̱a quiꞌyáj yanj cartá caꞌnéj rihaan soj ga̱a rque̱, ne̱ caꞌnéꞌ ꞌu̱nj suun rihaan soj se vaa quiꞌya̱j soj sayuun man síí quiꞌyaj cacunꞌ yoꞌ, cheꞌé se me rá ꞌu̱nj xca̱j ꞌu̱nj cuentá sese si̱j uno nu̱ꞌ nana̱ aꞌmij rihaan me soj a.

¹⁰ Sese caꞌve̱j rá soj cara̱a̱ xꞌnaa soj rihaan soꞌ, ne̱ veé da̱nj qui̱ꞌyáj, ne̱ cara̱a̱ xꞌnaj rihaan soꞌ, cheꞌé se me raj doj a̱ cavi̱i̱ sa̱ꞌ soj, ne̱ neꞌen Cristó se vaa ya̱ caraa xꞌnaj rihaan síí quiꞌyaj cacunꞌ yoꞌ na̱nj ado̱nj.

¹¹ Da̱nj quiꞌya̱j níꞌ, ga̱a ne̱ se̱ gaa na̱nj quiꞌya̱j canaán Síí Chre̱e man níꞌ na̱nj á. ꞌO̱ se a̱j neꞌen níꞌ da̱j me rá soꞌ quiꞌya̱j soꞌ se chiꞌi̱i̱ ga̱ níꞌ ado̱nj.

Cavii Pabló chumanꞌ Troas, ne̱ caꞌanj soꞌ estadó Macedonia a

¹² Dan me se caꞌanj ꞌu̱nj chumanꞌ cuꞌna̱j Troas caꞌmi̱i̱ natáj ꞌu̱nj nana̱ sa̱ꞌ cheꞌé Cristó, ne̱ dan me se vaa yaꞌnúj rihaan ꞌu̱nj caꞌmi̱i̱ natáj ꞌu̱nj nana̱ sa̱ꞌ, quiꞌyaj Síí ꞌNi̱j Raꞌa man níꞌ,

¹³ tza̱j ne̱ ne nari̱ꞌ ꞌu̱nj man tinúú níꞌ síí cuꞌna̱j Titó, ne̱ nanó ndoꞌo raj, ne̱ cheꞌé dan tanáj ꞌu̱nj man nij tinúú níꞌ síí ya̱nj chumanꞌ Troas yoꞌ, ne̱ cavii ꞌu̱nj caꞌnáꞌ ꞌu̱nj estadó Macedonia nihánj na̱nj ado̱nj.

Caꞌmii Pabló cheꞌé nana̱ aꞌmii natáj nij tuvi̱ꞌ Pabló rihaan nij yuvii̱ a

¹⁴ Tza̱j ne̱ taj níꞌ guun niꞌya̱j níꞌ rihaan Yaꞌanj, cheꞌé se Yaꞌanj me síí ꞌyaj se vaa ꞌyaj canaán uxrá núj rihaan Síí Chre̱e cheꞌé Cristó a. Ne̱ Yaꞌanj me síí ꞌyaj uno yuvii̱ ma̱n cunuda̱nj nij chumanꞌ nana̱ sa̱ꞌ aꞌmii núj cheꞌé Cristó, ne̱ ꞌo̱ chaꞌnuu̱ nana̱ sa̱ꞌ yoꞌ rihaan nu̱ꞌ cachra̱ꞌ chumii̱, nda̱ꞌ rá se vaa avii se gunꞌ da̱j man yâj ga̱a naxraꞌ yoꞌ roꞌ, da̱nj vaa chaꞌnuu̱ snana̱ Yaꞌanj chugua̱nj.

¹⁵ Dan me se nda̱ꞌ rá se vaa se gunꞌ da̱j, ne̱ achén yoꞌ scaꞌnúj nij yuvii̱ roꞌ, da̱nj vaa núj ga̱a ꞌyaj núj se‑su̱u̱n Yaꞌanj nataꞌ núj nana̱ sa̱ꞌ cheꞌé Cristó, ne̱ achén nana̱ yoꞌ scaꞌnúj nij síí nani̱i̱ rihaan sayuun, ne̱ achén yoꞌ scaꞌnúj nij síí caꞌa̱nj rihaan yaꞌan na̱nj á.

¹⁶ Ne̱ xa̱ꞌ nij síí caꞌa̱nj rihaan yaꞌan, tza̱j ne̱ nda̱ꞌ rá se vaa gunꞌ squíí xlá rihaan nij yuvii̱ caviꞌ roꞌ, da̱nj vaa snana̱ Yaꞌanj rihaan nij soꞌ a. Tza̱j ne̱ xa̱ꞌ nij síí nani̱i̱ rihaan sayuun me se nda̱ꞌ rá se uun ráꞌ ga̱a sa̱ꞌ uxrá gunꞌ squíí xlá roꞌ, da̱nj uun rá nij soꞌ ga̱a uno nij soꞌ snana̱ Yaꞌanj ado̱nj. Tza̱j ne̱ a̱ me síí uun nucua̱j ꞌyaj da̱nj, rá soj ga̱.

¹⁷ ꞌO̱ se núj me se ne ꞌyaj núj nda̱a vaa ꞌyaj taꞌa̱j nij síí aꞌmii natáj snana̱ Yaꞌanj a̱ maꞌ. ꞌO̱ se taꞌa̱j nij soꞌ me síí me ina̱nj rá quiꞌya̱j canaán saꞌanj cheꞌé snana̱ Yaꞌanj, ne̱ xa̱ꞌ núj, tza̱j ne̱ ina̱nj nana̱ ya̱ me rá núj caꞌmi̱i̱ núj, ne̱ naꞌvej rá núj caꞌne̱e̱ núj saꞌanj cheꞌé snana̱ Yaꞌanj rihaan yuvii̱ maꞌ. ꞌO̱ se Yaꞌanj me síí caꞌneꞌ suun rihaan núj caꞌmi̱i̱ natáj núj, ne̱ tumé Yaꞌanj man núj da̱j caꞌmi̱i̱ núj, ne̱ síí noco̱ꞌ man Cristó me núj ado̱nj.