Yoswa 16 - Tonga Bible 1986

Mphaka yaku Efraimu

¹ Charu chakupaskika ku mphapo yaku Yosefe chingwamba ku Yordane pafupi ndi Yeriko, kuvuma kwa maji gha Yeriko, mu bozwa lo, kutuwa ku Yeriko mpaka ku charu cha mitunthu ku Betele;

² kutuwa ku Betele mpaka ku Luzi, yijumpha mpaka ku Ataroti, charu cha ŵa Araka;

³ yisikiya kuchiri ku zambwe ku charu cha ŵaYafaleti, mpaka ku charu cha Bete-horoni wakusika, ndi kulazga ku Gezere, yigota pa nyanja.

⁴ Ŵanthu ŵaku Yosefe, Manase ndi Efraimu, ŵanguronde chihara chawo,

⁵ charu cha ŵaEfraimu ndi mbumba zawo chenga viyo: mphaka ya chihara chawo ku vuma yenga Ataroto-dara mpaka ku Bete-horoni wa nena,

⁶ ndipo mphaka yingurutiliya ku nyanja; ku nkhonde ndi Mikimetate; sono ku vuma mphaka yizunguliya kulazga ku Tanata-solo, yijumpha ndi kulutiliya ku vuma ku Yanoa,

⁷ kutuwa ku Yanoa yisikiya ku Ataroto mpaka ku Nara, yikwaska ku Yeriko, ndi kugota pa Yerdane,

⁸ Kutuwa ku Tapua, mphaka yilazga kuchiri ku zambwe ku msinji Kana, ndi kugota ku nyanja. Ichi ndicho chihara cha fuku la ŵaEfraimu ndi mbumba zawo,

⁹ pamoza ndi misumba yo yinguŵapatulikiya pade ŵaEfraimu mukati mu chihara cha ŵina Manase, misumba yose yiya pamoza ndi mizi yake.

¹⁰ Ndipuuli kuti ŵanguŵadikiskamo ŵaKanani ŵakuja mu Gezere cha; viyo ŵaKanani ŵakuja mukati mu ŵaEfraimu mpaka ku zuŵa line, kweni ŵaŵa ŵaŵanda ŵakuchita nchitu yakuchichizgika.