Yohane 21 - Tonga Bible 1986

Yesu wawoneka ku ŵasambizi ŵake pa nyanja ya Tiberia

¹ Pavuli paku vyo Yesu wangujirongo so ku ŵasambizi pa nyanja ya Tiberia; wangujirongo viyo.

² Simoni Petro, ndi Tomase wakuzumbulika Didumo, ndi Natanaele yo waku Kana waku Gailile, ndi ŵana ŵaku Zebediya ndi ŵanyake ŵaŵi ŵamu ŵasambizi ŵake ŵenga pamoza.

³ Simoni Petro waŵanene, “Ndambaya somba.” Wamnene, “Nafwe tiruta nawe.” Wangutuwa ndipo wangukwere mungaraŵa: ndipo usiku uwa kuti ŵangubayapo kanthu cha.

⁴ Kweni po kunguti kwacha, Yesu wanguma pa likumba: ndikweni ŵasambizi wo kuti ŵangumuziŵa cha kuti ndi Yesu

⁵ Yesu wangunena nawo, “Mwaŵana, kumbi mwe ndi somba?” Ŵangumwamuka, “Awa.”

⁶ Iyo wanguŵanene, “Pong'iyani mkwau ku marghe gha ngaraŵa, ndipo musaniyenge.” Viyo ŵangupong'a, ndipo sono ŵengavi nthazi kwachiukwauliya chifukwa cha chivungu cha somba.

⁷ Viyo msambizi yo Yesu wangumwanja wanguti kwaku Petro, “Mba Mbuya!” Penipo Simoni Petro wanguvwa kuti mba Mbuya, wangujichinyiya chiphemeska chake (chifukwa wenga nkhuli), ndipo wangujipong'a mu nyanja.

⁸ Kweni ŵasambizi ŵanyake ŵanguza mu kangaraŵa ko ŵakuguza mkwau wo somba chifukwa kuti ŵenga kutari viŵi ndi mtunda cha, kweni akhumba nge ndi mikono machumi pe chumi ghaŵi.

⁹ Viyo ŵanguti ŵazuukiya ku mtunda, ŵanguwona moto wa maka wakunyeka, ndi somba yakurarikikapo, ndi chiŵande

¹⁰ Yesu watiti kwaku wo, “Toniko somba zo mwabayapo sono.”

¹¹ Viyo Simoni Petro wangukwere mu ngaraŵa, ŵanguguziya mkwau ku mtunda, wakuzaza somba zikuru machumi pe chumi pachanya machumi ghankhonde ndi zitatu: ndipo chingana zenga zinandi viyo mkwau wo kuti unguparuka cha.

¹² Yesu wanena nawo, “Zani muzirauke.” Kweni pengavi yumoza wa ŵasambizi wo wangwesa kumfumba, “Ndimwe ayani?” Chifukwa ŵanguziŵa kuti mba Mbuya.

¹³ Wanguza Yesu ndipo wanguto chiŵande kuŵapaska ndi somba viyo.

¹⁴ Iyi ndi nyengo yachitatu sono yo yesu wangujirongo kuŵasambizi wati wayuka ku ŵakufwa.

Yesu ndi Petro

¹⁵ Viyo ŵati ŵargha, Yesu wangunena ndi Simoni Petro, “Simoni, mwana waku Yohane, kumbi utindanja kwakuruska ŵenaŵa?” Wangumuka, “Inya Ambuya, imwe muziŵa kuti nditanja imwe”; wamnene, “Liska ŵanamberere ŵangu.”

¹⁶ Wanena nayo kachiŵi, “Simoni, mwana waku Yohane, kumbi utindanja?” Wamnene, “Inya, Ambuya, imwe muziŵa kuti nditanja imwe.” Wamnene, “Ŵeta mberere zangu.”

¹⁷ Wanena nayo so kachitatu, “Simoni, mwana waku Yohane kumbi utindanja ine?” Petro wanguvwa chisungu, chifukwa wanena nayo kachitatu yaka, “Utindanja ine?” Wangunena nayo, “Ambuya imwe muziŵa vyose; muziŵa nadi kuti nditanja imwe.” Yesu wamnene, “Liska mberere zangu.

¹⁸ Nadidi ndikuneneske, Penipo wenga wampupuka, wajichinyiriyanga wija, ndipo wendayendanga ko wakhumbanga; kweni utakuti wakota, ukatambasuwanga manja ghako, ndipo munyake wakaghanaghananga, ndipo wamkukutole kweniko iwe ulive kukhumba.”

¹⁹ (Ndipo ichi wangunena, pakusimikizga ndi nyifwa yo Petro wakafwanga ndi kutore unkhankhu kwaku Chiuta.) Ndipo wati wakamba chenichi, wangumnene, “Rondo ine.”

Yesu ndi ŵasambizi ŵanyake

²⁰ Pakung'anamuka Petro wanguwona msambizi mweniyo Yesu wangumwanja wakurondo; mweniyo nayo wanguyegeme pa njonesku pa chipakatu chake, ndi wangunene, “Ambuya, ndi yani yo ngwakukupa chiyani?”

²¹ Viyo Petro wachimuwona wangunena ndi Yesu, “Ambuya, na mwenuyu?”

²² Yesu wangunena nayo, “Asani ndingakhumba kuti waje ndi umoyo mpaka po ine nthuza, nchine kwaku iwe? Iwe, rondo ine.”

²³ Viyo mazu yagha ghanguwanda mu ŵabali wo, ghakuti msambizi mweniyuwa kuti wakafwanga cha. Kweni Yesu wengavi kumnene kuti warekenge kufwa; iyo wanguti, “Asani ndi ngakhumba kuti waje ndi umoyo mpaka po ine nthuza, nchine kwaku iwe?”

²⁴ Uyu ndi msambizi yo ngwakusimikizga ndi wakulemba vyenivi; ndipo tiziŵa kuti chisimisimi chake nchakuneneska.

²⁵ Kweni kwe vinyake vinandi so vyo Yesu wanguchita, vyenivyo asani vingulembeka chimoza-chimoza, ndighanaghana kuti chingana ndi charu icho kuti chatinge chiziŵe cha kufungiya mabuke gho ghatinge ghalembekenge.