Yakobe 1 - Tonga Bible 1986

¹ Kalata wakutuwa kwaku Yakobe, mteŵeti waku Chiuta ndi wa Mbuya Yesu Kristu, ku mafuku gho chumi ndi ghaŵi gha kuchapariya, moni.

Chivwanu ndi zeru

² Mwa ŵabali ŵangu, muchipime chimwemwe pe, penipo pose muŵiyamo mu mesedu ghamtundumtundu,

³ pakuziŵa kuti chirozgu cha chivwanu chinu chitata unkhunthiya.

⁴ Kweni unkhunthiya wo uŵe ndi nchitu yake yakufiskika, alinga kuti imwe muŵe ŵakufiskika, ŵakupereŵe, mu kanthu kamoza cha.

⁵ Ndipo asani yumoza waku imwe wapere mu zeru, wapemphe kwaku Chiuta, mweniyo wapaska kwaku wose kwawanangwa, ndi kwambura kusinginika; ndipo yikapaskikanga kwaku iyo.

⁶ Kweni wapempheyenge mu chivwanu, ndi kukangang'a kanthu cha: chifukwa yo wakangang'a wakozgana ndi jigha la nyanja lakuputiskika ndi lakuchupulika.

⁷ Nadidi munthu waviyo wareke kurunguruka kuti wamrondako kanthu ku Ambuya;

⁸ ndi munthu wa mtima wapaŵi, wakusaŵasaŵa mu mendedu ghake ghose.

Ukavu ndi uromba

⁹ Kweni mbali yo msauchi watumbwiyenge mu utumphulika wake:

¹⁰ ndi msambasi yo mu uyuyulika wake; pakuti nge ndi luŵa la uteka warutengepo.

¹¹ Chifukwa lumwi lo lituwa ndi chifundizi, ndipo liumizga uteka; ndi luŵa lake limota, ndi utozi wa kawonekedu kake utanangika: viyo so msambasi mayo wafoteskekenge mu mendedu ghake.

Kweseka ndi kunyengeka

¹² Ngwamwaŵi munthu mweniyo wavwiyapo kesedu; pakuti wata kuti waŵa wakurumbika, warondenge mphumphu ya umoyo yeniyo, Mbuya wapangana ku ŵakumwanja.

¹³ Wareke kose yumoza wakweseka kukamba kuti, “Nditeseka ndi Chiuta;” chifukwa Chiuta ngwamburameseka ndi viheni, ndipo kuti iyo watesa chingana njumoza cha:

¹⁴ kweni munthu we yose wateseka, pakuguguzika ndi likhumbira laku yija.

¹⁵ Pavuli penipo likhumbira lo, lati lakuwa, lipapa ulakwi, ndipo ulakwi wo wati wakuwa ukongwa, upapa nyifwa.

¹⁶ Mungarandizgikanga, mwa ŵabali ŵangu ŵakwanjiwa.

¹⁷ Mpasku wose wamampha ndi chawezi chose chizirima nchakutuwa kuchanya chakusika kutuwa ku Dada wa maukweru, mwaku mweniyo mulive ching'anamuka chingana nchiduzi cha ching'anamuka.

¹⁸ Kwakuyana ndi khumbu lake wangutipapiya ndi mazu gha uneneska, kuti tiŵe ifwe mruwuku wakuti wa vilengeka vyake.

Kuvwa ndi kuchita

¹⁹ Muziŵa chenichi, mwa ŵabali ŵangu ŵakwanjiwa. Kweni munthu yose waŵe mupusu kwachivwa, wachizita kurongoro, wachizita ku kandundu;

²⁰ chifukwa kandundu ka ŵanthu kuti katataliya urunji waku Chiuta cha.

²¹ Chifukwa chenichi pakuzuwa ukazuzi wose ndi uheni wakuwanda, rondani mu upovu mazu ghaku pandika, gho nganthazi kutaska mizimu yinu.

²² Ndipo muŵe ŵakuchita mazu, ndi ŵakughavwa pe cha, ndi kujifuvya.

²³ Pakuti asani munthu ngwakuvwa mazu ndi wakughachita cha, mweniyo wayana ndi munthu wakulereska chisku chakawi mu kayilole;

²⁴ chifukwa watijilereska, ndi waruta, ndipo sosonuvi waruwa mo waŵiyanga.

²⁵ Kweni mweniyo ngwakulereska mu dangu lizirima lo la wanangwa, ndi wajaririya viyo, pakuŵa wakuvwa wachiruwa cha kweni wakuchita mlimu, wa mwenuyu waŵenge wamwaŵi mu kachitidu kake.

²⁶ Asani munthu wajipima kuti ngwakusopa, wambura kutintha lilime lake kweni wakufuvya mtima wake, chisopa chaku mweniyo nchawaka.

²⁷ Chisopa chikhovu ndi chambura banga paurongo paku Chiuta Auskefwe nchenichi, kulereze ŵamasiya ndi vyoko mu suzgu yawo ndi kujisunga wambura donthu ku charu.