ŴaRoma 16 - Tonga Bible 1986

Matauzgu ghaku Paulo ku ŵa Kristu

¹ Ndimupereka kwaku imwe mzichi widu, Foibe, mweniyo ndi mteŵeti wa mpingu wamu Kenkrea,

² kuti mumronde mu Mbuya, kwakwenere ŵakupaturika, ndi kuti mumovye mu chinthu chose chenicho wangapempha imwe; pakuti iyo nayo waŵa movya wa ŵanandi, ndi waku ine ndamweni.

³ Tauzgani Priskila ndi Akula, ŵanchitu-ŵanyangu mwaku Kristu Yesu,

⁴ ŵeniwo chifukwa cha moyo wangu ŵanguŵika pasi makhosi ghaku iwo ŵija; wo kuti ndine pe cha ndiŵawonga, kweni mipingu yose nayo ya ŵaMitundu;

⁵ ndipo tauzgani ŵampingu ŵamu nyumba yawo. Tauzgani Epaineto, nkhwanjiwa wangu, mweniyo ndi mruwuku wakudanga waku Asia kwaku Kristu.

⁶ Tauzgani Mariya, mweniyo wangutakatakiya imwe ukongwa.

⁷ Tauzgani Androniko ndi Junia, ŵachikazi ŵanyangu, ndi ŵamikoli ŵanyangu, wo mbakuziŵikwa mu ŵakutumika ŵeniwo so mbakudanga kwaku ine mwaku Kristu.

⁸ Tauzgani Ampliato, nkhwanjiwa wangu mu Mbuya.

⁹ Tauzgani Urbano, wanchitu munyidu mwaku Kristu, ndi Stakhu, nkhwanjiwa wangu.

¹⁰ Tauzgani Apele, wakurumbika mwaku Kristu. Tauzgani ŵamu nyumba yaku Aristobulo.

¹¹ Tauzgani Herodio, mchikazi munyangu. Tauzgani ŵamu nyumba yaku Narkiso, wo ŵemu Mbuya.

¹² Tauzgani Trufaina ndi Trufosa, wo ŵatakatakiya muMbuya. Tauzgani Persida, nkhwanjiwa yo, mweniyo watakatakiya ukongwa mu Mbuya.

¹³ Tauzgani Rufu, wakusankhika mu Mbuya, ndi anyina, wo so mbama.

¹⁴ Tauzgani Asunkrito, Flegono, Hermese, Patroba, Flermase, ndi ŵabali ŵapamoza nawo.

¹⁵ Tauzgani Filologo ndi Julia, Nereo ndi mzichi wake, ndi Olumpa, ndi ŵakupaturika wose ŵapamoza nawo.

¹⁶ Tauzganani ndimfyofyontho, wakupaturika. Mipingu yose yaku Kristu yakutauzgani.

Vipangizgu vyakumariya

¹⁷ Ndipo ndikuŵeyereni, mwa ŵabali, kuŵathoŵa wo mbakuchita vigaukanu ndi viguŵisku, kwakumikirana ndi chisambizgu chenicho mungusambira: ndipo ŵapambukeni wo.

¹⁸ Chifukwa ŵaviyo kuti ŵateŵete Ambuyafwe Kristu cha, kweni linweka laku ŵija; ndipo ndimakambidu ghausarazi ndi ghakufyafyalika ŵafuvya mitima ya ŵakujiyuyuwa.

¹⁹ Chifukwa kuvwiya kwinu kwawanda mwaku wose. Viyo ndikondwere paku imwe; kweni ndikhumba imwe kuŵa ŵazeru kwaku cho nchamampha, kweni ŵambura kalema kwaku cho nchiheni.

²⁰ Ndipo Chiuta iyo wa chimangu waphwanyiyenge Satana ruŵi kusi ku marwayo ghinu. Wezi wa Ambuyafwe Yesu Kristu uŵe manwe.

²¹ Wakutauzgani Timote wanchitu munyangu, ndi Lukio ndi Jasone ndi Sosipatro, wachikazi munyangu.

²² Ine Tertio ndawakulemba kalata ndikutauzgani mu Mbuya.

²³ Gayo msowezi wangu ndiso wa ŵakuvwana wose, wakutauzgani. Erasto, msungimbiku wa msumba wo, wakutauzgani, ndi Kuarto, mbali yo. [

²⁴ Wezi wa Ambuyafwe Yesu Kristu uŵe namwe mose.]

Rombo la mathamiko

²⁵ Sono kwaku mweniyo ngwanthazi kwachikhoze imwe kwakulingana ndi evangeli wangu ndi mumemezu waku Yesu Kristu, uli ndi uvumbuzi wa mangari ghakubisika mu nyengo za migonezi.

²⁶ Kweni sono ghakuvumbulika, ndipo mumalembo gha ŵamchimi kwakulingana ndi langulu laku Chiuta wamuyaya, chaziŵiskika, ku mitundu yose kuŵatore ku chivwanu cha mu muvwiyu;

²⁷ kwaku Chiuta wazeru yijajija pe, mwaku Yesu Kristu, kuŵiye unkhankhu muyaya. Ameni.