Wakutaula 10 - Tonga Bible 1986

Kupusa kusuzga ukongwa

¹ Nyezi zakufwa zipaska mafuta gha wakwenga lifungu liheni; viyo ndimo uzereza umanavi upepuliya vinjeru ndi ulemu.

² Mtima wa munthu wavinjeru ukaniriya ku janja lake la marghe, kweni mtima wa wakupusa ukaniriya ku la maze.

³ Chingana ndi penipo wakupusa watenda mu nthowa, cho wasoŵa ndi maghanaghano, ndipo wanena kwaku we yose kuti ndimuzereza,

⁴ Asani ukari wa wakuwusa wakuyukiya ureke kusiya malo ghako, pakuti kujiŵika pasi kupembuzga mphambanu yikuru.

⁵ Kwe uheni wo ndawona panu pasi, nge mbubudi wo watuliyanga ku wakuwusa;

⁶ uzereza ukujarikika mu malo ghanandi gha pachanya, ndipo msambasi wakuja mu malo gha pasi.

⁷ Ndawona ŵaŵanda ŵatenda pachanya pa ŵakavalo, ndipo ŵana ŵa mafumu ŵatenda pasi nge mbaŵanda.

⁸ Yo wakumba mbuna wakawangamo; ndipo wakuswa pa mpanda njoka yikamurumanga.

⁹ Yo wasema mya wapwetekeka nayo; ndipo wakuswa nkhuni watuwa nazo mu urwani.

¹⁰ Asani chisulo chabumpha, ndipo yumoza wareka kunorako ku mlomo, watenere kukoreska ndi nthazi; kweni vinjeru vitovya munthu kufiska umampha.

¹¹ Asani njoka yiluma yenga yindawukwe kulivi mphoto ku wakuwukwa.

¹² Kurongoro kwa munthu wazeru, kuti mutore ulemu, kweni milomo ya muzereza yitumurgha.

¹³ Chiyambo cha mazu gha mlomo wake mbuzereza, ndipo umari wa kukamba kwake nkhufuntha kuheni.

¹⁴ Wakupusa watandaniska mazu, nanga munthu kuti waziŵa cha cho chikaŵangako, ndipo ndiyani yo wangaziŵa kumunene cho chikaŵangako pavuli paku iyo?

¹⁵ Mlimu, wa wakupusa wutimuvukiska viyo kuti waziŵa cha nthowa yakuya ku msumba.

¹⁶ Owe iwe, mtunda we, penipo karonga wako ndi mwana, ndi mafumu ghako ghaturgha madghera ndi mlenji.

¹⁷ Walikondwa ndi we, mtunda we, penipo karonga wako ndi mwana wa ŵanangwa, ndipo mafumu ghako ghaturgha madghera pa nyengo yakwenere, chifukwa kuti ŵaronde nthazi chifukwa cha kuloŵe cha!

¹⁸ Chifukwa cha ukata bagha livunda, ndipo chifukwa cha ulesi wa manja nyumba yisuluwa.

¹⁹ Chiŵande chibikikiya vidala, vinyo wakondweska umoyo, ndipo ndrama zitovya mu vinthu vyose.

²⁰ Ungatembanga karonga cha nanga ndi mu maghanaghano ghako, nanga nkhutemba musambasi muchipinda chako cha kugonamo; pakuti kayuni ka mude kapingenge mazu ghako, pamwenga chakuwuluka ndi mapapa chinyake chikambenge makani.