Tito 1 - Tonga Bible 1986

¹ Kalata wakutuwa kwaku Paulo mteŵeti waku Chiuta, ndi wakutumika waku Yesu Kristu uli ndi chivwanu cha wakusankhika waku Chiuta, ndi chiziŵisku chauneneska wa mwa uwopa Chiuta,

² mu chigomezgu cha umoyo wamuyaya, weniwo Chiuta mzirautesi wangupangana kali ku nyengo za muyaya,

³ kweni pa nyengo zenecho wanguvumbuliya mazu ghake mu uthenga, weniwo ine ndingugomekezgeke nawo kwakuyana ndi langulu laku Chiuta Mtaski widu;

⁴ kwaku Tito, mwana wangu mwenimweni mu chivwanu chamasanga. Wezi ndi chimangu kutuliya kwaku Chiuta Dada ndi Kristu Yesu Mtaski widu.

Nchitu yaku Tito mu Krete

⁵ Chifukwa chenichi ndingureka iwe mu Krete, alinga kuti urulike vyo vyenga vikufiskika, ndipo kuti ujarike ŵara mu msumba wose, uli ndimo ine ndungukulanguliya;

⁶ asani munthu ngwambura masumulika, mrumi wa munthukazi yumoza, wakuŵa ndi ŵana ŵakuvwana, oŵakusumulika utayisi pamwenga uzira uthera cha.

⁷ Chifukwa mlereze watenere kuŵa wambura masumulika, wachiwawa cha, wambembe cha, mwanduzi vyasoni cha;

⁸ kweni mwanja-ŵalendo, mwanja umampha, wa vinjeru, murunji, mkhovu, wakujitintha;

⁹ wakumiziriya ku mazu ghamagomekezgeka gho ngakuyana ndi chisambizgu cho, alinga kuti waŵe wanthazi kuchiska mu sambizgu lizirima, ndi so kuŵapanikizga wo mbakususka.

¹⁰ Chifukwa ŵalipo ŵanandi ŵambura kuthera, ŵa mazu ghaŵaka ndi ŵakufuvya, viŵiviŵi wo ŵa mchinju wo.

¹¹ Watenere kusunamiskika; ŵeniwo ŵabwanganduwa chivwanu cha nyumba zamphumphu, pakusambizga vyambura kwene chifukwa cha chanduka chasoni.

¹² Yumoza wamwaku wo, mchimi waku ŵija, wanguti, “Nyengo zose ŵaKrete mbatesi, vikoku viheni, nkharghi zikata.”

¹³ Chisimisimi chenichi nchakuneneska. Pa chifukwa chenicho ŵapanikizge kwakuchenya, alinga kuti ŵakhome mu chivwanu.

¹⁴ Ndi kuphwere cha nthanu za uYuda ndi malangulu gha ŵanthu ŵakupambukako ku uneneska wo.

¹⁵ Ku ŵakuphotoka vyose viphotoka: kweni ku ŵakukazuzgika ndi ŵambura kuvwana kulive kamoza kakuphotoka; kweni chinjeru chawo nacho ndi njuŵi so vikazuzgika.

¹⁶ Ŵazomera kuti mbakumziŵa Chiuta; kweni ndi nchitu zawo ŵatumkana, pakuŵa ŵauziya, ndi ŵamtafu, ndi ku nchitu yose yamampha ŵambura kwenere.