Sumu 58 - Tonga Bible 1986

Kurombe kulangika kwa ŵaheni

Ku wakumba mura: pa Ali-tashihete. Sumu yaku Davidi

¹ Kumbi nadi mukamba urunji, mwa ŵachiuta imwe? Kumbi muteruzga kwakurunjika mwa ŵana ŵa ŵanthu?

² Awa, mu mitima yinu munozga utimbanizi; manja ghinu ghachita vya nkhaza mu charu.

³ Ŵaheni ŵaranda kutuliya ku chibali, ŵaranda kutuliya ku kawi, ŵakamba mautesi.

⁴ Ŵendi urwirwi nge mburwirwi wa njoka, ŵakozgana ndi nkhomi yakugota makutu,

⁵ yo kuti yituvwa mazu gha wakuwukwa cha pamwenga ghawavyanusi muchenjezi.

⁶ A Chiuta, phwayani minyu mu milomo yawo; bongondoni vibwanyu vya zinkharamu za mpupuka, Ambuyamwe!

⁷ Ŵamare nge ndi maji ghakwenda; nge mbuteka ŵaphwatikiye pasi ŵamire.

⁸ Ŵaŵe nge ndi nkhono yo yasongonoka; uli nkhufyoka kwa munthukazi, ko kulivi kuwona dazi.

⁹ Sosonukweni, mimphika yinu yenga yindakonde moto wu minga pamwenga yiŵisi pamwenga yakukore, waŵatuzgengepo wose tetete.

¹⁰ Wakondwenge wakurunjika wachiwona thayu; marwayo ghake wasukengemu ndopa za ŵaheni.

¹¹ Ŵanthu ŵakatinge, “Nadidi yiriko mphoto ya wakurunjika; kwakuneneska Chiuta waliko yo wateruzga pa charu.”