Sumu 4 - Tonga Bible 1986

Rombu la mazulo lakugomekezga Chiuta

Ku wakumba mura, pa virumbu vya malisinga. Sumu yaku Davidi

¹ Mundamuke ndichidana, A Chiuta imwe mwe urunji wangu! Imwe mungundipaska malo po ndenga musuzgu. Ndichitiyeni wezi, ndipo vwani rombu langu.

² Mwa ŵanthu mwe, mpaku zuŵanji ulemu wangu uŵenge wa soni? Mpaka zuŵanji mwanjenge mazu ghawaka, ndikupenja mautesi?

³ Kweni ziŵani kuti Ambuya ajiŵikiya pade ŵanthu wo mbakugomezga; Ambuya atuvwa ndichidana kwaku iwo.

⁴ Karipani, kweni rekani kunanga; kambani ndi mitima yinu pa vita vinu, ndi kuja chisisi.

⁵ Perekani sembe za urunji, ndipo gomekezgani mwaku Chiuta.

⁶ Mbanadi wo ŵatiti, “Owe mphanyi tinguwona cho nchamampha! Kwezgiyani kungweruka kwa chisku chinu paku ifwe, A Chiuta!”

⁷ Imwe mwaŵika chimwemwe chikuru mu mtima wangu, kwakuruska chaku iwo penipo mbeu yawo ndi vinyo vyaŵa vinandi.

⁸ Mu chimangu ndigonenge pasi ndi ndirenge tulo; chifukwa imwe mwija, A Chiuta, mutindijariska mwakufwasa.