Sumu 16 - Tonga Bible 1986

Chiuta nchikhazi cha umoyo ndi mtaski ku nyifwa

¹ Ndisungeni, A Chiuta, chifukwa ndidingang'a mwaku imwe.

² Ku Ambuya ndititi, “Imwe ndimwe Ambuya; pade paku imwe ndilivi kamampha.”

³ Nge nkhu ŵatuŵa mu charu, mbakuzirwa, likondwa langu lose le mwaku iwo.

⁴ Wo ŵasankha ŵachiuta ŵamwenga kuti ndisanganenge nawo mu sembe zawo cha; kuti nkhasopanga ŵachiuta ŵawo cha.

⁵ Imwe Ambuya, nchigaŵa changu chakusankhika, mutindipaska chose cho ndikhumba; umoyo wangu we mu manja ghinu.

⁶ Vya ulera vinu vyakuziziswa paku ine; vyamampha ukongwa kwakuruska!

⁷ Nditumbika Ambuya wo atindipaska fundu; mu usiku njuŵi zangu zitindisambizga.

⁸ Nyengo zose ndiŵika Ambuya paurongo pangu, kuti nkhasukuniskikanga cha, chifukwa we pafupi nane.

⁹ Pa chifukwacho mtima wangu ukondwa, ndipo mzimu wangu usekere; liŵavu langu nalo lija kwakufwasa.

¹⁰ Chifukwa imwe mulivi kundipereka ku muunda, pamwenga kuzomerezga mtuŵa winu kuti wawone zenje.

¹¹ Imwe mtindirongo nthowa ya umoyo; mugutu wa chimwemwe we mwaku imwe, vyakukondweska mu janja linu la kurghiya vya muyaya.