Ruti 4 - Tonga Bible 1986

Boazi wato Ruti

¹ Ndipo Boazi wanguya ku likomo ndi wangja kwenikuwa, ndipo ehe, mbali mwenimweni yo wangukamba Boazi wanguza kwenikuwa. Viyo Boazi wanguti, “Patukiya kunu bwezi, ja pasi yapa.” Ndipo wangupatuka ndi wanguja pasi.

² Ndipo wanguto ŵanthurumi chumi ŵamu ŵara ŵamu msumba, ndi wanguti, “Jani pasi yapa.” Ndipo ŵanguja pasi.

³ Sono wanguti ku mbali mwenimweni, “Naomi yo wakuweko charu cha Moabu, waguliska ka chigaŵa ka charu kokenga ka mbali widu mweni mweni Elimeleke.

⁴ Viyo ndaghanaghana kuti ndikuneniyepo ghaku cho. Ndipo ndititi uchiguli paurongo paku wo ŵateka pano, ndi paurongo pa ŵara ŵa ŵanthu ŵangu. Asani ukachiwombonga, chiwombo, kweni asani ukachirekanga undinene, alinga ndiziŵe pakuti palivi munyake pade paku iwe wakuchiwombo, ndipo ine ndituza pavuli pako.” Ndipo iyo wanguti, “Ndikachiwombonga.”

⁵ Sono Boazi wanguti, “Zuŵa lenilo ukaguliyanga munda wo kwaku Naomi ukaguliyanga kumoza ndi Ruti muMoabu, choko cha wakufwa alinga liyuskike zina la wakufwa ku chihara chake.”

⁶ Sono mbali mwenimweni yo wanguti, “Kuti ndingajiwombole cho cha vinu ndingatimbanizga chihara chaku ndamweni. Uto mtufu wangu ukachiwombo wamweni. Chifukwa ine kuti ndingachiwombo cha.”

⁷ Sono yaka ndiku kenga kalusu mu nyengo za kale mu Yisraele pakuwombo ndi kusinthiskana: kukhozga vyakuchitika, yumoza wazuwanga chiyato ndi kupaska ku munyake. Yaka ndiku kenga kalusu mu Yisraele.

⁸ Viyo penipo mbali mwenimweni wanguti kwaku Boazi, “Ujiguliye iwe.” Wanguzuwa chiyato chake.

⁹ Sono Boazi wanguti ku ŵara ndi ŵanthu wose, “Mwe ŵakaboni msana wale kuti ine ndagula kwaku Naomi vyose vyo vyenga vyaku Elimeleke, ndi vyose vyo vyenga vyaku Chilioni ndi Maloni.

¹⁰ Ndipo Ruti mu Moabu choko chaku Maloni, ndagula kuŵa muwoli wangu, kurutizga zina la wakufwa, kuti lireke kuzilimitiya mukati mu ŵabali ŵake ndi ku likomo la kwake, mwe ŵakaboni msana wale.”

¹¹ Sono ŵanthu wose wo ŵenga pa likomo, ndi ŵara ŵanguti, “Te ŵakaboni. Mphanyi Ambuya amuchita munthukazi uyu wakazanga mu nyumba yako kuŵa uli ndi Rakelo ndi Leya, ŵeniwo pamoza ŵanguzenga nyumba yaku Yisraele. Mphanyi mwasakata mu Efrata ndi kuŵa ŵalumbiri mu Betelehemu;

¹² ndipo mphanyi nyumba yinu yaŵa uli ndi nyumba yaku Pereze mweniyo Tamara wangupapa kwaku Yuda, chifukwa cha ŵanawo Ambuya akakupaskanga mu munthukazi uyu muŵisi.”

¹³ Viyo Boazi wanguto Ruti ndi wanguŵa muwoli wake, ndi wanguseremo ndipo Ambuya angumupaska mphapu, ndipo wangupapa mwana munthurumi.

¹⁴ Sono ŵanthukazi ŵanguti kwaku Naomi, “Atumbikike Ambuya wo alivi kukujowo msana wale wambura mbali mwenimweni, ndipo mphanyi zina lake laŵa lakuziŵikwa mu Yisraele!

¹⁵ Wakaŵanga kwako wakuwerezgiyapo umoyo ndi mliska wa ukhongwe wako; pakuti mukumwana wako yo watukwanja iwe yo ngwaku'zirwa kwaku kuruska ŵana ŵanthurumi ŵankhonde ndi ŵaŵi.”

¹⁶ Sono Naomi wangumuto wangumuŵika pa chifuŵa chake ndipo wanguŵa mulezi wake.

¹⁷ Ndipo ŵanthukazi ŵakuzengezgana nawo ŵangumupaska zina ŵanguti, “Mwana munthurumi wapapika kwaku Naomi.” Ŵangumudana Obede, wenga wiske waku Jese, wiske waku Davidi.

¹⁸ Sono iyi ndiyo mphapu yaku Pereze, Pereze wenga wiske waku Hezroni,

¹⁹ Hezroni waku Rama, Rama waku Aminadabu,

²⁰ Aminadabu waku Nahashoni, Nahashoni waku Salamoni,

²¹ Salamoni waku Boazi, Boazi waku Obede,

²² Obede waku Jese, Jese waku Davidi.