Nthanthi 6 - Tonga Bible 1986

Vyakupereke munyake chikole, zinkhonde ndi ziŵi zakurakwiya Chiuta

¹ Wa mwana wangu, iwe waŵa chikoli cha muzengezgani wako, wapereka ndindira chifukwa cha mulendo,

² asani wathyika mwaku cho milomo yako yarongoro, wawira mu mazu gha mlomo wako;

³ iku uchiti ichi, wa mwana wangu, ndi ujipozomoske, pakuti waza munthazi ya muzengezgani wako. Ruta, tinthimika, kamupemphe ukongwa muzengezgani wako.

⁴ Maso ghako ghangagonanga cha nkhope zako zingasiwanga cha;

⁵ ujipozomoske uli ndi mphoyo ku chiŵinde cha nyama, uli nkhayuni ku janja la wakubaya tuyuni.

⁶ Ruta ku muswa, wa mukata we, pima nthowa zake, ndi uŵe wazeru.

⁷ Wambura so ndi fumu, mura pamwenga mweruzgi,

⁸ urongoso kurgha kwake ndi chihanya, ndi uwunjika vyakuŵika mu chivuna.

⁹ Mpaka zuŵanje ukagonanga penipo, wamulese we? Ndi zuŵanje po uyukiyenge mu tulu?

¹⁰ Kugona kumanavi, kusiwa kumanavi, kupeta kamanavi kwamanja kupumuwa,

¹¹ ndipo ukavu ukazanga paku iwe uli ngwakuyingayinga, ndi kusauka uli ngwakuphata nguru.

¹² Munthu wauliuli, munthurumi mulakwi, wayingayinga ndi kakambidu kawuzereza,

¹³ Wakupiya ndi maso ghake, wapalasuwa ndi malundi ghake, walongo ndi munwi wake,

¹⁴ Ndi mtima wakulandizga wapanga uheni, kwakukuyakiya wamija ndeu;

¹⁵ chifukwa uyowe ukazanga pake kwamabuchibuchi, ruŵi-ruŵi wakaswekanga kwambura machizgika.

¹⁶ Pe vinthu nkhonde ndi chimoza vyenivyo Ambuya atinkha, nkhonde ndi viŵi vyenivyo mbukazuzi kwawo:

¹⁷ maso ghakujikuzga, lilime lakupusika, ndi manja ghakudiska ndopa zambura kalema,

¹⁸ mtima weniwo upanga vyakuchita vya mphurupuru, marundi ghanigho ghatinthimika kuchimbiriya ku uheni,

¹⁹ kaboni mutesi mweniyo watuzga mautesi, ndi munthu mweniyo wakhuŵizga zindeu pakati pa ŵabali.

²⁰ Wa mwana wangu, sunganga marangu gha ausu, ndipo ungajowonga kusambizga kwa anyoko cha.

²¹ Uvimangiliye pa mtima wako nyengo zose; uvimangiliye mu khosi lako.

²² Uchenda, vikakurongozganga; uchigona pasi, vikakuvikiliyanga; ndipo asani wayuka vikarongoronga nawe.

²³ Pakuti dangu ndi nyale mbukweru, ndipo kuchenjezga pakuvwiya ndi nthowa ya umoyo,

²⁴ kukutuzgako iwe ku munthukazi muheni ku lilime la uteremusi la munthukazi wakunyenga.

²⁵ Unganwekanga kutowa kwake mu mtima wako, ndipo wangakusompho ndi nkhope zake cha;

²⁶ pakuti mureŵi wanganyengeka ndi burunga la chiŵande, kweni munthukazi mureŵi watuba umoyo iwo wa munthurumi.

²⁷ Kumbi munthurumi wangapinga moto pa chifuŵa chake kwambura kufya saru zake?

²⁸ Pamwenga kumbi munthu wangayenda pa maka gha moto kwambura kufya marundi ghake?

²⁹ Viyo ndimu walili yo wasere mu muwoli wa muzengezgani wake; palivi yumoza mweniyo watumuko walekenge kulangika.

³⁰ Ŵanthu si ŵatumuseka munkhungu asani watuba kuti wagute penipo ngwa nja?

³¹ Ndipo asani wakoleka, wakalipanga vya kuwerezgapo nkhonde ndi kaŵi; wakapaskanga vinthu vyose vya nyumba yake.

³² Yo wachita ureŵi walivi chinjeru, yo watichichita ichi watijibwanthuwa mweneko.

³³ Wakarondanga mabala ndi kuyeya, ndipo chilengesku chake kuti chikaleskekanga cha.

³⁴ Pakuti sanje yikalipiska ukongwa munthu, ndipo kuti wagowokenge cha wachichita thayu.

³⁵ Kuti wakazomeranga kuronda mubudilu cha pamwenga kumuzikiska nanga mungandaniska vyakumupaska.