Mateyu 6 - Tonga Bible 1986

Kapaskidu kambura kujirumba

¹ “Cheŵani, mungachitiya urunji winu paurongo pa ŵanthu cha kwachiwoneka nawo: iku mphotu mulive ku Auskemwe ŵakuchanya.

² “Penipo uchita wezi, ungakuŵanga mbata cha paurongo pako, uli ndimo ŵachitiya ŵakufuvya mu masinagoge ndi mu zinthowa alinga kuti ŵarumbike ndi ŵanthu. Nadidi ndikuneniyani, ŵaronde mphotu yawo.

³ Kweni pakuchita iwe wezi, lingaziŵa cha janja lako la maze cho lichita janja lako lamarghe:

⁴ viyo wezi wako uŵe wamu ubende: ndipo Ausu wo atikuwona mu ubende, akuwerezgiyengepo.

Chisambizgo cha rombo

⁵ “Ndipo penipo uromba, ungaŵanga nge mbakufuvya cha; pakuti ŵatanja kuma ndi kuromba mu masinagoge ndi mu ndekanu za miseu, kuti ŵawoneke ku ŵanthu. Nadidi ndikuneniyani, ŵaronda mphotu yawo.

⁶ Kweni iwe, penipo uromba, sere mu chipinda chako, jarako ku khomo, urombe Ausu wo ŵemu ubende, ndipo Ausu wo atikuwona mu ubende akuwerezgiyengepo.

⁷ “Ndipo pakuromba mungawerezgawerezga ŵaka cha nge mbaMitundu: chifukwa ŵaghanaghana kuti ŵavwikenge mu kuŵereŵeta kwawo kunandi.

⁸ Viyo mungakozgananga nawo cha: chifukwa Auskemwe ŵaziŵa vyo mukavuka, mweche mundaŵapemphe.

⁹ Imwe rombani viyo: Auskefwe mwa ŵakuchanya, lipaturike zina linu.

¹⁰ Ufumu winu uze. Khumbu linu lichitike, panupasi nge ndiko kuchanya.

¹¹ Tipaskeni le kurgha kwidu kwale.

¹² Ndipo tirekiyeni mateu ghidu. Nge ndimo nafwe so taŵarekea mateu ŵidu.

¹³ Ndipo mungatitole mu kesedu kweni titaskeni ku mheni yo.

¹⁴ “Chifukwa asani mutiŵareke ŵanthu mamphuru ghawo ŵarekiyenge imwe so Auskemwe ŵakuchanya.

¹⁵ Kweni asani mulive kuŵareke ŵanthu mamphuru ghawo, Auskemwe nawo kuti ŵarekiyenge cha mamphuru ghinu.

Chisambizgo cha kufunga

¹⁶ “Ndipo penipo pose mungafunga, mungaŵanga nge mbakufuvya cha, ŵakuzimbwachisku: chifukwa ŵazimbwiska visku vyawo alinga kuti ŵawoneke ku ŵanthu kuti mbakufunga. Nadidi ndikuneniyani, ŵakuronde mphotu yawo.

¹⁷ Kweni uchifunga iwe, tukutizga mutu wako, sambiska chisku chako,

¹⁸ alinga kuti ungawoneka cha ku ŵanthu kuti ufunga, kweni ku Ausu wo ŵemu udesi: ndipo Ausu ŵatikuwona mu udesi, ŵakuwerezgiyengepo.

Usambasi kuchanya

¹⁹ “Mungajiŵikiya mbiku panupasi cha, penipo nyenji ndi murozu vitananga, ndi penipo ŵankhungu ŵabukutuwa ndipo ŵatuba.

²⁰ Kweni mujiŵikiye mbiku kuchanya, kweniko nyenji chingana ndi murozu kuti vitananga cha, kweniko ŵankhungu kuti ŵabukutuwa chingana nkhuba cha,

²¹ chifukwa ko kwe mbiku yako, kweniko ndiko kuŵenge mtima wako.

Ukweru wa liŵavu

²² “Limbuni la liŵavu ndijiso: Asani jiso lako ndamampha, liŵavu lako lose liŵenge laukweru:

²³ kweni asani jiso lako lingaŵa liheni, liŵavu lako lose liŵenge lamdima. Viyo asani ukweru wamwako ndi mdima, iku mdima wo ngukuru mbwenu!

Chiuta, ndi usambasi

²⁴ “Palive yumoza waziŵa kuteŵete ambuya ŵaŵi: chifukwa pamwe wamtinkhenge yumoza, ndi wamwanjenge munyake; pamwenga wajiperekenge ku yumoza, ndi wamtozenge munyake. Kuti muziŵa kuteŵete Chiuta ndi chuma so cha.

²⁵ “Chifukwa chenichi ndikuneniyani, mungakweŵekiyanga umoyo winu cha, cho mungargha pamwenga cho mungamwa; chingana nkhu liŵavu linu, cho mungavwara. Asi umoyo ngukuru ku chaukurgha, ndi liŵavu ndikuru ku chakuvwara?

²⁶ Alereni tuyuni totwamude, kuti tumija cha, chingana nkhuvuna, chingana nkhuronga mu zinkhokwe kweni Auskemwe ŵakuchanya ŵatutulera. Asi imwe muruska ukongwa twenito?

²⁷ Ndipo njani mwaku imwe pakukweŵeka waziŵa kukuskiyako ku msinkhu wake mkono umoza?

²⁸ Napu mukweŵekiyanji pa chakuvwara? Pimiyani ŵabwatinda ŵamudondo, mo ŵamere; kuti ŵatakataka cha, chingana nkhuruka,

²⁹ kweni ndikuneniyani, kuti chingana ndi Solomone mu unkhankhu wake wose kuti wanguvwalira ulaka njumoza waku wo cha.

³⁰ Kweni asani Chiuta wavwarika viyo uteka wamudondo, wo le ulipo, ndi mawa upong'eka ku chipa, asi ukongwa kwakuruska wamvwarika imwe, mwaŵachivwanu chimana?

³¹ Viyo mungakweŵekanga, kuti, ‘Tirghengenji?’ Pamwenga, ‘Timwengenji?’ Pamwe, ‘Tivwalengenji?’

³² Chifukwa vyose vyenivi ŵaMitundu ŵalembe; ŵaziŵa Auskemwe ŵakuchanya kuti mukavuka vyenivyo vyose.

³³ Kweni lembeni danga ufumu waku Chiuta ndi urunji wake, ndipo vyenivyo vyose vikuskikiyengeko kwaku imwe.

³⁴ “Viyo mungakweŵekiyanga la mawa cha: chifukwa la mawa lijikweŵekiyenge lija. Ngwakukwaniya zuŵa lo uheni wake.