Mateyu 18 - Tonga Bible 1986

Mura ndiyani?

¹ Mu ora lenilo ŵasambizi ŵanguza kwaku Yesu, ŵakuti, “Njani na mura mu ufumu wakuchanya?”

² Ndipo Yesu, wakudana kana, wangukajarika mukati mwawo.

³ Wanguti, “Inyadi ndikuneniyani, kwambura kuti mung'anamuka, ndi mutuŵa nge mbanamana, kuti muserenge mu ufumu wa kuchanya cha.

⁴ Viyo yose wakujiyuyuwa nge nkhana yaka ndi mura mu ufumu wa kuchanya.

Kweseka ku kwananga

⁵ “Ndipo yose yo warondiyenge kana kamoza kaviyo mu zina langu, waronde ine;

⁶ ndipo yose yo waguŵiskenge kamoza ka ŵana yaŵa ŵakuvwana mwaku ine, nkhwamandulika kwaku iyo kuti chimphe chenichikuru chimangike mu singu lake, ndi kuti wapong'eke mu ndimba yanyanja.

⁷ “Owe ku charu pa chifwa cha vyakuguŵiska! Chifukwa vikazangadi viguŵisku; kweni owe ku munthu yo mwaku mweniyo chiguŵisku cho chituziya!

⁸ Kweni asani janja lako pamwenga rundi lako litukuguŵiska, ulidumuwe, ulitaye; nkhwamampha kwaku iwe kuseremu umoyo tumbundu pamwenga wakuganthiya kwakuruska, kuŵa, nagho manja ghaŵi pamwenga marundi ghaŵi; kuti upong'eke mu moto wamuyaya.

⁹ Ndipo asani jiso lako litukuguŵiska, likorowo, litaye; nkhwamampha kwaku iwe, kuŵa wa jiso limoza, kusere mu umoyo, kwakuruska, kuŵa ndi maso ghaŵi, kuti upong'eke mu gehena la moto.

Ntharika ya mberere yakusoŵa

¹⁰ “Cheŵani kuti mungayuyuwa kamoza ka tumana to cha; chifukwa ndinene imwe, kuti nyengo zose ŵangelo ŵawo ŵakuchanya ŵalereska chisku cha Ada ŵakuchanya. [

¹¹ Chifukwa Mwana wa munthu wakuza kuzachitaska chakutayika.]

¹² Mupima uli? Asani munthu yumoza wangaŵa ndi mberere machumi pe chumi, ndipo yingasoŵa yimoza yaku zo, asi wasiya zo machumi ghankhonde ndi ghanayi pachanya nkhonde ndi zinayi ndipo waruta mu mapiri, wakupenja yakusoŵa yo?

¹³ Ndipo asani wayisaniya, nadi ndikuneniyani, wakondwere paku yeniyo kwakuruska paku zo machumi ghankhonde ndi ghanayi pachanya nkhonde ndi zinayi zambura kusoŵa.

¹⁴ Eviyo, kuti ndi khumbo la Ada wakuchanya cha, kuti katayike kamoza ka ŵamana yaŵa.

Mubali yo warakwa

¹⁵ “Ndipo asani mbaliwako wakulakwiya, kanga, kampanikizge, nge mphakati paku iwe ndi iyo pe: asani wakuvwiya, wamuwoja mbali wako.

¹⁶ Kweni asani wareka kuvwa, tole pamoza nawe yumoza pamwenga ŵaŵi, alinga kuti pa mlomo wa ŵakaboni ŵaŵi pamwenga ŵatatu nkhani yose yikhozgeke.

¹⁷ Ndipo asani wareka kuvwa iwo, unene mpingu wo; kweni asani chingana nkhu mpingu wareka kuvwa, sono waŵe kwako nge ngwa mtundu ndi wamsonkho.

Kukanizga ndi kuzomerezga

¹⁸ “Nadidi, ndikuneniyani, vyose vyo mumangenge panupasi, viŵenge vyakumangika kuchanya ndipo vyose vyo mufwatuwenge panupasi, viŵenge vyakufwatulika kuchanya.

¹⁹ Ndipo so ndikuneniyani, kuti asani ŵaŵi ŵaku imwe ŵangapangana panupasi pa kanthu kose ko ŵangapempha, kachitikenge kwaku wo ndi Ada ŵakuchanya.

²⁰ Chifukwa po pe ŵaŵi pamwenga ŵatatu ŵakuwungirana pamoza mu zina langu, penipo ine nde pamoza nawo, mukati mwawo.”

Ntharika ya muŵanda wambura kugowoke

²¹ Sono wanguza Petro, wanguti kwaku iyo, “Ambuya, mbali wangu wandilakwiyenge ndipo ndimgowokiyenge karinga. Mpaka kankhonde ndi kaŵi?”

²² Wamunene Yesu, “Kuti nditukunene mpaka kankhonde ndi kaŵi cha, kweni, mpaka kamachumi ghankhonde ndi ghaŵi kuwerezga kankhonde ndi kaŵi.

²³ “Chifukwa chenichi ufumu wa kuchanya ulinganizgika ndi munthu, karonga yo wangukhumba kuchita chakuŵerenge ndi ŵaŵanda ŵake.

²⁴ Wachamba iyo kuŵerenge, wangutoleke kwake wamateu wa matalente vikwi chumi.

²⁵ Kweni pakuŵavi kakulipiyapo, mbuyake wangulangula kuti wasaskike iyo, ndi muwoli wake ndi ŵana, ndi vyose vyo wenga navyo mwakuti walipiyepo.

²⁶ Viyo muŵandayo, wakuwa pasi, wangumuŵeyere, wakuti, ‘Ambuya, kunthiyanipo nane, ndipo vyose ndikawerezgiyangapo kwaku imwe.’

²⁷ Ndipo mbuyake wa muŵanda yo, wakukoleka ndi chitima, wangumgowoke, wangumreke mateu gho.

²⁸ Kweni wachituwa muŵanda yo, wangusaniya yumoza wa ŵaŵanda ŵanase ŵake, mweniyo wangumteuwa madenari machumi pe chumi, ndipo wangumko pa kagoromeru, wakuti, ‘Ndiwezge cho ukuteuwa.’

²⁹ Viyo muŵanda mwanase wake, wakuwa pasi, wangumuŵeyere wakuti, ‘Kunthiyapo nane, ndipo ndilipiyengepo ngongori yako.’

³⁰ Kweni iyo wangukana ndipo wangwachimutaya mu nyumba ya ulinda, mpaka po wangalipa ngongoli yo.

³¹ Viyo penipo ŵaŵanda ŵanase ŵake ŵanguwona vyo vinguchitika, ŵanguchita chitima ukongwa, ndipo ŵangwachimpatauliya mbuyau vyose vyakuchitika.

³² Sono mbuyake wangumdana, ndi wanguti kwaku iyo, ‘Muŵanda mheni we, ndingukugowoke mateu ghawo ghose, pakuti ungundiŵeyere;

³³ asi kungwenere iwe nawe kumuchitiya lisungu muŵanda munyako, mo me ndinguchitiya iwe lisungu?’

³⁴ Ndipo mbuyake wangukalipa wangumpereka muulinda wa ŵakumangika, mpaka walipe ghose mateu ghake.

³⁵ Viyo Ada nawo ŵakuchanya ndimo achitiyenge we yose waku imwe, asani mbali winu mureka kumugowoke kutuliya ku mitima yinu.”