Marangu 34 - Tonga Bible 1986

Nyifwa yaku Mosese

¹ Ndipo Mosese wangukwera kutuwa ku madambo ghaku Moabu kuya ku phiri Nebo, pachanya pa Pisiga lo lithyana ndi Yeriko, ndipo Ambuya angumurongo charu chose, Gileada kwachifika kwaku Dani,

² Naftali yose, charu chaku Efraimu ndi Manase, charu chose chaku Yuda kwachifika ku nyanja yaku zambwe.

³ Negebu ndi Dambo, lo ndilo dambo la Yeriko, wo ndi msumba wa mingwalangwa, kwachifika ku Zoari.

⁴ Ndipo Ambuya anguti kwaku iyo, “Ichi ndicho charu ndingurapiya Abrahamu, Yisaki, ndi Yakobe, kuti, ‘Ndikachipaskanga ku mphapu zinu.’ Ndakuzomerezga kuchiwona ndi maso ghako, Kweni Kuti ukayangako kuwa cha.”

⁵ Viyo Mosese mteŵeti wa Ambuya wangufwiya penipa mu charu chaku Moabu, kwakuyana ndi mazu gha Ambuya,

⁶ ndipo ŵangumuŵika mu dambo mu charu chaku Moabu kuthyana ndi Betepeori, kweni palivi munthu yo waziŵa malo gho wakuŵikapo mpaka zuŵa lino.

⁷ Mosese wenga wa virimika machumi pe chumi pachanya machumi ghaŵi (120) pa ura wake wachifwa. Jiso lake lengavi kuchita ndandi chingana ndi nthazi yake yengavi kugowoka.

⁸ Ndipo ŵaYisraele ŵangumutenje Mosese mu madambo ghaku Moabu mazuŵa machumi ghatatu (30), ndipo mazuŵa ghakumutenjere ghangumara.

⁹ Ndipo Yoswa mwana munthurumi waku Nuni wanguzazika ndi mzimu wachinjeru, pakuti Mosese wanguŵikapo manja paku iyo, ndipo ŵaYisraele ŵangumuvwiya kuchita uli ndimo Ambuya angulanguliya Mosese.

¹⁰ Ndipo mulivi kuyukamo mchimi mu ŵaYisraele wakulingana ndi Mosese, mweniyo Ambuya anguziŵa chisku ndi chisku.

¹¹ Palivi nanga njumoza wakukozgana nayo ku visimikizgu vyose vyo Ambuya angumutumiya kuvichita mu charu cha Egipiti, kwaku Farao ndi ku ŵateŵeti ŵake wose ndi ku charu chake chose,

¹² ndi ku nchitu zose za nthazi ndi ku machitidu ghakuru ghose ndi ghakofya ghenigho Mosese wanguchita pa maso pa ŵaYisraele wose.