Hoseya 2 - Tonga Bible 1986

¹ Nena ku mbali wako, “Ŵanthu ŵangu”, ndi ku mzichi wako, “Waronde lisungu.”

Gomere wambura magomekezgeka, Yisraele wambura magomekezgeka

² “Mususkani ndi nyinamwe, suskani chifukwa ndi muwoli wangu cha, nane kuti ndi murumi wake cha. Kuti watuzgepo ureŵi pa maso pake, ndi ureŵi pakati pa maŵe ghake.

³ Vinu ndingamuzuwa saru ndi wangaja nkhuli ndi kumumika nge ndi zuŵa la kawi kake. Ndingamusanduska nge ndi lisuwa, ndi kumusanduska nge ncharu cha chiparamba, ndi kumubaya ndi nyota.

⁴ Kuti nkhaŵachitiyanga lisungu chingana mbana ŵake cha, chifukwa mbana ŵa ureŵi.

⁵ Chifukwa nyinawo wachita ureŵi; yo wanguŵapapa wachita chilengesku. Chifukwa wanguti, ‘Ndirondonge ŵakundanja, wo ŵandipaska vyakurgha vyangu ndi maji ghagu, weya wangu ndi thonji langu, mafuta ghangu ndi chakumwa changu.’

⁶ Chifukwa ichi nkhajaranga nthowa yake ndi minga, ndi kuyizungurizga ndi mupanda kuti wareka kuwona nthowa zake.

⁷ Warondonge ŵakumwanja ŵake, kweni kuti waŵasaniyenge cha, ndipo wakaŵapenjanga, kweni kuti wakaŵasaniyanga cha. Ndipo wakambenge kuti, ‘Nkharutanga ndi kuweriyana ndi murumi wangu wakudanga, chifukwa kwenga kwamampha kwaku ine kuruska mo ndiliri sono.’

⁸ Chifukwa wengavi kuziŵa kuti ndine ndingumupaska trigu, vinyo ndi mafuta, ndi kumwandaniskiya siliva, ndi golide, lenilo wanguchitiya Bala.

⁹ Chifukwa ichi nditongeko trigu wangu mu nyengo yake, ndi vinyo wangu mu nyengo yake, ndi nkhatonga weya wangu ndi thonji langu, vyenivyo vyamubisanga nkuli yake.

¹⁰ Sono ndimurongonge uheni pa maso gha ŵakumwanja ŵake, ndipo palivi chingana njumoza yo wamutaskenge ku janja langu.

¹¹ Ndipo nkhalekeskanga kukondwa kwake kose; madghera ghake, myezi yake yifya, ŵasabata ŵake, ndi madghera ghake ghose ghakunozgeka.

¹² Ndipo ndinangenge mphereska zake, ndi miti yake ya mkuyu vyenivyo wanena kuti, ‘Ivi nchihara changu cho wakundanja wangu wandipaska.’ Nkhavisanduskanga lisuwa, ndipo nyama zamu dondo zikavirghanga.

¹³ Ndipo ndimurangenge chifukwa cha mazuŵa gha madghera gha ŵaBala mwaku gho wawochanga vyakununkhira kwaku iwo, ndi wanguvwala mphete ndi vyakugalarika vyake, wangurondo ŵakumwanja ŵake, ndi wangundiruwa ine, atiti Ambuya.

Chanju cha Ambuya pa ŵanthu ŵawo

¹⁴ “Chifukwa ichi ndimunyengenge, ndi kuruta nayo ku lisuwa ndi kukamba nayo kwakufwasa.

¹⁵ Kwenikuwa ndimupaskenge minda yake ya mphereska, ndi kusanduska chidika cha Akoro kuŵa khomo la chigomezgu. Ndipo kuwa wamukenge nge ndi mu mazuŵa gha umupupuka wake, ndi nge mpha nyengo yo wangutuliya mu charu cha Egipiti.

¹⁶ “Ndipo mu zuŵa lo,” atiti Ambuya, “ukandidananga kuti, ‘murumi wangu,’ kuti wazakumdina so cha kuti ‘Bala wangu.’

¹⁷ Chifukwa nkhatuzangamo mazina gha ŵaBala mu mlomo wake, ndipo kuti ghazumbulikenge so cha mazina ghawo muyaya.

¹⁸ Ndipo mu zuŵa lo ndamukukuchitiya phanganu ndi nyama zamu dondo, ndi viyuni vya mude, ndi vithu vyakukwaŵa pasi. Ndipo nkhabwanganduwanga uta, lipanga ndi nkhondo mu charu ndi nkhamugonekanga kwakufwasa.

¹⁹ Ndikujaliyenge kuti uŵe wangu muyaya; ndikujaliyenge kuti uŵe wangu mu urunji, mu weruzgi, muchanju chakufikapo ndi lisungu.

²⁰ Ndikujaliyenge kuti uŵe wangu wamagomekezgeka ndipo uziŵenge Ambuya.

²¹ Ndipo mu zuŵa liya, atiti Ambuya, nkhamukanga machanya ndi machanya ghamukenge charu chapasi.

²² Ndipo charu chapasi chimukenge trigu, vinyo, ndi mafuta, ndipo ivi vimukenge Yezerele;

²³ ndipo nkhamupandanga mu charu chifukwa chaku ndamweni. Ndipo nkhaŵanga ndi lisungu paku yo ‘Wambura kuchitikiya lisungu,’ ndipo nditinge ku ŵanthu ŵangu cha. ‘Ndimwe ŵanthu ŵangu’; ndipo iyo watinge, ‘Imwe mwe Chiuta wangu.’ ”