Hoseya 1 - Tonga Bible 1986

¹ Mazu gha Ambuya gho ghanguza kwaku Hoseya, mwana waku Beri mu mazuŵa ghaku Uziya, Yotamu, Ahazi, ndi Hezekiya ŵakaronga ŵaku Yuda mu mazuŵa ghaku Yeroboamu waku Yoasha, karonga wa ŵaYisraele.

Hoseya ndi ŵana ŵake

² Po Ambuya angudanga kukamba kwaku Hoseya, anguti, “Ruta ukato munthukazi mureŵi ndi ukaŵi ndi ŵana ŵaureŵi, chifukwa charu chose chichita ureŵi ukuru pakureka kuŵarondo Ambuya.”

³ Viyo wanguruta, ndi wanguto Gomere, mwana munthukazi waku Dibilaimi, ndipo wanguzuuka ndi wangumupapiya mwana munthurumi.

⁴ Ndipo Ambuya anguti kwaku Hoseya, “Umudani mwana yo zina lakuti, Yezerele; chifukwa kwaja nyengo yimanavi nkhalanganga nyumba yaku Yehu chifukwa cha ndopa zaku Yezerele, ndipo ndituzgengepo ufumu pa nyumba yaku Yisraele.

⁵ Ndipo pa zuŵa lenilo nkhafyonga uta waku Yisraele mu dambo laku Yezerele.”

⁶ Gomere wanguzuuka so wangupapa mwana munthukazi, ndipo Ambuya anguti kwaku Hoseya, “Umudani mwana yo zina lakuti, ‘Wambura kuchitikiya lisungu,’ chifukwa kuti nkhaŵanga ndi lisungu so cha ndi ŵanyumba yaku Yisraele chingana nkhuŵagowoke.

⁷ Kweni nkhaŵanga ndi lisungu ndi nyumba yaku Yuda, ndipo ndiŵataskenge ndi nthazi ya Ambuya Chiuta wao; kuti nkhaŵataskanga ndi uta cha, pamwenga lipanga, pamwenga nkhondo, pamwenga ŵakavalo, pamwenga ŵakukwera pa ŵakavalo.”

⁸ Wanguti wareka kuwonkheska, “Wambura kuchitikiya lisungu,” Gomere, wanguzuuka ndi wangupapa mwana munthurumi.

⁹ Ndipo Ambuya anguti, “Umudani zina lakuti ‘Ndimwe ŵanthu ŵangu cha,’ chifukwa kuti mwe ŵanthu ŵangu cha ndipo ine kuti nde Chiuta winu cha.”

ŴaYisraele ŵakawezgekanga

¹⁰ Ndipuuli unandi wa ŵaYisraele uŵenge nge ndi mchenga wamu nyanja weniwo kuti ungapimika chingana nkhuŵerengeka cha; ndipo mu malo mwenimo mungukambikiya kwaku iwo, kuti, “Ndimwe ŵanthu ŵangu cha,” mwenimo so ndimo kukakambikiyanga kwaku iwo kuti, “Ŵana ŵaku Chiuta wamoyo.”

¹¹ ŴaYuda ndi ŵaYisraele ŵamuwunjikika pamoza, ndi kujisankhiya murongozgi yumoza; ndipo ŵamukwera kutuwa mu charu, chifukwa zuŵa laku Yezerele likaŵanga likuru.