Chiyambo 15 - Tonga Bible 1986

Ambuya apangana ndi Abramu

¹ Pavuli pa vinthu ivi mazu gha Ambuya ghanguza kwaku Abramu mu chakuwona, “Ungopanga cha Abramu, Ine nde nguru yako; mphoto yako yikaŵanga yikuru ukongwa.”

² Kweni Abramu wanguti. “Ambuya Chiuta, mundipaskenge chine? Pakuti ndichalivi mwana, ndipo nuhari wa nyumba yangu ndi Eliezere waku Damasko?”

³ Ndipo Abramu wanguti, “Ehe, mulivi kundipaska mphapu; ndipo muŵanda wakuwiya mu nyumba yangu wakaŵanga muhari wangu.”

⁴ Sono mazu gha Ambuya ghanguza kwaku iyo, “Uyu kuti wakaŵanga muhari wako cha; mwana waku wamweni ndiyo wakaŵanga muhari wako.”

⁵ Ndipo wangumutuzgiya kubwalo ndi wanguti, “Lereska kuchanya, ndi uŵerenge nyenyezi zo, asani ungaziŵa kuziŵerenga.” Sono wanguti kwaku iyo, “Viyo ndimu yikaŵiyanga mphapu yako.”

⁶ Ndipo wangugomezga mu Ambuya, ndipo Chiuta wangumupima kuŵa murunji.

⁷ Ndipo wanguti kwaku iyo, “Ndine Ambuya mweniyo wangukutuzga ku Uru wa ŵaKaldiya kuzachikupaska charu ichi kuchihara.”

⁸ Kweni iyo wanguti, “Ambuya Chiuta, ndikaziŵanga uli ine kuti ndikachiharanga?”

⁹ Wanguti kwaku iyo, “Nditole ng'ombe yinthukazi ya virimika vitatu, mbuzi yinthukazi ya virimika vitatu, mberere yinthurumi ya virimika vitatu, njiŵa yimoza ndi ka nkhunda.”

¹⁰ Ndipo wangumtole ivi vyose ndi wanguvipikita pakati, ndipo wanguŵika chipikita chose kuthyana ndi chinyake; kweni viyuni vyo kuti wanguvipikita cha.

¹¹ Ndipo penipo makuŵi ghangusikiya pa vitanda, Abramu wangughadikiska.

¹² Lichisere lumwi, tulo tuzitu tunguŵa paku Abramu ndipo ehe, mdima wakofya ndi ukuru unguŵa paku iyo.

¹³ Sono Ambuya anguti kwaku Abramu, “Ziŵa kwakuneneska kuti mphapu yako yikatandalanga mu charu cho kuti nchawo cha, ndipo ŵakaŵanga ŵaŵandamwenimuwa, ndipo ŵakaŵasuzganga virimika machumi pe chumi ghanayi (400);

¹⁴ Kweni ndazamtole cheruzgu pa mtundu wo ŵakatataliyanga, ndipo pavuli ŵazamtuwamo ndi usambasi unandi.

¹⁵ Kweni iwe, ukarutanga ku ausu mu chimangu; ukafwanga pa ukhongwe weneko.

¹⁶ Ndipo ŵazamuwere kuno mu mgonezi wa chinayi; pakuti ubendezi wa Amori wenga undafiskike.”

¹⁷ Penipo lumwi lingusere ndi kungufipa, ehe, chiŵiya cha moto chakusunkha usi ndo lumbuni lakukole vingudumuwapo pakati pa vipitika ivi.

¹⁸ Mu zuŵa leniliya Ambuya anguchita phanganu ndi Abramu lakuti, “Ku mphapu yako ndipaska charu ichi, kwamba pa msinji wa Egipiti kufika ku msinji ukuru zina lake Efrate,

¹⁹ charu cha ŵaKeni, ŵaKenizi, waKadamoni,

²⁰ ŵaHiti, ŵaPerizi, ŵaRefa,

²¹ Amori, ŵaKanani, ŵaGirgashi, ndi ŵaYebusi.”