Chituwa 17 - Tonga Bible 1986

Maji ghatuwa mu jarawi lapa Horebe

¹ Mpingu wose wa ŵaYisraele ungusama kutuwa ku bozwa la Sini limanalimana, uli ndi langulu la Ambuya, ndipo ŵangugoŵa pa Refidimu, kweni pengavi maji ghakuti ŵangamwa ŵanthu,

² Chifukwa cho ŵanthu ŵangusaniya kafukwa ndi Mosese ndi ŵanguti, “Utipaske maji timwenge.” Ndipo Mosese wanguti kwaku wo, “Chifukwa nchine pakulimbana ndi ine? Chifukwa nchine mutuŵesa Ambuya?”

³ Kweni ŵanthu ŵangukoreka ndi nyota, ndipo ŵanthu ŵangudinginikiya Mosese ŵanguti, “Chifukwa chine ungutituzga mu charu cha Egipiti, kuzachitibaya ndi ŵana ŵidu ndi ng'ombe zidu ndi nyota?”

⁴ Viyo Mosese wangubongole ku Ambuya, “Ndichitenje nawo ŵanthu yaŵa? Mbakulongosoreka kundidina ndi mya.”

⁵ Ndipo Ambuya anguti kwaku Mosese, “Ruta paurongo pa ŵanthu, ndipo ujitore pamoza nawe ŵaraŵara ŵanyake ŵa ŵaYisraele, mu janja lako utolemo ndodo yeniyiya ungupumiya Nile, ndipo rutaninge.

⁶ Ehe, ine ndikamanga paurongo pako penipa pa jarawi lapa Horebe, ndipo iwe ukapumanga jarawi lo, ndipo maji ghakatuwanga mwaku lo, alinga kuti ŵamwenge ŵanthu.” Ndipo wanguchita viyo, ŵachiwonako ŵaraŵara ŵa ŵaYisraele.

⁷ Ndipo wangudana zina la malo gha Masa ndi Meriba, chifukwa cha kutundula kwa ŵana ŵaku Yisraele; ndi chifukwa ŵangwesa Ambuya pakukamba kuti, “Kumbi Ambuya ŵe mukati mwidu, pamwenga awa?”

ŴaYisraele ŵathereska Amaleke

⁸ Sono ŵanguza Amaleke, ndi ŵangurwa ndi ŵaYisraele pa Refidimu.

⁹ Ndipo Mosese wanguti kwaku Yoswa, “Utisankhiye ŵanthu, ndipo utuwe ukarwane ndi Amaleke; la mawa Ine ndamukuma pachanya pa kamtunthu ndi ndodo yaku Chiuta mu janja langu.”

¹⁰ Viyo Yoswa wanguchita uli ndimo Mosese wangumunene ndipo ŵangurwana ndi Amaleke, ndipo Mosese, Aroni, ndi Huru angukwere pachanya pa kamtunthu,

¹¹ nyengo yose yeniyo Mosese wangusoska janja lake, ŵaYisraele ŵangupunda, ndipo penipo wangusiska janja lake, Amaleke ŵangupunda.

¹² Kweni manja ghaku Mosese ghanguvuka. Viyo ŵanguto mwa, ndi ŵanguwuŵika pasi pake, ndi wanguja paku wo, ndipo Aroni ndi Huru ŵangusoska manja ghake yumoza kuchiri kumoza ndi munyake kuchiri kunyake; viyo manja ghake ghangulimba mpaka kusere kwa lumwi.

¹³ Ndipo Yoswa wangupupiya pasi Amaleke ndi ŵanthu ŵake ndi wuyi wa lipanga.

¹⁴ Ndipo Ambuya anguti kwaku Mosese, “Lemba ichi nge nchikumbusku mu buku, ndipo uchikambe mu makutu ghaku Yoswa kuti ndisisistiyanga limu chikumbusku chaku Amaleke mu charu chose chapasi.”

¹⁵ Ndipo Mosese wanguzenga jochero la chisopo ndi wangulidana zina lake Ambuya ndi mbendera yangu.

¹⁶ Wanguti, “Koni mbendera ya Ambuya. Ambuya akarwanga ndi nkhondo ndi Amaleke mu mgonezi wose.”